Read Zotung Chin 2 SHERIANAW 22 Bible Online

2 SHERIANAW 22 - Zotung Chin bible

2 SHERIANAW 22

¹Jerusalem khuaccaaw hae nynh asoi huaccepaw a ccapaw Ahaziah kha amaw ccelang siapharan lang a khang hae; pawccecize Arab hae ryte ryahmin lang oun cceih hae paw rhawkaw hae nynh atawccaw huapaw a ccapaw hae balyn kha a chia vae hae. Tukeiccuze Jehoram ccapaw Ahaziah nynh Judah siapharan lang a tang vae.

²Ahaziah nynh sung pali kum ning he acih te, ram kha uk takaw zah, Jerusalem kya kum kheit a uk. A nung min tuh Athaliah cikuh zah, Omri a mintanung nynh thua.

³A nung tuh ahoy leipaw rae lan tuanaw a pyatu athua keiccuze Ahaziah tuh Ahab ciihan nynh a zuipaw laanpi kha a zuibua.

⁴Ahab ciihan nynh a la cyi hawte, aning nynh BAWIPAW muihnaw kya hoyleinaw kha a rae; pawccecize a paaw a chih koute Ahab innbyn hae tuh Ahaziah a ronaw lang tuanaw a pyatu hae nynh thua.

⁵Minmin nynh tuanaw a pya hae paw kha aning nynh zui zah, Siria siapharan Hazael kha tuk khylan Israel siapharan Ahab ccapaw Jehoram ryte Ramoth-gilead lang a cceih hae. Siria hae nynh Joram kha vaemaw a muesah hae,

⁶Siria siapharan Hazael kha a tuk lyaze, Ramah kya a muepaw vaemaw kha dansaku khylan Jezreel khua lang a ki. Jezreel khua kya umpaw Ahab ccapaw Joram tuh a cci keiccuze via khylan Judah siapharan Jehoram ccapaw Ahaziah tuh a cceihbung.

⁷Ahaziah nynh Joram via lan a la cciapaw tuh Pachia nynh Ahaziah a ccaw nawlan a la paccynpaw nynh thua. Pawccecize Ahaziah tuh tuin kya he a thua te, Joram ryte pou hae zah BAWIPAW nynh Ahab innbyn a rohtu lang chitui a thuhpaw Nimshi, Jehu ccapaw te a tungkuh hae.

⁸Jehu nynh Ahab innbyn kha bya he a pia tuh, Ahaziah a do-oihtu hae Judah bawi hae te Ahaziah uno hae mih ccapaw hae ryte tungkuh hae zah minmin kha a chia hae.

⁹Ahaziah kha ccung zah Samaria kya a reku lyakhe a kyng hae, te Jehu kalan cciakhae hae zah a chia hae. Amaw kha a uu hae, pawccecize minmin nynh, “Aning tuh BAWIPAW kha a thinlung balyn te a ccungpaw Jehoshafat ccapaw nynh thua,” a ci hae. Te Ahaziah innbyn kya ram a uk kho lanpaw lu kheit san um khyh.

¹⁰Ahaziah nung Athaliah nynh a ccapaw a chipaw kha he a nyh tuh, thokuh zah siapharan innbyn hae balyn kha a chia hae.

¹¹Thuasalama siapharan ccanung Jehoshabeath nynh Ahaziah ccapaw Joash kha lah zah chia athua vae cih hae paw siapharan ccapaw hae kyate zya ruh zah amaw te a do-oihtu kha inaw khaan kya a nung hae. Tuhcite Siapharan Jehoram ccanung, ranpibawi Jehoiada zu Jehoshabeath tuh Ahaziah ccianung athua keiccuze Athaliah nynh Joash kha a chia khyh nawlan zya a thuruh;

¹²Athaliah nynh ram a uk lya, kum taruh lungkhu Joash tuh Pachia inn kya thuruh hae zah minmin ryte a um hae.