Read Zotung Chin 2 SHERIANAW 18 Bible Online

2 SHERIANAW 18 - Zotung Chin bible

2 SHERIANAW 18

¹Jehoshafat tuh myarya hoirum zah sawtuanaw a ccou; Ahab te zuvaw lang tangnaw khate puizia kyngkunaw a rae.

²Kum beihtaraw alia koute Ahab kalan Samaria khua lang a cceih. Amaw te a kya cceihbua hae paw hanlan Ahab nynh tuu te tangnuapaw patae chiapah hae zah, Ramoth-gilead kha ccianuate tuk lan a hyy.

³Israel siapharan Ahab nynh Judah siapharan Jehoshafat kha, “Ramoth-gilead lang nae cciakhae cih tou?” a cipya. Jehoshafat nynh, “Nang te kae tuh pynkheihpaw nynh ah thua; ka ccungccaw hae tuh na ccungccaw hae nynh thua hae. Rhawtuknaw kya kae pankhae cih,” a cipya.

⁴Jehoshafat nynh Israel siapharan kha, “BAWIPAW bya kha khiatua ty hin,” a cipya.

⁵Israel siapharan nynh profeh hae za pali kha pum hae zah, “Ramoth-gilead kha tuk lan kae ccianua cih tou, kae ccianua lan khyh tou?” cite khia hae zah, minmin nynh, “Ccianua; pawccecize BAWIPAW nynh siapharan nang na kuih kalan ae pya cih,” a ci hae.

⁶Thuasalama Jehoshafat nynh, “Aening nynh khia lanpaw ccangpaw BAWIPAW profeh um vae khyh tou?” a cipya.

⁷Israel siapharan nynh Jehoshafat kha, “BAWIPAW kha byakhia nawlan ccangpaw lu kheit, Imlah ccapaw Mikaiah a um ung; tuhzemah aning kha ka hua, pawccecize kae ka konglang bya hoypaw ho boi khyh, ronaw kong cci nynh a ho,” a cipya. Jehoshafat nynh, “Tuhcite siapharan nynh byaho nan,” a cipya.

⁸Te Israel siapharan nynh bawi lu kheit kha ko zah, “Imlah ccapaw Mikaiah kha arangte yn thuakhae,” a cipya.

⁹Te Israel siapharan te Judah siapharan Jehoshafat tuh mih angkiccua kikute, Samaria khua koikua teenaw malang huihmin kya umpaw bawitungkhung kya a haung hae; mih malang khe profeh balyn nynh profehbya a ho hae.

¹⁰Khenaanah ccapaw Zedekiah nynh sivaw ki hae kha raekuh zah, “BAWIPAW nynh hynhte a ho: Siria hae kha ro athua mawlaezung hae, e sivaw ki hae hynhte na thuing cih oh, a ci,” cite a ho.

¹¹Profeh balyn nynh mah tuhcite hobua hae zah, “Ramoth-gilead kha ccianua thung lah, taetua; BAWIPAW nynh siapharan nang na kuih kya ae pya cih,” a cipya hae.

¹²Mikaiah ko lan a cceihpaw locceihtupaw nynh Mikaiah kha, “Dotua, profeh hae nynh siapharan kyakhe bya hoypaw kha phe lokuh lante a hopya hae; nang nynh mah minmin hawte bya hoypaw kha hopah bua,” a cipya.

¹³Thuasalama Mikaiah nynh, “BAWIPAW tuh a hiin thyhte, ka Pachia nynh a hopaw bya kha ka ho cih,” a ci.

¹⁴Mikaiah tuh siapharan kya he a thua te, siapharan nynh, “Mikaiah, Ramoth-gilead kha tuk khylan kae ccianua cih tou, kae ccianua lan khyh tou?” a cipya. Mikaiah nynh, “Ccianua thung lah, taetua; minmin kha na kuih kya pya athua cih hae,” a cipya.

¹⁵Thuasalama siapharan nynh, “Akyhpaw bya laelan ccangpaw bya kha BAWIPAW min te nae hopya khyh nawlan, vae hohzeihmou bya kae kinsakuh cih?” a cipya.

¹⁶Mikaiah nynh, “Israel hae balyn tuh tuurin a hoi leipaw tuu hae hawte mua vawlan phiariphiarae a um hae paw kha ka muih; BAWIPAW nynh, ‘E hae tuh bawi hoi khyh hae; mimaw inn raveih lang daebabi lan ki hae sah,’ a ci,” cite a ho.

