Read Zotung Chin 2 SHERIANAW 12 Bible Online

2 SHERIANAW 12 - Zotung Chin bible

2 SHERIANAW 12

¹Rehoboam uknaw tuh tyn zah thawzung he a hoithung tuh, aning te a kya umpaw Israel hae balyn nynh BAWIPAW kawbya kha a vua hae.

²BAWIPAW tungvaw mih lungzi khyh keiccuze Rehoboam nynh siapharan lang a tangnaw kum pangawnaw kum khe Izip Siapharan Shishak nynh Jerusalem kha

³marangle thong kheit za ning, marang rhawkaw thong sung taruh te tuk lan a ccianua thung. Izip ram te amaw ryte a cceihkheih hae paw tuh riatae um khyh hae—Libia hae, Sukkiim hae te Ethiopia hae nynh thua hae.

⁴Judah ram e akoihkuhpaw khua hae kha lah zah Jerusalem cia a thua.

⁵Tetuh Shishak keiccuze Jerusalem kya a sueluakuh hae paw Rehoboam te Judah bawi hae kalan khe profeh Shemaiah tuh yn thua zah minmin kyakhe, “BAWIPAW nynh hynhte a ho: Kae hynh nae vua oh keiccuze nanning kha Shishak kuih kalan kae vua vae oh, a ci,” cite a hopya hae.

⁶Tetuh Israel bawi hae te siapharan nynh zakawsangsakuh hae zah, “BAWIPAW tuh a ding,” a ci hae.

⁷Minmin tuh zakaw a sangsakuh hae cipaw kha BAWIPAW nynh he a muih tuh, Shemaiah kalan BAWIPAW bya yn thua zah, “Minmin tuh zakaw a sangsakuh vae hae; minmin kha ka roh lan khyh hae, luenaw abang ka pya cih hae zah Shishak kuih kha mangte Jerusalem tungvaw kya ka thinrianaw kha bu thua lan khyh.

⁸Tuhzemah minmin nynh kae ka ryalaw te ccangpaw laephi uktu hae ryalaw alaenaw kha a nythya nawlan hae, minmin tuh Shishak a ryalahtu lang a tang cih hae.

⁹Tuhcite Izip Siapharan Shishak nynh Jerusalem kha ccianua thung zah BAWIPAW inn e sisua hae te siapharan inn e sisua hae kha a law; pawpaw balyn kha pong a law. Solomon nynh a raepaw sui khawriaphua hae kha mah a law;

¹⁰thuasalama Rehoboam Siapharan nynh tuh-e hae hanpaw sohin khawriaphua hae kha raeru zah siapharan inn thuakaw a ngawpaw rhawviatu bawi hae kuih kya a nung.

¹¹Siapharan nynh BAWIPAW inn lungkhu lang a tee takyh vae ze, rhawviatu hae tuh tuh-e khawriaphua hae kha ccyngte leih oun cceih hae zah, rhawviatu hae khaan langkhe bua leih a kikhae hae.

¹²Rehoboam nynh zakaw a sangsaku keiccuze minmin kha marya ro athua khyh nawlan hae, BAWIPAW thinrianaw tuh a kyate a maeleihkuh; tuhpiaze Judah ram kya uccaw a umtuzia ahoy.

¹³Rehoboam Siapharan nynh Jerusalem kya a thawzung tynsakuh zah a uk. Rehoboam tuh sung pali kum kheit acih te ram kha a uk takaw; Jerusalem kya kum haw lae sari a uk, tuh-e khua tuh BAWIPAW nynh a min nung nawlan Israel phin hae balyn kyate a popaw khua nynh thua. A nung min tuh Naamah cikuh zah Ammon ccungccaw nynh thua.

¹⁴BAWIPAW kha a thinlung ccaccing te a ry khyh keiccuze aning nynh hoyleinaw kha a rae.

¹⁵Tuhlaepaw Rehoboam nynh rya a lawpaw atakaw te athangnaw cia, profeh Shemaiah ccauh te profeh Iddo ccauh kya thokeinaw ccazing thyhte a zei hae. Rehoboam te Jeroboam laku kya rhawtukkunaw po a um.

¹⁶Rehoboam tuh a minpaaw hae ryte ih hae zah David khua kya a uu hae; te amaw ccelang a ccapaw Abijah nynh siapharan lang a tang.