Read Zotung Chin 2 SHERIANAW 21 Bible Online

2 SHERIANAW 21 - Zotung Chin bible

2 SHERIANAW 21

¹Jehoshafat tuh a minpaaw hae ryte ih hae zah David khua khe a minpaaw hae ryte a uu hae; a ccapaw Jehoram tuh amaw ccelang siapharan lang a tang.

²Jehoshafat ccapaw Jehoram a uno hae tuh: Azariah, Jehiel, Zekhariah, Azariah, Mikhael te Shefatiah nynh thua hae; e hae balyn tuh Judah siapharan Jehoshafat ccapaw hae nynh thua.

³Mih paaw nynh minmin kha lasung patae, sui, ngun te amee rupaw uccaw hae te Judah ram e koihpaw khua hae kha a pya hae; thuasalama peenaw kha tuh Jehoram kha a pya, pawccecize aning tuh ccatawccaw nynh thua.

⁴Jehoram nynh a paaw bawitungkhung kya kae zah a uknaw he a tynsah te, a uno hae balyn te Israel bawi hae abang kha thaloi te a chia hae.

⁵Jehoram tuh sung thum kum ning acih te ram kha uk takaw zah, Jerusalem kya kum tarya a uk.

⁶Ahab ccanung kha zu lang a hoiku keiccuze Ahab ciihan nynh a la cyi hawte, Israel siapharan hae laanpi kha a zui. BAWIPAW muihnaw kya hoyleinaw kha a rae.

⁷Tuhzemah David te a ciihan hae kha maeeinn zungzae kae pya cih oh cite BAWIPAW nynh byakinkuh zah David ryte a la raepaw byakinnaw keiccuze aning nynh David ciihan kha roh khyh.

⁸Jehoram she lyakhe Edom hae nynh Judah uknaw kha rawse hae zah mimaw nynh siapharan kha a khangku hae.

⁹Tetuh Jehoram tuh a rhawbawi hae te a marangle hae balyn ryte rhawtuk lan a cceih hae. Khuazi khe thokuh zah amaw te a marangle rhawbawi hae a koihlu hae paw Edom hae kha a tuk hae.

¹⁰Tukeiccuze Edom hae nynh Judah uknaw kha atunin cia a dou hae. Tuh ccyh lyakhe, BAWIPAW , a minpaaw hae Pachia kha a vua keiccuze Libnah khua nynh mah Jehoram uknaw kha a dou.

¹¹Tuhpiaze Judah muaram hae kyakhe ahangpaw hmin hae kha rae zah, Jerusalem khuaccaaw hae kha lungzi leinaw kalan cciakhae hae zah Judah hae kha a cciasah sei hae.

¹²Profeh Elijah kyate Jehoram kalan ccaw yn thua zah: “BAWIPAW , na paaw David Pachia nynh hynhte a ho: Nang nynh na paaw Jehoshafat laanpi te Judah siapharan Asa laanpi kha na zui khyh,

¹³Israel siapharan hae laanpi kha na zui zah, Ahab ciihan nynh Israel kha lungzi leinaw kalan a cciakhae hawte, Judah hae te Jerusalem khuaccaaw hae kha lungzi leinaw kalan na cciakhae hae zah, namaw laeze ahoyhua hae paw na paaw ciihan hae, na uno hae kha na chia hae keiccuze,

¹⁴dotua, na ccungccaw hae, na ccaaw hae, na zu hae te na hoipaw uccaw balyn tungvaw khe BAWIPAW nynh myarya lepaw shethya a thuasah cih,

¹⁵nang tuh myarya ccihpaw vue ccinaw na hoi cih zah, tuh-e ccinaw keiccuze na ring tuh nin kheit laeze nin kheit houhouh a pou cih, a ci,” cite a hopya.

¹⁶BAWIPAW nynh Jehoram kha rawsete Ethiopia hae te a naekuh hae paw Arab hae te Filistin hae kha mih thin a riasah hae.

¹⁷Minmin nynh Judah ram kha ccianua thung hae zah a thiing hae, siapharan inn kya a muih hae paw uccaw balyn te siapharan a zu a ccaaw hae kha, a ccasoipaw Jehoahaz laelan, lu kheit san a laehy lei lan a cciakhae hae.

¹⁸E hae balyn koute BAWIPAW nynh Jehoram vue kha a dan kho leipaw ccinaw khate a ccisah.

¹⁹Kum ning koute tuh-e ccinaw keiccuze a ring tuh toikuh zah a pynsaw myarya ccih lante a chih. A minpaaw hae hanlan maeephupi leih a la tuapya hae hawte, a ccungccaw hae nynh amaw kha sawtuanaw pyate maeephupi tuapah khyh hae.

²⁰Jehoram tuh sung thum kum ning acih te, ram kha uk takaw zah, Jerusalem khua kya kum tarya a uk. A chi lya tuh humhung mah a ngaethah khyh. David khua kya a uu hae, thuasalama siapharan hae shawku kya uh khyh hae.