Read Zotung Chin 2 SHERIANAW 13 Bible Online

2 SHERIANAW 13 - Zotung Chin bible

2 SHERIANAW 13

¹Jeroboam Siapharan nynh ram a uknaw kum haw lae taryanaw kum khe Abijah nynh Judah ram kha uk takaw zah,

²Jerusalem kya kum thum a uk. A nung min tuh Mikaiah cikuh zah Gibeah khuapaw Uriel ccanung nynh thua. Abijah te Jeroboam laku kya rhawtukkunaw a um.

³Abijah nynh a popaw rhawkaw arawthungpaw cciing pali te rhaw a tuk; Jeroboam nynh a popaw rhawkaw athungpaw cciing tarya te rhaw a tukru.

⁴Abijah tuh Efraim muaram a umpaw Zemaraim Mua hary apannaw khe thadyn zah, “Jeroboam te Israel hae balyn, ka bya yn ngaepya tua oh!

⁵BAWIPAW , Israel Pachia nynh Israel ram kya siapharan lang tangnaw hynh David te a ccapaw hae kalan loi byakinnaw te zungzae a pya vae hae cipaw kha na nyh khyh oh tou?

⁶Tuhzemah David ccapaw Solomon a ryalahtupaw Nebat a ccapaw Jeroboam nynh thokuh zah a bawipaw kha a dou;

⁷Rehoboam tuh dih ung zah pawte ryalaw lan cipaw nythya leite minmin tungvaw cyiru khonaw a hoi khyh lyakhe ccungkia leipaw te ccungccaleipaw hae tuh Jeroboam kalan sueluakuh hae zah Solomon ccapaw Rehoboam kha a rawse hae.

⁸“Atu nanning tuh ccungccaw na lung oh zah Jerobaom nynh nae hanlan pachia lang ae raepya oh paw sui vaetuataw hae kha na hoi oh keiccuze nanning nynh David ccapaw hae kuih kya umpaw BAWIPAW peenaw kha kae dou kho cih cite na tuaku oh.

⁹Nanning nynh BAWIPAW ranpibawi hae, Aaron ccapaw hae te Levi phin hae kha na dee oh zah ramccang hae hawte naemaw nynh ranpibawi hae kha na khangkuh khyh oh tou? Tangnua anopaw te thuasah, tuutepaw sa sari te thuasah thyaasaku lan yn cceihpaw miakaw tuh pachia athua lei hae paw kya-e ranpibawi lang a tang hae.

¹⁰Thuasalama kaening hanlan tuh, BAWIPAW hynh kae Pachia thua zah amaw kha kae vua khyh. BAWIPAW rya a lahtu lang Aaron ciihan hae kha kae hoi zah, mih rya a lahtu lang Levi phin hae kha kae hoi.

¹¹Minmin nynh BAWIPAW kalan awkhua takyhte zete takyh kya maee-ute silawnaw rae hae zah mynkhuhpaw kha a u hae, sui thyaapaw ccaboi vawlan khe nungpyapaw sanlou kha thuasah, zete takyh maeekhua a aw ccaw cite sui maeekhuatung kha thuasah a paccyn hae; BAWIPAW , kae Pachia nynh oun nawpaw kha kae cyi, thuasalama nanning nynh amaw kha na vua vae oh.

¹²Dotua oh, Pachia tuh kae kya um zah oun cciakhaetu nynh thua, Pachia ranpibawi hae tuh nanning tuknawpaw roi ccaesah khylan rhawtuknawpaw mungkae a hoi hae. Pou Israel hae, BAWIPAW , nae minpaaw hae Pachia kha dou nan oh; pawccecize na tae lan khyh oh,” a cipya hae.

¹³Judah hae kha mih nulang te a pounua lan hae paw buhkhawtu hae kha Jeroboam nynh a saw hae; amaw rhawkaw hae tuh Judah hae malang khe um hae zah buhkhawtu hae tuh mih nulang khe a um hae.

¹⁴Judah hae nynh maeleihkute he a do hae tuh, nulang malang te rhaw hae a um hae. Tetuh BAWIPAW kalan sia hae zah ranpibawi hae nynh mungkae a tu hae.

¹⁵Te Judah ccungccaw hae tuh rhawdounaw roi a saw hae. Judah hae nynh he a sia hae tuh, Pachia nynh Jeroboam te Israel balyn kha Abijah te Judah hae malang khe rhaw a shungsah hae.

¹⁶Israel hae tuh Judah hae malang te ccue hae zah, Pachia nynh Judah hae kuih kya a pya hae.

¹⁷Abijah te a rhawkaw hae nynh minmin kha tae hae zah patae a chia hae; popaw Israel ccungccaw cciing pangaw a chih hae.

¹⁸Tuhcite Israel hae tuh tuin ccyh kya rhaw a shung hae, Judah hae tuh BAWIPAW , mih minpaaw hae Pachia kha a doliaku hae keiccuze rhaw a tae hae.

¹⁹Abijah nynh Jeroboam kha deehui zah a khua hae kha a lua: Bethel khua te a khua taraw hae, Jeshanah khua te a khua taraw hae, Efron khua te a khua taraw hae kha a lua.

²⁰Abijah she lya tuh Jeroboam nynh a thungnaw kha muethui vae khyh; BAWIPAW nynh detah zah a chih.

²¹Thuasalama Abijah tuh thawzung houhouh a hoi. Zu lu haw lae pali hoi zah ccapaw lu kuin lae ning te ccanung lu haw lae taruh a saah.

²²Tuhlaepaw Abijah nynh rya a lawpaw, a ozia te a cyisahnaw tuh profeh Iddo kya-e phungpaw ccauh kya a zei hae.