Read Zotung Chin 2 SHERIANAW 19 Bible Online

2 SHERIANAW 19 - Zotung Chin bible

2 SHERIANAW 19

¹Judah siapharan Jehoshafat tuh Jerusalem umpaw a inn lang khyndadyh lan a ki.

²Hanani ccapaw profeh Jehu tuh Siapharan Jehoshafat te tungku khylan cceih zah amaw kha, “Nang nynh ccungccaw hoylei hae paw kha bawm te BAWIPAW a huatu hae kha na sungsah cih hae tou? E keiccuze, BAWIPAW thinrianaw tuh na tungvaw accah vae.

³Tuhzemah Asherah hae kha ram lungkhu te na vua hae zah na thinlung te Pachia ccung lan na zuaku keiccuze na tungvaw kya hoynaw abang kha muih athua,” a cipya.

⁴Jehoshafat tuh Jerusalem kya khua a sah; te Beersheba kyate Efraim muaram kyacia ccungccaw hae kalan cceih zah mih minpaaw hae Pachia, BAWIPAW kalan bua a kikhae hae.

⁵Judah ram e akoihkuhpaw khua hae miakaw kya, khua takyh kyakhe byapiatu hae kha nung hae zah,

⁶byapiatu hae kyakhe, “Na cyi oh paw kha hoyte tuabia oh, pawccecize bya na pia oh paw kha ccungccaw ccelang thua leite BAWIPAW ccelang bya na pia oh paw nynh thua; bya na pianaw oh kyakhe aning tuh nae kya a um.

⁷Tukeiccuze BAWIPAW raw kha rih oh; na cyi oh paw kha raeringkuh oh, pawccecize BAWIPAW , aening Pachia kya tuh ahme lei lante byapianaw, mirymihuaponaw, pyaruh lawkunaw um khyh,” a cipya hae.

⁸Tuhpiaze Jerusalem kyakhe BAWIPAW elang byapia khylan te byalungnaw kha byapia khylan, Jehoshafat nynh Levi phin hae, ranpibawi hae te Israel phin hae kya-e lu hae kha a khang hae. Minmin tuh Jerusalem kya a um hae.

⁹Aning nynh kawpya hae zah, “Hynhte rya na lah cih oh: BAWIPAW rawri te, lungzinaw te, nae thinlung balyn te rya na lah cih oh;

¹⁰Mimaw khua kya um hae paw nae uno hae nynh chiise luanaw kong thuasah, phungbya, kawbya, phunglang, phungzae hae kong thuasah nae kalan byathan oun thuakhae hae ze, minmin nynh BAWIPAW malang cyiseipaw seinaw a hoi khyh nawlan hae te naemaw te nae uno hae tungvaw kya thinrianaw a um khyh nawlan minmin kha na ccangpah cih oh. Tuhte na cyi oh ze cyiseipaw seinaw kha na hoi lan khyh oh.

¹¹BAWIPAW ryalaw miakaw kya ranpibawi Amariah tuh nanning uktu lang a um; Judah siapharan ryalaw miakaw kya Judah phin uktu bawi Zebadiah, Ishmael ccapaw tuh nanning uktu lang a um; Levi phin hae nynh bawi hae lante rya ae lawpah cih oh. Rawthungte ryalah oh, BAWIPAW tuh ccungccaw hoy hae paw kya um vae sah!” a ci.