Read Zotung Chin 2 SHERIANAW 33 Bible Online

2 SHERIANAW 33 - Zotung Chin bible

2 SHERIANAW 33

¹Manasseh tuh kum haw lae ning acih te ram kha uk takaw zah, Jerusalem khua kya sung pangaw kum pangaw a uk.

²BAWIPAW nynh Israel ccungccaw hae malang te a dee hae paw minphuin hae nynh a cyi hae paw anungsikuhpaw phunglang kha zuite, aning nynh BAWIPAW muihnaw kya hoyleinaw kha a rae.

³A paaw Hezekiah nynh a la ropaw ahangpaw hmin hae kha a raethui; Baal elang silawhang hae kha raepah zah Asherah kha mah a rae, vaawlui kya umpaw uccaw hae balyn kha beik zah rya a lawpya hae.

⁴BAWIPAW nynh, “Jerusalem khua kya ka min tuh zungzae a um cih,” cite a la ci nuathepaw BAWIPAW inn kyakhe ccangpaw pachia hae kya-e silawhang hae kha a rae.

⁵BAWIPAW inn voidu ccangning kyakhe vaawlui kya umpaw uccaw hae balyn hanlan silawhang hae kha a rae.

⁶Hinnom ccapaw accya kyakhe a ccapaw kha silaw nawlan maee te a u; beidinhonaw, kuihdokunaw te naawthyanaw kha mang zah, chihiinleihthya hae paw te mitleihthya hae paw kha mah a mang hae. BAWIPAW muihnaw kya hoyleinaw patae kha rae zah a thin a riasah.

⁷Pachia nynh David te a ccapaw Solomon kyakhe, “Israel phin hae balyn kyate ka popaw Jerusalem khua kya te hynh-e inn kyahin ka min kha zungzae ka tynsah cih; kaw ka pya hae paw balyn, Moses kyate ka pya hae paw phungbya, phunglang hae te phungzae hae balyn thyhte minmin nynh cyi lan a raeringku hae zetuh, mih minpaaw hae ka pya hae paw ram kyate mih ccu kha ccanglang ka cciasah sei vae lan khyh,” cite a hopyanaw hae Pachia inn lungkhu khe amaw nynh karynte azuh soi zah a raepaw zohtuh kha a nung.

⁹Manasseh nynh Judah hae te Jerusalem khuaccaaw hae kha a cciakhaesei hae keiccuze Israel ccungccaw hae malang te BAWIPAW nynh a ro hae paw minphuin hae nynh a la cyi hae paw laeze hoyleinaw kha houh lung lan a rae hae.

¹⁰BAWIPAW nynh Manasseh te a ccungccaw hae kha a hopya hae zemah minmin nynh pawlangria khyh hae.

¹¹Tukeiccuze BAWIPAW nynh Assiria siapharan a rhawbawi hae kha mih kalan ccianua sah hae zah, minmin nynh Manasseh tuh kyng hae zah sivawrui te a khii hae, te Babilon lang a cciakhae hae.

¹²Riathaenaw a teing lyakhe BAWIPAW a Pachia kalan thawccinaw kha ngiakuh zah, a minpaaw hae Pachia malang khe myaryamaw zakaw a sangsakuh.

¹³Amaw kalan sawsang zah, Pachia nynh a ngiapaw kha ccoupah zah a sawsangnaw kha a thaepya, te amaw ram lang Jerusalem langkhe bua a kikhae. Tetuh Manasseh nynh BAWIPAW tuh Pachia ccaccing nynh thua cipaw a ny.

¹⁴Tukoute David khua atolang, Gihon niccaw lang e accya kyakhe, Ngasaw Koikua teenaw kyacia khualungrua kha a rae; te tuh-e lungrua tuh Ofel kha po voilu lan rae zah myarya hangpaw lang a rae. Judah ram e akoihkuhpaw khua balyn kyakhe rhawbawi hae kha a nung hae.

¹⁵Ramccang pachia hae te zohtuh hae kha BAWIPAW inn kyate ccaring lah hae zah, BAWIPAW inn a umnaw mua vawlan te Jerusalem lungkhu a raepaw silawhang balyn kha khua atolang khe a vua hae.

¹⁶BAWIPAW silawhang kha mah bua nungthui zah a vawlan khe ccawkunaw silawnaw te lungtuanaw silawnaw hae kha a rae; BAWIPAW , Israel Pachia rya kha na lah cih oh cite Judah hae kha kaw a pya hae.

¹⁷Ccungccaw hae nynh ahangpaw hmin hae kyakhe silawnaw a rae ung hae zemah BAWIPAW mih Pachia kalan rou nynh silawnaw a rae vae hae.

¹⁸Tuhlaepaw Manasseh nynh rya a lawpaw, Pachia kalan saw a sangpaw te BAWIPAW , Israel Pachia min te profeh hae nynh amaw kalan a hopya hae paw bya hae tuh Israel Siapharan hae Phungpaw kya a um.

¹⁹A sawsangnaw, a ngiapaw kha Pachia nynh a ccoupyanaw, zakaw a sangsaku maw lyaze a seinaw balyn te a lungzi leinaw, ahangpaw hmin hae kha rae zah Asherah te zohtuh hae a nungnaw hmin hae kong kha tuh profeh hae phungpaw ccauh kya a zei hae.

²⁰Manasseh tuh a minpaaw hae ryte ih hae zah amaw inn khe a uu hae. A ccapaw Amon nynh amaw ccelang siapharan lang a tang.

²¹Amon tuh kum kuin lae ning acih te ram kha uk takaw zah, Jerusalem khua kya kum ning a uk.

²²A paaw Manasseh nynh a la rae hawte BAWIPAW muihnaw kya hoyleinaw kha a rae. A paaw Manasseh nynh a la raepaw zohtuh hae balyn kalan khe Amon nynh silaw zah rya a lawpya hae.

²³A paaw Manasseh nynh zakaw a sangsaku hawte, aning nynh BAWIPAW malang zakawsangsaku leite, e Amon nynh seinaw kha houhouh a rae.

²⁴A ryalahtu hae nynh amaw kha phee hae zah a inn kya a chia hae.

²⁵Thuasalama ramccungccaw hae nynh Siapharan Amon a pheetu hae balyn kha a chia hae; te ramccungccaw hae nynh a ccapaw Josiah kha amaw ccelang siapharan lang a khang hae.