Read Zotung Chin 2 SHERIANAW 16 Bible Online

2 SHERIANAW 16 - Zotung Chin bible

2 SHERIANAW 16

¹Asa nynh ram a uknaw sung thum kum taruhnaw kum khe Israel siapharan Baasha nynh Judah ram kha tuk lan ccianua zah, Judah siapharan Asa kalan humhung mah a pou lei nawlan te a tee lei nawlan Ramah khua kha a rae.

²Asa nynh BAWIPAW inn te siapharan inn kya-e sisuakhaan kya umpaw sui te ngun kha lah zah, Damaskas khua umpaw Siria siapharan Benhadad kalan ky zah,

³“Ka paaw te na paaw nynh a la pankheih hae hawte, kae te nang mah pankheih sih; sui te ngun hynh kae ky; Israel siapharan Baasha nynh kae hynh yn kitaw nawlan, aning te na pankheihnaw oh kha roh ccavae,” cite bya a taw.

⁴Benhadad nynh Siapharan Asa bya kha ngae zah, Israel khua hae kha tuk khylan a rhawbawi hae sawnua hae zah, Ijon, Dan, Abel-maim te Naftali ram e sisua nungnaw khua balyn kha a tae hae.

⁵Tuh-e tuh Baasha nynh he a thae te, Ramah khua a raepaw rya kha a haeungtaw.

⁶Te Siapharan Asa nynh Judah hae balyn kha cciakhae hae zah, Baasha nynh Ramah khua a raenawpaw lung hae te thing hae kha a law hae, tuh-e tuhte Siapharan Asa nynh Geba khua te Mizpah khua kha a rae.

⁷Tuh ccyh lyakhe profeh Hanani tuh Judah Siapharan Asa kalan yn thua zah, “BAWIPAW na Pachia kha doliaku leite Siria siapharan kha na doliaku keiccuze Siria siapharan a rhawkaw hae tuh na kuih kyate a lue vae hae.

⁸Ethiopia ccungccaw hae te Libia ccungccaw hae tuh marangle te marang rhawkaw patae ryte myaryamaw alungpaw rhawkaw hae thua khyh hae tou? Tuhzemah BAWIPAW kha na doliaku keiccuze aning nynh minmin kha na kuih kya ae pya.

⁹BAWIPAW nynh amaw kya mih thinlung hmerarih lan a um hae paw kha thawzung pya khylan laephi pynpi hynh marya a do. E na cyipaw hynh ngaeenaw ccaccing nynh thua; atu kyate rhaw na tuk vae cih,” a cipya.

¹⁰Tetuh Asa tuh profeh tungvaw a thinria keiccuze khii zah thong lungkhu a nung, pawccecize e kong keiccuze tuh-e paw tungvaw a bungpaw. Tuh ccyh lyakhe Asa nynh ccungccaw abang kha a tuaa a sah hae.

¹¹Asa a cyisahnaw kha atakaw te athangnaw cia Judah te Israel Siapharan hae Ccauh kya a zei hae.

¹²Asa tuh ram a uknaw sung thum kum takuanaw kum khe a ccu kya ccinaw hoi zah a ccinaw tuh myarya le; tuhcih mang a ccih pite BAWIPAW kha ccung leite, sibawi hae kha bawmnaw a ngiaku hae.

¹³Te Asa tuh a minpaaw hae ryte ih hae zah, ram a uknaw sung pali kum kheitnaw kum khe a chih.

¹⁴David khua kya amaw nynh a raekupaw shawku kya a uu hae. Mynkhuhpaw a raethya hae paw nynh a rae hae paw mynkhuhpaw aphuinphuin te phe abeihpaw taang kyakhe a isah hae; sawtuanaw pyanawpaw maee pipi kha a tua hae.