Read Zotung Chin 2 SHERIANAW 34 Bible Online

2 SHERIANAW 34 - Zotung Chin bible

2 SHERIANAW 34

¹Josiah tuh kum tarya acih te ram kha uk takaw zah Jerusalem khua kya sung thum kum kheit a uk.

²BAWIPAW muihnaw kya ahmepaw kha cyih zah a minpaaw David laanpi kha a zui, voilang ranglang maekuh khyh.

³Pawccecize ram a uknaw kum taryanaw kum, ccangvae taraw athua lyakhe, a minpaaw David Pachia kha a ccung takaw; kum haw lae ning kum khe Judah te Jerusalem kya umpaw ahangpaw hmin hae, Asherim, karouhpaw zohtuh te laeepaw zohtuh hae kha a vua takaw.

⁴Baal silawhang hae kha a malang khe a ting hae; tuh-e vawlan a thadynpaw mynkhuhpaw unawpaw silawhang hae kha a ro hae. Asherim, karouhpaw zohtuh te laeepaw zohtuh hae kha bae zah zoihtatyh lan a koi koute tuh-e hae kalan silawnaw a la raetu hae shawku vawlan khe a hei.

⁵Ranpibawi hae ru kha mah mih silawhang hae vawlan khe maee te u zah, Judah te Jerusalem kha a thyaasah.

⁶Manasseh ram, Efraim ram, Simeon ram te Naftali ram kyacia a umpaw khua hae te mih pepan e arohpaw khua hae kyakhe tuhmaminte a cyi,

⁷Israel ram balyn kyakhe silawhang hae kha ting hae zah Asherim te zohtuh hae kha zoihtatyh lan a koi hae, te mynkhuhpaw unawpaw silawhang balyn kha a ro. Tukoute Jerusalem lang a ki.

⁸Ram a uknaw kum haw lae taryanaw kum khe ram te beikinn kha a thyaasah koute, Azaliah ccapaw Shafan, khua uktu Maaseiah te Joahaz ccapaw ccazing kyngtu Joah kha BAWIPAW a Pachia inn raethui lan a saw hae.

⁹Minmin nynh ranpibawi lupi Hilkiah kalan cceih hae zah, thuakaw ngawtu Levi phin hae nynh Manasseh phin hae, Efraim phin hae, Israel hae a laehy hae paw balyn, Judah phin hae te Benjamin phin hae balyn te Jerusalem khuaccaaw hae kya-e khoi hae zah Pachia inn lungkhu lang a la thuakhae hae paw phua kha a pya hae.

¹⁰BAWIPAW inn a do-oih hae paw ryalahtu hae kha pya hae zah, BAWIPAW inn kya ryalah hae paw nynh inn raethui nawlan te cyithui nawlan a pya hae.

¹¹Judah siapharan hae nynh a rosah hae paw inn hae kha raethui nawlan lung adeihkuh vae paw te thingccaw kha re nawlan lehccama hae te inn saktu hae kalan tuh-e phua tuh a pya hae.

¹²Ccungccaw hae nynh lungzite rya a law hae. Tuh-e hae a uktu lang Levi phin Merari ciihan hae Jahath te Obadiah, te Kohath ciihan hae Zekhariah te Meshullam kha ryalaw dopahtu lang a nung hae. Khuakupaw uccaw kha khuakute hlawsahthyapaw ccangpaw Levi phin hae balyn nynh,

¹³uccaw phutu hae te ryalaw aphuinphuin lahtu hae kha a uk hae; Levi phin hae abang tuh ccazi, bawi te sakoih ngawtu nynh thua hae.

¹⁴BAWIPAW inn lungkhu lang a la nung hae paw phua kha a poukhae lya hae khe, Moses kyate pya athuapaw BAWIPAW phungbya ccauh kha ranpibawi Hilkiah nynh a muih.

¹⁵Hilkiah nynh ryaccinkhan Shafan kha, “BAWIPAW inn kya phungbya ccauh kha ka muih,” a cipya; te Hilkiah nynh ccauh kha Shafan kalan a pya.

¹⁶Shafan nynh ccauh kha siapharan kalan ccyng zah, “Na ryalahtu hae kalan cyi lan kaw na pya hae paw balyn kha minmin nynh a cyih cciamang hae.

¹⁷BAWIPAW inn kya a muih hae paw phua kha lah hae zah, rya a dopahtu hae te ryalahtu hae kha a pya hae,” cite siapharan kha a hopya chih.

¹⁸Ryaccinkhan Shafan nynh siapharan kha, “Ranpibawi Hilkiah nynh ccauh yn pya,” cipah zah, Shafan nynh siapharan kha accae lante a riapya.