¹⁷Israel siapharan nynh Jehoshafat kha, “Aning tuh kae ka konglang hynh bya hoypaw ho boi khyh, ronaw kong cci nynh a ho, cite kae hopah khyh tou?” a cipya.

¹⁸Te Mikaiah nynh, “Tukeiccuze BAWIPAW bya hynh thaetua: BAWIPAW tuh a bawitungkhung kya haung zah, vaaw rhawkaw hae balyn tuh a voi a rang te a pe khe a thadyn hae.

¹⁹Te BAWIPAW nynh, ‘Israel siapharan Ahab tuh cceihthung zah Ramoth-gilead kya a chi nawlan, hum nynh mou a tuhou cih?’ a ci. Lu kheit nynh ccangte, ccangpaw lu kheit nynh ccangte a ho hae,

²⁰muisaw lu kheit yn thua zah BAWIPAW malang thadyn zah, ‘Kamaw ka tuhou cih,’ a ci. BAWIPAW nynh, ‘Pawtemou na tuhou cih?’ cite a khia.

²¹Aning nynh, ‘Ka cceih cih zah a profeh hae balyn munglae kyakhe ahynthyapaw muisaw lang ka tang cih,’ a ci. Te BAWIPAW nynh, ‘Aning kha na la tuhou cih, phe na tuhou kho cih; la cceih lah tuhcite la cyih,’ a cipya.

²²Tukeiccuze BAWIPAW nynh ahynthyapaw muisaw kha e na profeh hae munglae kya a nung vae; BAWIPAW nynh nang na hanlan ronaw bya a ho vae,” a cipya.

²³Tetuh Khenaanah ccapaw Zedekiah nynh Mikaiah kha ccianua zah a byaki kha bia zah, “BAWIPAW muisaw tuh nang kha bya hopya khylan ka kyate paw laanpi te mou a pou?” a cipya.

²⁴Mikaiah nynh, “Nang nynh alungkhu lang e akhaan lungkhu lang reku khylan he na tee nin khe na muih cih,” a cipya.

²⁵Israel siapharan nynh, “Mikaiah kha kyng oh lah, khua uktu Amon te siapharan ccapaw Joash kalan cciakhae oh;

²⁶te ‘Siapharan nynh hynhte a ho: E ccungccaw hynh thonginn kya nung oh, daenaw te kae thua mawlaezung tui te looh beihtaraw kyalya la pya oh, a ci,’ cite la hopah oh,” a cipya hae.

²⁷Mikaiah nynh, “Daenaw te bua nae ki zetuh, BAWIPAW nynh ka kyate bya a ho khyhpaw nynh athua cih. Pou ccungccaw hae, nae balynte thaetua oh!” a ci.

²⁸Israel siapharan te Judah siapharan Jehoshafat tuh Ramoth-gilead khua lang rhawtuk lan a cceih hae.

²⁹Israel siapharan nynh Jehoshafat kha, “Ka muinsan rulaekute rhawtuknaw lang ka cceihbua cih, thuasalama nang tuh na angkiccua kha kikuh,” a cipya. Tuhcite Israel siapharan tuh a muinsan rulaekuh zah rhawtuknaw lang a cceih.

³⁰Siria siapharan nynh a marangle rhawbawi hae sung thum lu ning kha, “Ccangpaw ccungccaw adihpaw thuasah, alepaw thuasah tuk leite, Israel siapharan kyalya kha tuk oh,” cite kaw a pya hae.

³¹Marangle rhawbawi hae nynh Jehoshafat kha he a muih hae te, “Aning hynh Israel siapharan nynh thua,” a ci hae. Tukeiccuze aning kha tuk khylan a maenuaku hae; te Jehoshafat nynh sia zah BAWIPAW nynh a bawm. Pachia nynh minmin kha amaw kyate ccanglang a cciasah hae,

³²pawccecize Israel siapharan thua khyh cipaw kha marangle rhawbawi hae nynh he a nyh hae te, amaw kha deehui vae leite a kitaw hae.

³³Lukheitpaw nynh ee tutae leite a li te kaw huataw zah Israel siapharan kha a rhawtuk-uccaw te a bykhaw laku khe a tungsah; tukeiccuze a marangle a mawngtupaw kha, “Vaemaw phe ka mue, tukeiccuze maeleihkuh lah, rhawtuknaw kyate yn poukhae,” a cipya.

³⁴Tuin nin tuh thawte rhaw a tukkuh hae, Israel siapharan tuh a marangle lungkhu khe ngeikuh zah Siria hae kalan khe zete cia a hawi; te khuanin ccaw ccyh khe a chih.