Read Zotung Chin 2 SHERIANAW 14 Bible Online

2 SHERIANAW 14 - Zotung Chin bible

2 SHERIANAW 14

¹Abijah tuh a minpaaw hae ryte ih hae zah David khua kya a uu hae. A ccapaw Asa nynh amaw ccelang siapharan lang a tang. Aning she kya ram tuh kum haw lungkhu adae.

²Asa nynh BAWIPAW a Pachia muihnaw kya ahoypaw te ahmepaw kha a rae.

³Ramccang hae kya-e silawhang hae te ahangpaw hmin hae kha ccaring lah zah, zohtuh hae kha a ro hae, Asherah hae kha nge zah,

⁴Judah hae kyakhe BAWIPAW , mih minpaaw hae Pachia kha ccung lan te phungbya te kawbya kha zui lan kaw a pya hae.

⁵Judah ram e khua hae balyn kyate ahangpaw hmin hae te mynkhuhpaw unawpaw silawhang hae kha mah a vua. Aning kuihkaw kya peenaw lungkhu daenaw a um.

⁶Ram kya daenaw a um lyakhe Judah ram kya akoihkuhpaw khua hae kha a rae. BAWIPAW nynh amaw kha daenaw a pya keiccuze tuh-e ccyh lya rhawtukkunaw um khyh.

⁷Aning nynh Judah hae kha, “E khua hae hynh rae oh sih lah, khualungrua, innhangpaw, koikua te accaw hae khate koih oh sih; BAWIPAW ah Pachia kha ah ccung oh keiccuze ram tuh ahmaw kya-e nynh athua ung, aening nynh amaw kha ah ccung oh zah aning nynh aening kha teitei langte balyn daenaw oun pya,” a cipya hae. Tuhcite khua hae kha rae hae zah a kaethung hae.

⁸Asa nynh Judah phin kya-e khawriaphua lepaw te ccoi a kyngpaw rhawkaw cciing thum hoi zah, Benjamin phin kya-e khawriaphua te li a kyngpaw rhawkaw cciing ning thong sung tarya a hoi; e hae balyn tuh athungpaw rhawkaw hae nynh thua.

⁹Ethiopia ccungccaw Zerah nynh rhawkaw cciing haw, marangle za thum ryte minmin kha ccianua hae zah Mareshah kyacia a thua.

¹⁰Asa nynh amaw kha tungku khylan pounua zah Mareshah kya Zefathah accya khe tukku lan a nounuaku hae.

¹¹Asa nynh BAWIPAW , a Pachia kha ko zah, “Pou BAWIPAW , athungpaw te anyaapaw laku kya bawmnaw pya lanpaw kha nang na hanlan alaenaw um khyh. Pou BAWIPAW kae Pachia, beih oun bawmtua, pawccecize nang kha kae doliakuh zah na min te hynh-e ccungccaw patae hynh tuk lan kae ccianua hae. Pou BAWIPAW , nang tuh kae Pachia nynh na thua; ccungccaw nynh nang kha ae tae nan sah,” a ci.

¹²Tukeiccuze BAWIPAW nynh Ethiopia hae kha Asa te Judah hae malang khe tae hae zah Ethiopia hae tuh a ccue hae.

¹³Asa te a kya umpaw rhawkaw hae nynh Gerar kyacia a dee hae, Ethiopia hae tuh a hiinhypaw lu kheit san a um lei lan ciate a chih hae; pawccecize minmin tuh BAWIPAW te a rhawkaw hae malang khe ro athua hae. Judah hae nynh luadepaw uccaw patae kha a phuku hae.

¹⁴Gerar pepan umpaw khua hae balyn nynh BAWIPAW kha a ri hae keiccuze Judah hae nynh tuh-e khua hae kha a tae hae. Khua hae balyn kyakhe luadepaw uccaw patae a um keiccuze thiing hae zah a lawku hae.

¹⁵Sahiin a hoi hae paw bu kha mah tuk hae zah tuu te miaa patae te kalauh hae kha a lawku hae. Tukoute Jerusalem lang a ki hae.