¹⁹Siapharan nynh phungbya kya-e bya kha he a thae tuh a boeining kha a seii.

²⁰Te siapharan nynh Hilkiah, Safan ccapaw Ahikam, Mikah ccapaw Abdon, ryaccinkhan Shafan te siapharan ryalahtu Asaiah kha kawpya hae zah:

²¹“La cceih oh lah, kamaw hanlan te Israel ram te Judah ram kya a laehy hae paw hanlan, e ccauh lungkhu e bya te asekuh lante BAWIPAW kha la khiatua oh; ah minpaaw hae nynh BAWIPAW bya kha zui leite, e ccauh kya azeikuhpaw balyn thyhte a cyi khyh hae keiccuze aening tungvaw accahpaw BAWIPAW thinrianaw tuh myarya ale,” a cipya hae.

²²Tukeiccuze Hilkiah te siapharan nynh a saw hae paw ccungccaw hae tuh profeh Huldah kalan cceih hae zah tuh-e konglang tuh a hopya hae; Huldah tuh boeining nungnaw a do-oihtu Hasrah ccapaw Tokhath a ccapaw Shallum zu nynh thua (Huldah tuh Jerusalem khua, Zakueh Ccangningnaw kya a umpaw nynh thua).

²³Huldah nynh minmin kha, “BAWIPAW , Israel Pachia nynh hynhte a ho: Ka kalan nanning ae saw oh paw ccungccapaw kha la hopah oh,

²⁴BAWIPAW nynh hynhte a ho: Judah siapharan malang ria athuapaw ccauh lungkhu e azeikuhpaw thyalawnaw balyn kha, e hmin te a lungkhu um hae paw balyn tungvaw kya ronaw kha ka thuasah ccaccing cih.

²⁵Kae kha yn vua hae zah, mih kuih te a raeku hae paw balyn khate ka thinriasah khylan, ccangpaw pachia hae kalan khe silawnaw a rae vae hae, tukeiccuze e hmin kya ka thinrianaw kha ka bu cih zah dae kho vae lan khyh.

²⁶Thuasalama BAWIPAW kha byakhia khylan nanning ae sawtu oh paw Judah siapharan kha tuh hynhte na la hopah cih oh: BAWIPAW , Israel Pachia nynh hynhte a ho: Na thaepaw bya konglang te,

²⁷e hmin te hein kya um hae paw tungvaw kya rawsenaw bya ka hopaw kha he na thae te, na thinlung tuh ngaesikuh zah Pachia malang zakawsangsakute na boeining na seii zah ka malang na raw keiccuze kae nynh mah na bya kha kae thaepya vae, cite BAWIPAW nynh a ci.

²⁸Nang tuh na minpaaw hae kya kae sueluabua cih zah daebabi lan shaw lungkhu na thua cih; e hmin te a lungkhu um hae paw kya ka thuasah cih paw ronaw balyn kha na mit nynh muih lan khyh, a ci cite la hopah oh,” a cipya hae. Tuh-e bya tuh minmin nynh siapharan kalan a kikhae hae.

²⁹Tetuh siapharan nynh ccungccaw saw hae zah Judah te Jerusalem piccan hae balyn kha a pum hae.

³⁰Siapharan tuh BAWIPAW inn lang cceihthung zah amaw ryte Judah ccungccaw hae balyn, Jerusalem khuaccaaw hae, ranpibawi hae te Levi phin hae, ccungccaw adih ale balyn a cceihbua hae; BAWIPAW inn kya a muih hae paw byakinnaw ccauh kya-e bya balyn kha a thaenaw hae khe a ria.

³¹Siapharan tuh amaw hmin kya thadyn zah, hynh-e ccauh lungkhu azeikuhpaw byakinnaw bya hae thyhte rae khylan, a thinlung balyn te, a hiinnaw balyn te BAWIPAW nulang zuiku khylan a kawbya hae, a phunglang hae te a phungbya hae kha zui lan BAWIPAW malang khe byakinkunaw a rae.

³²Te aning nynh Jerusalem khua te Benjamin ram kya um hae paw balyn kha tuh-e byakinnaw tuh bya a kinsaku hae. Jerusalem khuaccaaw hae nynh mih minpaaw hae Pachia, Pachia byakinnaw thyhte a cyi hae.

³³Josiah nynh anungsikuhpaw uccaw balyn kha Israel hae kya-e ram hae balyn kyate vua zah, Israel ram kya um hae paw balyn kha BAWIPAW mih Pachia tuh a beiksah hae. Amaw she lungkhu tuh minmin nynh mih minpaaw hae Pachia, BAWIPAW zuinaw kyate ccanglang maekuh khyh hae.