Read Zotung Chin 2 SHERIANAW 15 Bible Online

2 SHERIANAW 15 - Zotung Chin bible

2 SHERIANAW 15

¹Pachia muisaw tuh Oded ccapaw Azariah tungvaw yn thua.

²Aning nynh Asa te tungku khylan cceih zah, “Pou Asa te Judah phin hae balyn te Benjamin phin hae balyn, ka bya hynh ngaetua oh: Nanning nynh BAWIPAW ryte na um lungkhu oh tuh, BAWIPAW tuh nanning ryte a um. Amaw kha na ccung oh ze, na muih cih oh, thuasalama amaw kha na vua oh zetuh, nanning kha ae vua cih oh.

³Ccyh hynhsepi cia Israel tuh Pachia ccaccing hoi khyh, ccangpahtu ranpibawi kha hoi khyh, phungbya mah hoi leite a um;

⁴thuasalama riathaenaw he a tung hae te, BAWIPAW , Israel Pachia kalan maeleihkuh hae zah he a ccung hae tuh, amaw kha a muih hae.

⁵Tuh ccyh lya tuh a poutupaw hanlan thuasah, a teetupaw hanlan thuasah khynnaw um khyh, pawccecize ram takyh kya um hae paw balyn tungvaw khe thinphangnaw te ccawku leinaw a um.

⁶Minmin tuh palae tui lan a koi hae, ram kheit te ram kheit, khua kheit te khua kheit a doukuh hae, pawccecize Pachia nynh riathaenaw phuinccing te vawsaw a pya hae.

⁷Thuasalama nanning tuh nae rawthungsakuh oh! Nae kuih kha a thawzyasah nan oh, pawccecize nae ryalaw mee na mue cih oh,” a cipya.

⁸Oded ccapaw Azariah nynh profehbya a hopaw e bya hae hynh Asa nynh he a thae tuh, a rawthungsakuh zah Judah ram, Benjamin ram te Efraim muaram kya-e a lawpaw khua hae balyn kyate anungsikuhpaw zohtuh hae kha a vua hae. BAWIPAW inn tee takawnaw khaan malang umpaw silawhang kha a raethui.

⁹Judah phin hae te Benjamin phin hae balyn kha thuasah, Efraim, Manasseh te Simeon ram hae kyate oun thua hae zah ramccang hae hawte a umbua hae paw kha thuasah a pum hae, pawccecize BAWIPAW a Pachia tuh amaw kya a um cipaw he a muih hae te, Israel ram kyate ccungccaw patae tuh amaw kalan a nuekuh hae.

¹⁰Asa nynh ram a uknaw kum haw lae pangawnaw, sawpaw sah thumnaw khe minmin kha Jerusalem kya a pum hae.

¹¹Tuin nin khe luadete a thuakhae hae paw tangnuapaw za sari te tuu thong sari khate BAWIPAW kalan silawnaw a rae hae.

¹²BAWIPAW , mih minpaaw hae Pachia kha mih thinlung balyn te, mih tuanaw balyn te ccung khylan byakinnaw lungkhu lang a tee hae.

¹³BAWIPAW , Israel Pachia kha a ccung leipaw miakaw nopi, pise, imua, piccan humhung athua zemah chia athua cih.

¹⁴Myarya ccaepaw roi te, siaruate, mungkae te saki tu biate BAWIPAW kalan thyalawkute byakinkunaw kha a rae hae.

¹⁵Judah hae balyn tuh tuh-e byakinkunaw a rae hae keiccuze mih lungpaw; pawccecize mih thinlung balyn te byakinkunaw rae hae zah mih rynaw balyn te BAWIPAW kha a ccung hae keiccuze a muih hae, te BAWIPAW nynh minmin kha teitei langte balyn daenaw a pya hae.

¹⁶Asa Siapharan a minnung Maakah nynh Asherah hanlan anungsikuhpaw zohtuh kha a raepya keiccuze Asa nynh siapharan a nung thuanaw kyate a phua. Asa nynh a zohtuh kha ngepah zah palae tui lan a roh koute Kidron Vaw pe khe maee te a soi.

¹⁷Thuasalama ahangpaw hmin hae kha Israel ram kyate vua khyh. Tuhzemah Asa thinlung tuh a she lungkhu balyn hmerarih lan a um.

¹⁸A paaw nynh byakinkute a hlupaw lasung hae te amaw nynh byakinkute a hlupaw sui, ngun te angphe hae kha BAWIPAW inn lungkhu langkhe a nung.

¹⁹Asa nynh a uknaw sung thum kum pangawnaw kum cia rhawtukkunaw um khyh.