Read Zotung Chin 2 SHERIANAW 2 Bible Online

2 SHERIANAW 2 - Zotung Chin bible

2 SHERIANAW 2

¹Solomon nynh BAWIPAW min hanlan beikinn sak lan te amaw hanlan siapharan inn sak lan a paccynku.

²Solomon nynh uccaw phutu lang ccungccaw thong sung sari, muaram kya lung-awtu lang thong sung tarya, tuh-e hae a dopahtu lang thong thum za taruh kha a synria hae.

³Solomon nynh Tair siapharan Huram kha byataw zah: “Ka paaw David te na la ccuepekuh oh zah a umnaw lanpaw inn a sakku nawlan sidar thing na la pya hawte kae mah beih yn pyabua.

⁴BAWIPAW ka Pachia min hanlan inn sak lan atu ka paccynkuh; tuh-e inn tuh Israel hae nynh zungzae cyi lante kawpya athua hawte, Pachia malang mynkhuhpaw kha maee-u nawlan thuasah, nungpyapaw sanlou kha tyty pya nawlan thuasah, awkhua te zete, sabbath nin hae te sawpaw sah thawpaw nin, te BAWIPAW ah Pachia kya-e accyh khyapaw poi nin hae kya maee-ute silawnaw rae nawlan thuasah amaw kalan ap lanpaw nynh thua.

⁵Ka Pachia tuh ccangpaw pachia hae laeze a lesaehua keiccuze ka sak cih paw inn tuh ale cih.

⁶Thuasalama vaawlang, ahang huaccepaw vaawlang nynh heize amaw kha accawng khyh keiccuze, hum nynh mou inn kha a sakpah kho cih? Amaw malang silawnaw raepyanawpaw inn laelan, ccangpaw inn kha sakpya lan ciate kae tuh hummou ka thua?

⁷Tukeiccuze atu ka paaw David nynh la bawm hae zah Judah ram te Jerusalem kya kamaw kya umpaw mih kuihhae hoy hae paw ryte ryalawkheih khylan, sui, ngun, sohin, sivaw, sephaphuhpaw boei, asepaw boei te meizong boei ryalawnaw kya a kuihhae hoypaw, karynte ccaw mah a zeithyapaw lu kheit kha ka kalan yn sawpah.

⁸Sidar thing, maeccaw thing te algum thing kha mah Lebanon kyate yn ky, pawccecize na ryalahtu hae nynh Lebanon e thing a awthya hae cipaw ka ny. Ka ryalahtu hae tuh na ryalahtu hae ryte

⁹thing a-awkuhpaw patae kha yn paccynpah cih hae, pawccecize ka sak cih paw inn tuh myarya le zah ngaeangthua lan umpaw inn athua cih.

¹⁰Thing-awtu hae na ryalahtu hae kha chanvuih ccangphaw kor thong kuin, barli kor thong kuin, misutui bath thong kuin te chitui bath thong kuin kha ka pya cih hae,” a cipya.

¹¹Tetuh Tair siapharan Huram nynh Solomon kha ccaw te leih zah, “BAWIPAW nynh a ccungccaw hae kha a sungsah hae keiccuze nang kha siapharan lang ae khang,” a cipya.

¹²Huram nynh, “BAWIPAW elang beikinn te amaw elang siapharan inn saknaw hanlan tuathyanaw te nythyanaw a hoipaw ccapaw kha David siapharan a pyatu, vaaw te lae a raetu BAWIPAW , Israel Pachia tuh thehoyte um sah.

¹³“Atu kya nythyanaw hoi zah a kuihhae hoypaw Huram-abi hynh kae ky,

¹⁴aning tuh Dan phin nopinung lu kheit ccapaw thua zah, a paaw tuh Tair ccungccaw nynh thua. Aning tuh sui, ngun, sohin, sivaw, lung, thing, sephaphuhpaw boei, meizong boei, asepaw boei te nebaleihpaw laaw te kuakuhpaw boei rya kha law khylan a ccangkuhpaw thua zah, karynte ccawzeipaw rya aphuinphuin balyn te muinsan raenaw miakaw kyakhe na ccungccaw hae kuihhae hoy hae paw, na paaw David ka bawipaw ccungccaw hae kuihhae hoy hae paw ryte rya a lahkheih cih hae.

¹⁵Tukeiccuze ka bawipaw nynh na ho thyhte chanvuih, barli, chitui te misutui hae tuh na ryalahtu hae hynh la ky hae.

¹⁶Kaening nynh na pekipaw thing miakaw kha Lebanon kya kae ngepah cih zah rili kyate Joppa khua lang phum te kae thah cih zah nang nynh Jerusalem khua lang na la phu cih,” a cipya.

¹⁷A paaw David nynh Israel ram kya umpaw ramccang hae balyn kha milu ccazing a lah koute Solomon nynh ccazing lah zah, cciing kheit sung pangaw thong thum za taruh a um hae.

¹⁸Minmin laku e thong sung sari kha uccaw phutu lang, thong sung tarya kha muaram kya lung-awtu lang, thong thum za taruh kha ryalaw dopahtu lang a nung hae.