Read Zotung Chin 2 SHERIANAW 25 Bible Online

2 SHERIANAW 25 - Zotung Chin bible

2 SHERIANAW 25

¹Amaziah tuh kum kuin lae pangaw acih te, ram kha uk takaw zah, Jerusalem khua kya kum kuin lae takua a uk. A nung min tuh Jehoaddan cikuh zah Jerusalem khuanung nynh thua.

²Aning nynh BAWIPAW muihnaw kya ahmepaw kha a cyi, tuhzemah ahmepaw thinlung tetuh thua khyh.

³Siapharan kawhoinaw kha a kuih kya tynkaring lan he a um takaw te, a paaw, siapharan a la theihtu hae a ryalahtu hae kha a chia hae.

⁴Thuasalama Moses phungbya ccauh kyaze, “Ccaaw hae ccelang nungpaaw hae kha chia thua lan khyh hae, nungpaaw hae ccelang ccaaw hae kha chia thua lan khyh hae; mimaw seinaw hanlan rou nynh chia athua cih hae,” cite BAWIPAW nynh kaw a pya thyhte, a theihtu hae paw mih ccaaw hae kha tuh theih khyh hae.

⁵Amaziah nynh Judah ccungccaw hae kha pum hae zah Judah phin te Benjamin phin hae hanlan ccungccaw athong uktu hae te aza uktu hae kha mih puizia raveih kya a nung hae. Kum kuin te palung lang kha pum hae zah ccoi te khawriaphua a ccyngkuh kho hae paw, rhaw a tuk kho vae paw popaw rhawkaw hae tuh cciing thum a um hae.

⁶Israel ram e athungpaw rhawkaw cciing kheit kha mah ngun talent za kheit te a hoh hae.

⁷Thuasalama Pachia ccungccapaw tuh a kalan yn thua zah, “Pou siapharan, Israel rhawkaw hae kha na kya cciasah bua nan hae, pawccecize BAWIPAW tuh Israel hae—e Efraim hae balyn kya um khyh.

⁸Na cceih zah rhawtuknaw kya na thungsaku zemah, Pachia nynh rhaw hae malang khe ae khulia cih; pawccecize Pachia tuh bawm khonaw te vua khonaw thungnaw a hoi,” a cipya.

⁹Amaziah nynh Pachia ccungccapaw kha, “Israel rhawkaw hae kalan ka pya vae hae paw talent za kheit kong hynh pawtemou ka cyih vae cih?” a cipya. Pachia ccungccapaw nynh, “E laeze patae alung lan BAWIPAW nynh nang kha ae pya kho,” cite a khung.

¹⁰Efraim ram kyate amaw kalan oun thua hae paw rhawkaw hae kha mih inn lang kisah khylan Amaziah nynh a saw hae. Tukeiccuze Judah hae tungvaw myarya mih thinria zah thin-ute mih inn lang a ki hae.

¹¹Amaziah nynh a rawthungsakuh zah a ccungccaw hae kha a cciakhae hae; Loi Accya langkhe cceih hae zah Seir ccungccaw hae thong haw kha a chia hae.

¹²Judah hae nynh ccangpaw ccungccaw thong haw kha ahiinte kyng hae zah Sela khua e chia dung langkhe a cciakhae hae, te chia dung kyate vuabung hae zah mih balynte zoihtatyh lan pong tui hae.

¹³Thuasalama Amaziah nynh rhawtuknaw lang amaw kya cciasah bua leite a kisah hae paw rhawkaw hae nynh Judah ram e khua hae kha Samaria kyate Beth-horon kyacia a tuk hae; tuin kya umpaw ccungccaw thong thum kha theih hae zah luadepaw uccaw patae kha a lawku hae.

¹⁴Amaziah tuh Edom hae a chianaw hae kyate he yn ki te, Seir ccungccaw hae kya-e pachia hae kha yn phukuh zah a pachia lang a nungku hae, te mynkhuhpaw upyate a beik hae.

