Read Zotung Chin 2 SHERIANAW 23 Bible Online

2 SHERIANAW 23 - Zotung Chin bible

2 SHERIANAW 23

¹Thuasalama kum sarinaw kum khe, Jehoiada tuh a rawthungsakuh zah, aza uktu rhawbawi hae, Jehoram ccapaw Azariah, Jehohanan ccapaw Ishmael, Obed ccapaw Azariah, Adaiah ccapaw Maaseiah te Zikhri ccapaw Elishafat ryte byakinkunaw a rae hae.

²Judah ram po lekuh lan cceih hae zah Judah khua miakaw kya-e Levi phin hae te Israel innbyn hae raveih kya-e lu hae kha pum hae zah Jerusalem lang a cceih hae.

³Te a pumkuh hae paw balyn nynh siapharan ryte Pachia inn kyakhe byakinnaw a rae hae. Jehoiada nynh minmin kha, “Hein kya siapharan ccapaw a um! BAWIPAW nynh David ccapaw hae te asekuh lante bya a kinku vae hawte, aning nynh uk sah.

⁴Hynhte na cyih cih oh: sabbath nin kya rya na hoi oh paw ranpibawi hae te Levi phin hae pum thum pum kheit tuh sakoih ngawtu na thua cih oh,

⁵pum thum pum kheit tuh siapharan inn kya na um cih oh zah, pum thum pum kheit tuh Aleihpaw Sakoih kya na um cih oh; te ccungccaw balyn tuh BAWIPAW inn voidu lungkhu na um cih oh.

⁶Ranpibawi hae te ryalahpaw Levi phin hae laelan, humhung mah BAWIPAW inn lungkhu lang tee nan sah; minmin tuh a thyaa hae keiccuze a tee kho cih hae, thuasalama ccangpaw ccungccaw balyn nynh BAWIPAW kaw kha a ngae cih hae.

⁷Levi phin hae tuh mih zunghe kha ccarou ccyngkute siapharan kha a koihlu cih hae; inn lungkhu lang a teepaw miakaw tuh chia athua cih. Siapharan nynh a pou a tee vae ze, amaw kya na um cih oh,” a cipya hae.

⁸Ranpibawi Jehoiada nynh kaw a pya hae thyhte Levi phin hae te Judah hae balyn nynh marya a cyi hae; minmin lu kheit cci nynh sabbath nin kya rya a hoi cih lei hae paw mih ccungccaw hae te sabbath nin kya rya a hoi cih hae paw mih ccungccaw hae kha a cciakhae hae; pawccecize Jehoiada nynh rya a nee hae paw aphu hae kha roh khyh.

⁹Pachia inn kya umpaw, David Siapharan kya-e ccoi hae te khawriaphua adihpaw te alepaw hae kha ranpibawi Jehoiada nynh rhawbawi hae kha a pya hae;

¹⁰mih kuih kya zunghe ccarou a ccyngkuh hae paw ccungccaw hae balyn kha siapharan rhawviatu hae lang, inn alia langte inn thahlang cia, inn kya-e silawhang po voilu lan a nung hae.

¹¹Te Jehoiada nynh siapharan ccapaw kha yn poukhae zah bawilukhung khungsah zah byakinnaw ccauh kha a pya; siapharan lang khang hae zah Jehoiada te a ccapaw hae nynh chitui thuh hae zah, “Siapharan tuh a hiinshe sae vae sah!” cite a sia hae.

¹²Ccungccaw hae nynh ccue hae zah siapharan a thehoysah hae paw roi accaepaw kha Athaliah nynh he a thae tuh, BAWIPAW inn lungkhu lang ccungccaw hae kalan a tee;

¹³he a do tuh, siapharan tuh teenaw kya a tungpi pe thadyn zah, rhawbawi hae te mungkae tu hae paw tuh siapharan pe um hae zah, ram lungkhu e ccungccaw balyn tuh lungpawte mungkae tu hae zah, hlawsahthya hae paw nynh khuakupaw mih uccaw hae khate lungtuanaw poi a tua hae paw kha a muih. Athaliah nynh a boeining kha seii zah, “Dounaw nynh thua! Dounaw nynh thua!” cite a sia.

¹⁴Rhawkaw hae uktu lang khang athua hae paw rhawbawi hae kha ranpibawi Jehoiada nynh poukhae hae zah minmin kyakhe, “Aning hynh rhawkaw hae laku kyate poukhae oh; amaw a zuipaw miakaw kha thaloi te theih oh,” a cipya hae. Pawccecize ranpibawi nynh, “BAWIPAW inn lungkhu kya amaw kha theih nan oh,” a ci.

¹⁵Tukeiccuze minmin nynh a kyng hae; te siapharan inn Marang Sakoih teenaw kya tee zah, tuin kya a chia hae.

¹⁶Jehoiada nynh minmin tuh BAWIPAW ccungccaw athua nawlan hae, amaw te ccungccaw zapi hae balyn te siapharan laku kya byakinnaw kha a rae.

¹⁷Te ccungccaw hae balyn tuh Baal beikinn lang cceih hae zah a ro hae; a silawhang hae, a zohtuh hae kha khaleih koi hae zah Baal ranpibawi Mattan kha silawhang hae malang khe a chia hae.

¹⁸David nynh BAWIPAW inn a do-oihtu lang rya a la naw hae paw Levi phin ranpibawi hae kha Jehoiada nynh BAWIPAW inn a do-oihtu lang a nung hae; David nynh kaw a pya hae thyhte minmin nynh lungpawte hlawsahpaw rya kha a lah cih hae zah, Moses phungbya kya azeiku hawte, BAWIPAW kalan maee-ute silawnaw kha a rae cih hae.

¹⁹Thyaa leinaw hankhakheit a hoipaw miakaw nynh a tee khyh nawlan, BAWIPAW inn sakoih kyakhe sakoih ngawtu hae kha a nung hae.

²⁰Rhawbawi hae, bawi hae, ccungccaw uktu hae te ram lungkhu e ccungccaw balyn kha ko hae zah, minmin nynh siapharan kha BAWIPAW inn kyate cciakhae bung hae zah, siapharan inn thahlang sakoih kyate a tee hae. Minmin nynh siapharan kha bawilukhung a khungsah hae.

²¹Tukeiccuze ram lungkhu e ccungccaw balyn tuh mih lungpaw; Athaliah kha thaloi te a theih kou hae te, khua tuh daebabi lan a um vae.