Read Zotung Chin 2 SHERIANAW 3 Bible Online

2 SHERIANAW 3 - Zotung Chin bible

2 SHERIANAW 3

¹Jerusalem khua kya Moriah Mua, a paaw David kya BAWIPAW nynh a langpyakunaw, David nynh a paccynnaw hmin, Jebus ccungccaw Ornan kya-e huimin kyakhe Solomon nynh BAWIPAW inn kha a sak takaw vae.

²Ram a uknaw kum palinaw, sawpaw sah ningnaw, nin ning nin khe inn kha a sak takaw vae.

³Pachia inn saknaw hanlan Solomon nynh a toupaw tuh hynhte nynh thua: inn tuh tounawpaw dong arynpaw te dong sung taruh sae zah dong kuin ako.

⁴Beikinn akhaanpi malang umpaw tee takawnaw khaan tuh beikinn ako thyhte dong kuin sae zah, za kheit dong kuin ahang. Alungkhu langte sui ccipaw te a thei.

⁵Akhaanpi kha maeccaw thingphe te aring popo ring zah, sui ccipaw te a thei, avawlan khe ungcci ku te sivawrui te a ccaan.

⁶Inn kha aphutepaw lung te a ccaan. Sui tuh Parvaim sui nynh thua.

⁷Tuhcite inn a thingccaw hae, a thuakaw-ua hae, a pang hae, a thuakaw hae kha sui te ccaan hae zah, pang hae kyakhe cherubim zuh hae kha karynte a soi hae.

⁸Hmin thyaa huaccepaw tuh inn ako thyhte asaepaw dong kuin, akopaw dong kuin te rae zah, sui ccipaw talent za taruh te a thei.

⁹Thingkhia lang mangpaw sui tuh shekel sung pangaw ari. Avawlan khaan hae kha sui te a thei.

¹⁰Hmin thyaa huaccepaw kyakhe cherubim ccangning muinsan kha rae zah sui te a thei.

¹¹Cherubim hae kya-e mih sake hae nynh dong kuin cia a daw hae: cherub ccangkheit kya-e a sake ccangkheit tuh dong pangaw sae zah inn pang kha a tung, te dong pangaw asaepaw ccangpaw a sake tuh ccangpaw cherub sake te a tungkuh hae;

¹²e cherub ccangkheit kya-e dong pangaw asaepaw a sake ccangkheit nynh inn pang kha a tung, te dong pangaw asae buapaw ccangpaw a sake tuh masaty e cherub sake khate a tungkuh hae.

¹³E cherubim hae kya-e mih sake hae tuh dong kuin cia a daw hae; cherubim hae tuh mih ccu te thadyn hae zah akhaanpi langkhe mih mae a hawi hae.

¹⁴Te Solomon nynh zokhawpaw boei kha meizong, sephaphuhpaw, asepaw boeisah, nebaleihpaw laaw te kuakuhpaw khate rae zah, tuh-e hae kyakhe cherubim zuh kha a soi.

¹⁵Inn malang khe sung thum dong pangaw ahangpaw tungpi ccangning kha rae zah, tung dung raveih khe dong pangaw acihpaw tunglukhung a um.

¹⁶Akhelekuhpaw sivawrui hae kha rae zah, tung dung hae kyakhe a nung; te ccalee thae za kheit kha tuh-e sivawrui kya a raebia.

¹⁷Tuh-e tungpi hae tuh inn malang khe voilang tung kheit, ranglang tung kheit bing zah, ranglang e tung tuh Jakhin ci zah voilang e tung tuh Boaz a ci.