¹⁵BAWIPAW tuh Amaziah tungvaw a thinria zah profeh lu kheit a sawnua, tuh-e profeh nynh, “Mih ccungccaw hae kha na kuih kyate a luesah kho lei hae paw, ccangpaw minphuin hae pachia hae kha pawccemou na beik hae?” a cipya.

¹⁶Thuasalama bya a ho cciamang lyakhe siapharan nynh, “Nang hynh siapharan tuanaw a pyatu lang kae nung tou? Zya dae! Pawccemou chiaku na ry?” a cipya. Tukeiccuze profeh tuh zya a dae vae, thuasalama aning nynh, “E rya hynh na lah zah tuanaw kae pyapaw kha na ngae khyh keiccuze Pachia nynh nang kha ro lan a tuaku vae cipaw ka ny,” a cipya.

¹⁷Judah siapharan Amaziah nynh tuanaw a ngia kou hae te, Israel siapharan Jehu ccapaw Jehoahaz a ccapaw Jehoash kalan khe ccungccaw saw zah, “Yn cceih lah, lu kheit te lu kheit hawiliakute doku tua sih,” a cipya.

¹⁸Israel siapharan Jehoash nynh Judah siapharan Amaziah kalan byataw zah, “Lebanon mua e hinpawbu nynh Lebanon mua e sidar thingku kalan byataw zah, ‘Na ccanung kha ka ccapaw zu lang yn pya,’ a cipya; te Lebanon e loramsaw sa kheit nynh po a ccia lyakhe, hinpawbu kha a syde.

¹⁹Nang nynh, ‘Dotua, Edom ram kha ka tae vae,’ na ci zah, pookute na thinlung na hangsahku. Innvaw khe zya umkuh; namaw te Judah ram tuh khuliaku khylan pawccemou vawsawnaw kha na ccungku?” a cipya.

²⁰Thuasalama Amaziah nynh ngae ry khyh—pawccecize minmin nynh Edom pachia hae kha a ccung hae keiccuze minmin kha rhaw hae kuih kalan pya khylan Pachia nynh a cyipaw nynh thua.

²¹Tukeiccuze Israel siapharan Jehoash tuh cceihthung zah, Judah ram Beth-shemesh kyakhe Judah siapharan Amaziah te hawiliakute rhaw a tukkuh hae.

²²Israel nynh Judah kha tae zah, mih inn raveih lang pong a ccue hae.

²³Israel siapharan Jehoash nynh Judah siapharan Amaziah kha Beth-shemesh kyakhe a kyng; Amaziah tuh Jehoash ccapaw, Jehoash tuh Ahaziah ccapaw nynh thua; te Jerusalem lang cciakhae zah Jerusalem khualungrua kha Efraim Koikua kyate Apaki Koikua kyacia, dong za pali a ting.

²⁴Pachia inn kya a umpaw sui te ngun miakaw, angphe hae balyn kha lah zah, Obed-edom kha mah a kyng; siapharan inn kya-e sisua hae te aamahkhan ccungccaw hae kha mah a kyng hae; te Samaria khua lang a ki.

²⁵Judah siapharan Joash ccapaw Amaziah tuh Israel siapharan Jehoahaz ccapaw Jehoash a chih koute kum haw lae pangaw a hiin ung.

²⁶Tuhlaepaw Amaziah nynh a cyipaw kha atakaw te athangnaw cia, Judah te Israel Siapharan hae Ccauh kya a zei hae.

²⁷Amaziah nynh BAWIPAW kyate ccanglang a maeku ccyh kyate tho zah Jerusalem kya amaw pheenaw rya kha lah hae zah, Amaziah tuh Lakhish khua lang a ccue. Thuasalama Lakhish khua lang ccungccaw deehuisah hae zah, tuin kya a chia hae.

²⁸Marang tungvaw khangte kikhae hae zah, David khua khe a minpaaw hae ryte a uukheih hae.