Read Zotung Chin 2 SHERIANAW 24 Bible Online

2 SHERIANAW 24 - Zotung Chin bible

2 SHERIANAW 24

¹Joash tuh kum sari acih te, ram kha uk takaw zah, Jerusalem khua kya kum sung pali a uk. A nung min tuh Zibiah cikuh zah Beersheba khuanung nynh thua.

²Ranpibawi Jehoiada she lungkhu balyn tuh Joash nynh BAWIPAW muihnaw kya ahmepaw kha a cyi.

³Jehoiada nynh zu zuning hoipah zah ccapaw hae te ccanung hae kha a saah.

⁴Ccyh sosoh koute Joash nynh BAWIPAW inn kha cyithui lan a paccynku.

⁵Aning nynh ranpibawi hae te Levi phin hae kha pum hae zah, “Judah ram e khua hae kalan la cceih oh lah, BAWIPAW inn cyithui nawlan Israel hae balyn kya-e phua kha kum kheit vae kheit la khoi oh; arangte ryalah oh,” a cipya hae. Thuasalama Levi phin hae nynh arangte ryalah khyh hae.

⁶Tukeiccuze siapharan nynh lupi huapaw Jehoiada kha ko zah, “Byakinnaw bu hanlan BAWIPAW ryalahtu Moses liate Israel ccungccaw zapi hae nynh a pya hae paw ngunto hawte, Levi phin hae nynh Judah ram te Jerusalem khuaccaaw hae kya-e phua kha a thuakhae nawlan hae pawccemou na naw khyh hae?” a cipya.

⁷Pawccecize ccungccaw hoyleinung Athaliah ccaaw hae nynh Pachia inn kha roh hae zah BAWIPAW inn kya-e hlupaw uccaw hae balyn kha Baal pachia hae elang a mang hae.

⁸Tuhcite siapharan nynh kawtho zah, minmin nynh thingkua ccangkheit rae hae zah BAWIPAW inn e sakoih atolang khe a nung hae.

⁹Pachia ryalahtu Moses nynh ramkaw kya Israel hae kya a la khoipaw ngunto thyhte, BAWIPAW hanlan nae thuakhae cih oh cite Judah ram te Jerusalem khua kya a thaesah hae.

¹⁰Cciakhaetu hae balyn te ccungccaw hae balyn tuh mih lungpaw zah mih ngunto kha ccyng hae zah thingkua abia mawlaezung a sang hae.

¹¹Levi phin hae nynh thingkua kha siapharan kuihkaw e bawi kalan a cciakhae takyh hae te, a lungkhu kya phua patae a umpaw he a muih hae ze, siapharan a ryaccinkhanpaw te ranpibawi lepaw kya-e bawi tuh leih oun cceih hae zah phua kha a lah kou hae te, thingkua kha amaw umnaw hmin kya bua a nung hae. Tuhcite nin takyh cyih hae zah phua kha patae a ccakhung hae.

¹²Siapharan te Jehoiada nynh BAWIPAW inn rya a lahtu hae kalan a pya hae, minmin nynh BAWIPAW inn cyithui khylan pazan thya hae paw, lehccama hae kha a hoh hae, te BAWIPAW inn cyithui khylan sivaw te sohin kya ryalah hae paw kha mah a hoh hae.

¹³Tuhcite ryalaw lan a naw hae paw nynh rya kha lah hae zah, inn cyithuipaw rya tuh a cceihthya, te Pachia inn tuh amaw mamin lang cyihthui hae zah a tynsah hae.

¹⁴A thangsah hae te, alaepaw phua tuh siapharan te Jehoiada kalan a cciakhae hae, tuh-e phua tuhte BAWIPAW inn hanlan angphe hae, beiknaw lanpaw te silawnaw lanpaw angphe hae, angsaw hae, sui angphe hae te ngun angphe hae kha a rae hae. Jehoiada a she lungkhu balyn tuh BAWIPAW inn kya maee-ute silawnaw kha tyty a rae hae.

¹⁵Jehoiada tuh taw vae zah a she dianaw thua vae zah a chih; aning tuh kum za kheit sung thum acih te a chih.

¹⁶Aning tuh Israel hae kya thuasah, Pachia hanlan te a inn hanlan thuasah rya hoypaw a law keiccuze David khua kya siapharan hae kyakhe a uubua hae.

¹⁷Jehoiada a chih koute Judah ram e bawi hae tuh oun thua hae zah siapharan kha sawtuanaw a pya hae; te siapharan nynh mih bya kha a ngae.

¹⁸Minmin nynh BAWIPAW inn, mih minpaaw hae Pachia kha vua hae zah Asherah te zohtuh hae kha rya a lawpya hae. E mih cyiseinaw keiccuze Judah ram te Jerusalem tungvaw kya BAWIPAW thinrianaw accah.

¹⁹Minmin kha BAWIPAW kalan kikhae khylan profeh hae kha a sawpya hae; tuh-e profeh hae nynh minmin kha rawsete ccaekia a khan hae zemah ngae khyh hae.

²⁰Te Pachia muisaw nynh ranpibawi Jehoiada ccapaw Zekhariah kha a thuanua; aning nynh ccungccaw hae laeze ahangnaw khe thadyn zah, “Pachia nynh hynhte a ho: Nanning nynh nae laan nae sui a ua lei lan, pawccemou BAWIPAW kawbya kha na zui khyh oh? BAWIPAW kha na vua oh keiccuze aning nynh mah nanning kha ae vua oh,” a cipya hae.

²¹Minmin nynh amaw kha phee hae zah, siapharan kaw te BAWIPAW inn voidu lungkhu khe lung te phe chih lan a deih hae.

²²Zekhariah a paaw Jehoiada nynh Joash tungvaw kya thawccinaw a la hoipaw kha Siapharan Joash nynh liathui leite a ccapaw kha a chia. Zekhariah nynh a chi dyn khe, “BAWIPAW nynh muih sah lah, phulah vae sah!” a ci.

²³Kum athang khe Siria rhawkaw hae nynh Joash kha oun ccianua thung hae. Judah ram te Jerusalem khua thua hae zah ccungccaw zapi hae laku kya-e mih bawi hae balyn kha roh hae zah luadepaw uccaw balyn kha Damaskas siapharan kalan a ky hae.

²⁴Siria rhawkaw hae tuh milu beihtaraw te oun ccia hae zemah, BAWIPAW nynh myarya lungpaw Judah rhawkaw hae kha mih kuih kalan a pya hae, pawccecize minmin nynh BAWIPAW mih minpaaw hae Pachia kha a vua vae hae.

²⁵Rhaw hae nynh he a kitaw hae te, Joash tuh vaemaw myarya ccih lante a kitaw hae, ranpibawi Jehoiada ccapaw chiise kha a luasah keiccuze a ryalahtu hae nynh phee hae zah a ikhung vawlan khe a chia hae. Tuhcite chih zah David khua kya a uu hae, thuasalama siapharan hae shawku kya uh khyh hae.

²⁶Amaw a pheetu hae tuh Ammon minphuinpaw Shimeath ccapaw Zabad te Moab minphuinpaw Shimrith ccapaw Jehozabad nynh thua hae.

²⁷Joash ccapaw hae konglang te amaw rawsete hopaw bya patae te Pachia inn sakthuinaw kong kha Siapharan hae Ccauh Ccaesahnaw ccauh kya a zei hae. Te a ccapaw Amaziah nynh amaw ccelang siapharan lang a tang.