Read Zotung Chin 2 SHERIANAW 28 Bible Online

2 SHERIANAW 28 - Zotung Chin bible

2 SHERIANAW 28

¹Ahaz tuh kum kuin acih te ram kha uk takaw zah, Jerusalem kya kum haw lae taruh a uk. A minpaaw David hawte thua leite, BAWIPAW muihnaw kya ahmepaw kha rae khyh.

²Israel siapharan hae laanpi kha a zui. Baal pachia hae hanlan zohtuh hae kha heize laeete a rae;

³Hinnom ccapaw accya kyakhe silawnaw rae zah, BAWIPAW nynh Israel hae malang te a dee hae paw minphuin hae kya-e anungsikuhpaw cyisahnaw thyhte, a ccapaw hae khate heize maee-ute silawnaw a rae.

⁴Ahangpaw hmin hae vawlan, mua hae vawlan te hinlalyhpaw thingku kaw miakaw khe silawnaw rae zah mynkhuhpaw kha a u.

⁵Tukeiccuze BAWIPAW a Pachia nynh Ahaz kha Siria siapharan kuih kalan a pya, aning nynh Ahaz kha tae zah a ccungccaw hae patae kha kyng hae zah Damaskas khua lang a cciakhae hae. Israel siapharan kuih kalan mah amaw kha pya thua zah, tuh-e paw nynh tae zah ccungccaw patae a chia.

⁶Mih minpaaw hae Pachia, BAWIPAW kha a vua hae keiccuze Remaliah ccapaw Pekah nynh nin kheit lungkhu Judah ram kya cciing kheit thong kuin a chia, tuh-e hae balyn tuh arawthungpaw rhawkaw hae nynh thua.

⁷Athungpaw rhawkaw, Efraim phinpaw Zikhri nynh siapharan ccapaw Maaseiah, siapharan inn e rhawbawipaw Azrikam te kawhoinaw kya siapharan he a zuipaw Elkanah kha a chia hae.

⁸Israel ccungccaw hae nynh mih puizia hae athua hae paw nopi hae, ccapaw hae te ccanung hae cciing ning kha kyng hae zah a cciakhae hae; mih uccaw patae kha mah luade hae zah Samaria lang a cciakhae hae.

⁹Thuasalama Oded cikuhpaw BAWIPAW profeh lu kheit a um; Samaria khua lang oun cceih hae paw rhawkaw hae kha tungku lan ccianua hae zah, “Nae minpaaw hae Pachia, BAWIPAW nynh Judah tungvaw a thinria keiccuze minmin kha nae kuih kalan ae pya oh, thuasalama nanning nynh vaawlui phe phahpaw thin-unaw te minmin kha na chia vae oh.

¹⁰Atu tuh nanning nynh Judah hae te Jerusalem khuaccaaw hae nopi pise hae kha nae see hae hawte uk lan na paccynku oh. Nanning tuh BAWIPAW nae Pachia tungvaw seinaw na rae khyh oh tou?

¹¹Ka bya hynh thaetua oh, na kyng oh zah na cciakhae oh paw nae puizia hae kha saw oh, pawccecize BAWIPAW thin-unaw myarya lepaw tuh nae tungvaw a um,” a cipya hae.

¹²Tetuh Efraim phin kya-e bawi hae, Johanan ccapaw Azariah, Meshillemoth ccapaw Berekhiah, Shallum ccapaw Jehizkiah te Hadlai ccapaw Amasa nynh rhawtuknaw langte oun cceih hae paw kha thadyn khaw hae zah,

¹³minmin kha, “Na kyng oh paw ccungccaw hae kha hynhlang na thuakhae lan khyh oh, pawccecize atu kae seinaw te kae cyiseinaw vawlan hin BAWIPAW tungvaw cyiseinaw kha nanning nynh kae tungvaw thuakhae chih lan na paccynku oh. Kae cyiseinaw tuh myarya le vae zah Israel tungvaw thin-unaw a um vae,” a cipya hae.

¹⁴Tukeiccuze rhawkaw hae nynh a kyng hae paw te a luade hae paw uccaw hae kha bawi hae te ccungccaw zapi hae malang khe a cciataw hae.

¹⁵Te mih min te a ko hae paw ccungccaw hae nynh thokuh hae zah a kyng hae paw kha ko hae zah boeining leite a um hae paw balyn kha luadepaw boeining kha a lawsahku hae; boeining lawsakuh hae zah phanah a nawsaku hae, tui te looh pya hae zah chitui a thuhsaku hae; te minmin laku e mih thawzyapaw balyn kha lann ccisakuh hae zah, mih puizia hae a umnaw hae ungcci ku khua a ci hae paw Jeriko khua langkhe a cciakhae hae. Tukoute Samaria lang a ki hae.

¹⁶Tuh ccyh lyakhe Ahaz Siapharan nynh Assiria siapharan kalan khe bawmnaw ngia lan ccungccaw a saw.

¹⁷Pawccecize Edom hae nynh Judah ram kha bua thiing hae zah a tae hae, ccungccaw hae kha kyng hae zah a cciakhae hae.

¹⁸Filistin hae nynh Judah ram e Shefelah te Negeb kya umpaw khua hae kha thiing hae zah Beth-shemesh, Aijalon, Gederoth, Soko te a khua taraw hae, Timnah te a khua taraw hae, te Gimzo te a khua taraw hae kha lah hae zah tuin kya a um hae.

¹⁹Israel siapharan Ahaz keiccuze BAWIPAW nynh Judah ram kha a nyaasah bung, pawccecize Judah ram kya hoyleinaw kha lungsah thung zah BAWIPAW tungvaw a lungzi khyh.

²⁰Tukeiccuze Assiria siapharan Tilgath-pilneser nynh ccianua zah thawzung pya leite a tuaa a sah.

²¹Pawccecize Ahaz nynh BAWIPAW inn, siapharan inn te bawi hae inn e uccaw hae kha luade hae zah Assiria siapharan kha ngunto a pya; thuasalama aning nynh Ahaz kha bawm lae khyh.

²²E Ahaz siapharan tuh a lungriathae ccyh lyakhe mah BAWIPAW tungvaw lungzinaw houh hoi khyh.

²³Pawccecize amaw a taetu Damaskas pachia hae kalan khe silawnaw rae zah, “Siria siapharan hae kya-e pachia hae nynh minmin kha a bawm hae keiccuze kae hynh mah yn bawmbua nawlan hae, mih kalan silawnaw ka rae cih,” a ci. Thuasalama tuh-e pachia hae tuh Ahaz te Israel hae balyn a ro nawlan hae nynh thua.

²⁴Ahaz nynh Pachia inn e angphe hae kha suelua hae zah, Pachia inn e angphe hae kha palae tui lan a koi hae. BAWIPAW inn thuakaw hae kha khaw zah Jerusalem khua apaki miakaw khe silawhang hae kha a raeku.

²⁵Judah ram e khua miakaw kyakhe ccangpaw pachia hae hanlan mynkhuhpaw upya nawlan ahangpaw hmin hae kha rae zah a minpaaw hae Pachia, BAWIPAW kha a thin a riasah.

²⁶Tuhlaepaw Ahaz nynh a cyipaw te a hiinzia balyn tuh atakaw te athangnaw cia Judah te Israel Siapharan hae Ccauh kya a zei hae.

²⁷Ahaz tuh a minpaaw hae ryte ih hae zah, Jerusalem khua kya a uu hae; thuasalama Israel siapharan hae kya-e shawku hae kalan cciakhae khyh hae. A ccapaw Hezekiah nynh amaw ccelang siapharan lang a tang.