Read Zotung Chin 2 SHERIANAW 26 Bible Online

2 SHERIANAW 26 - Zotung Chin bible

2 SHERIANAW 26

¹Judah ccungccaw hae balyn nynh kum haw lae taruh acih vae paw Uzziah kha ko hae zah, a paaw Amaziah ccelang siapharan lang a khangku hae.

²Siapharan tuh a minpaaw hae ryte a ih kou hae te, Uzziah nynh Eloth khua kha raethui zah Judah ram lungkhu bua a nung.

³Aning nynh kum haw lae taruh acih te ram kha uk takaw zah, Jerusalem kya sung pangaw kum ning a uk. A nung min tuh Jekoliah cikuh zah Jerusalem khuanung nynh thua.

⁴A paaw Amaziah nynh a la cyi hawte BAWIPAW muihnaw kya ahmepaw kha a cyi.

⁵BAWIPAW rawrinaw a ccangpahtu Zekhariah she lya tuh, Uzziah tuh Pachia kalan a naekuh; BAWIPAW kalan a naeku lungkhu tuh Pachia nynh laansui-uanaw a pya.

⁶Uzziah nynh cceih zah Filistin hae kha a tuk hae, Gath khualungrua, Jabneh khualungrua te Ashdod khualungrua kha a tingbung hae; Ashdod ram lungkhu te Filistin hae laku kya hmin ccangpaw kyakhe khua hae kha a rae.

⁷Pachia nynh Filistin hae, Gurbaal kya um hae paw Arab hae te Meunim hae kha rawsete amaw kha a bawm.

⁸Ammon hae nynh Uzziah kha ngunto a pya hae, aning tuh myarya athungpaw lang a tang keiccuze a minthaannaw tuh Izip ram cia heize azeihkuh.

⁹Tuhpiaze Uzziah nynh Jerusalem kya Apaki Koikua, Accya Koikua te khualungrua Akouleihnaw Sakoih kyakhe rhawvianaw innhangpaw hae kha sak zah a koih hae.

¹⁰Shefelah kya te bialae khe sahiin patae a hoi keiccuze ramkaw khe rhawvianaw innhangpaw hae kha sak zah tuisung patae a thae, te loopho rya kha myarya a rypaw athua keiccuze sangpyng hae te lae ahoynaw hmin hae kyakhe loopho hae te misu khokhu do-oihtu hae kha a nung hae.

¹¹Tuhpiaze Uzziah nynh rhawkawphu, rhaw a tuk kho vae paw rhawkaw hae kha a hoi, siapharan a rhawbawi hae kya-e lu kheit athuapaw Hananiah kuihkaw a um hae paw ryaccinkhan Jeiel te rhawbawi Maaseiah nynh milu ccazing a law hae thyhte rhawkaw hae tuh aphuphute a um hae.

¹²Puizia raveih kya-e lu hae athua hae paw athungpaw rhawkaw hae milu abalyn tuh thong ning za taruh acih hae.

¹³Minmin kuihkaw khe, rhaw hae kha tuk khylan siapharan a bawm khopaw, rhaw a tuk khopaw myarya thungpaw rhawkaw hae cciing thum thong sari za pangaw a um hae.

¹⁴Uzziah nynh rhawkaw hae balyn kha khawriaphua, ccoi, sivawlukhung, sivaw angki, li te zaenawpaw lung hae kha a pya hae.

¹⁵Athyapaw ryalahtu hae nynh a rae hae paw the te lung pipi hae kawnawpaw seh hae kha mah Jerusalem khua e rhawvianaw innhangpaw hae te khualungrua apaki hae vawlan khe a nung hae. Tuhcite aning tuh athungpaw lang a tang mawlaezung ngaeangthua lan ciate a bawm hae keiccuze a minthaannaw tuh azeihkuh.

¹⁶Thuasalama Uzziah tuh athungpaw lang he yn tang tuh, amaw a ro nawlan yn lysakuh vae. BAWIPAW a Pachia tungvaw sei zah, mynkhuhpaw unawpaw silawhang vawlan mynkhuhpaw kha u khylan BAWIPAW beikinn lungkhu lang a tee.

¹⁷Thuasalama ranpibawi Azariah nynh BAWIPAW ranpibawi hae arawthungpaw sung tarya ryte a nulang te a zui hae;

¹⁸minmin nynh Siapharan Uzziah kha kang hae zah, “Uzziah, nang nynh BAWIPAW kalan mynkhuhpaw kha na u lanpaw thua khyh, mynkhuhpaw a utu lang thyaasah athua hae paw Aaron ciihan ranpibawi hae nynh mynkhuhpaw kha a u cih hae. Beikinnthyaa kyate poutua; phe na cyisei vae, e hynh nynh BAWIPAW Pachia kyate sawtuanaw kha ae thuakhaepah lan khyh,” a cipya hae.

¹⁹Tetuh Uzziah tuh a thinria. Mynkhuhpaw u nawlan pakephepaw kha ccyngkuh zah, ranpibawi hae tungvaw a thin he ria tuh, BAWIPAW inn lungkhu, mynkhuhpaw unawpaw silawhang pe, ranpibawi hae malang khe a terui kya vaethya ccinaw a langkuh.

²⁰Ranpibawi lepaw Azariah te ranpibawi hae balyn nynh amaw kha he a do hae tuh, a terui kya vaethya ccinaw a kae. Minmin nynh arangte a poukhae hae, BAWIPAW nynh de a tah vae keiccuze amaw nynh mah rangsakute a pou.

²¹Siapharan Uzziah tuh a chih cia vaethya ccinaw a kae, vaethya ccinaw a kae keiccuze inn ccangpaw kya a um, BAWIPAW inn lang teenaw kaw mue vae khyh. A ccapaw Jotham nynh siapharan inn kha do-oih zah, ram kya-e ccungccaw hae kha a uk hae.

²²Tuhlaepaw Uzziah nynh rya a lawpaw kha atakaw te athangnaw cia Amoz ccapaw profeh Isaiah nynh a zei.

²³Uzziah tuh a minpaaw hae ryte a ih hae; minmin nynh, “Aning tuh vaethya ccinaw a kae,” a ci hae keiccuze, siapharan hae te asekuhpaw shawku kya a minpaaw hae pe khe a uu hae. A ccapaw Jotham nynh amaw ccelang siapharan lang a tang.