Read Zotung Chin 2 SHERIANAW 35 Bible Online

2 SHERIANAW 35 - Zotung Chin bible

2 SHERIANAW 35

¹Josiah nynh BAWIPAW hanlan Jerusalem khua kya kawtaw poi kha a tua; masaty sawpaw nin haw lae pali nin khe kawtaw poi tuutaw kha a chia hae.

²Ranpibawi hae kha mimaw rya raveih kya nung hae zah BAWIPAW inn ryalawnaw kyakhe thawzung a pya hae.

³Israel hae balyn kha ccangpah hae zah BAWIPAW hanlan athyaapaw Levi phin hae kha hopah hae zah, “Israel siapharan David ccapaw Solomon nynh a sakpaw inn lungkhu khe athyaapaw thingkua kha nung oh; nae raw te puih ho vae lan khyh. Atu tuh BAWIPAW nae Pachia te a ccungccaw Israel hae kha ryalawpah oh.

⁴Israel siapharan David kya-e muihsahnaw te a ccapaw Solomon kya-e muihsahnaw kha zuite, nae puizia raveihte naemaw phu thyhte paccynkuh oh.

⁵Nae uno athuapaw zapi hae kyaze puizia raveihte phiapaw aphu thyhte athyaapaw hmin kyakhe um oh lah, nae puizia hae aphu raveih hanlan Levi phin hae kha umbua hae sah.

⁶Kawtaw poi tuutaw kha theih oh, naemaw kha thyaasakuh oh lah, Moses kyate oun pyapaw BAWIPAW bya thyhte nae puizia hae ccelang paccyntua oh,” a cipya hae.

⁷Te Josiah nynh ccungccaw hae a um hae paw balyn hanlan kawtaw poi silawnaw lang amaw a sahiin phu kya-e tuutaw hae te miaataw hae thong sung thum te tangnuapaw thong thum kha a hlu; e hae hynh siapharan amaw nynh a hoipaw nynh thua.

⁸A kuihkaw e bawi hae nynh mimaw lungthote ccungccaw hae, ranpibawi hae te Levi phin hae hanlan a hlu hae. Pachia inn kya-e bawi lepaw hae Hilkiah, Zekhariah te Jehiel nynh ranpibawi hae kalan khe kawtaw poi silawnaw hanlan tuutaw te miaataw thong ning za taruh te tangnuapaw za thum kha a pya hae.

⁹Levi phin kya-e lupi hae Konaniah te a uno hae Shemaiah te Nethanel, Hashabiah, Jeiel te Jozabad nynh Levi phin lupi hae kalan khe kawtaw poi silawnaw hanlan tuutaw te miaataw thong pangaw te tangnuapaw za pangaw kha a pya hae.

¹⁰Ryalawnaw kha he a paccyn kou hae te, siapharan nynh kaw a pya hae thyhte ranpibawi hae tuh mimaw hmin kya thadyn hae zah Levi phin hae tuh mimaw phu kya a thadyn hae.

¹¹Kawtaw poi tuutaw kha a chia hae, te ranpibawi hae nynh Levi phin hae kya-e a law hae paw sachii tuh a hei hae, tuh lyatuin Levi phin hae nynh aphua a lae hae.

¹²Moses ccauh kya azeiku thyhte, BAWIPAW kalan hlu khylan, zapi hae kya-e puizia raveihte phiapaw aphu hae kha nee khylan, maee-ute silawnawpaw hae kha taekhiate a nung hae. Te tangnuapaw hae kha mah tuhmaminte a cyi hae.

¹³Phungzae thyhte kawtaw poi tuutaw kha maee te a rua hae; athyaapaw silawnawpaw hae kha laephi ang, sivaw ang te ohkan khate thung hae zah ccungccaw balyn kalan arangte a nee hae.

¹⁴Tukoute mimaw elang te ranpibawi hae elang a paccyn hae, pawccecize Aaron ciihan hae ranpibawi hae tuh maee-ute silawnaw te atho te silawnaw kha khuazi cia a rae hae; tukeiccuze Levi phin hae nynh mimaw elang te Aaron ciihan hae ranpibawi hae elang kha a paccyn hae.

¹⁵David, Asaf, Heman te siapharan a profeh Jeduthun nynh kaw a pya hae thyhte, hlawsahthya hae paw Asaf ciihan hae tuh mimaw hmin kya a um hae. Sakoih ngawtu hae tuh sakoih takyh kya a um hae; mih uno Levi phin hae nynh minmin elang a paccyn vae hae keiccuze mih ryalaw kha cciataw ho vae khyh.

¹⁶Tuhcite Siapharan Josiah kya-e kawpyanaw thyhte, kawtaw poi tua khylan te BAWIPAW silawhang vawlan maee-ute silawnaw rae khylan BAWIPAW ryalawnaw balyn kha tuin nin khe a paccyn hae.

¹⁷Tuin kya umpaw Israel ccungccaw hae nynh tuin ccyh khe kawtaw poi kha tua hae zah ransi phing leipaw sanlou poi kha nin sari a tua hae.

¹⁸Profeh Samuel she kyate tho zah tuh-e te alokuhpaw kawtaw poi kha Israel ram kya tua boi vae khyh hae; Josiah, ranpibawi hae te Levi phin hae, tuin kya umpaw Judah hae te Israel hae balyn te Jerusalem khuaccaaw hae nynh a tua hae paw kawtaw poi tahawpaw tuh Israel siapharan humhung nynh mah tua boi khyh.

¹⁹Josiah nynh ram a uknaw kum haw lae taryanaw kum khe e kawtaw poi hynh a tua hae.

²⁰E hae balyn koute, Josiah nynh beikinn kha he a paccyn koute, Izip siapharan Neko nynh Zufrates vaw kin umpaw Karkhemish khua kha tuk lan a ccianua thung, te Josiah nynh Neko tuh a ccianua.

²¹Thuasalama Neko nynh a kalan khe locceihtu saw zah, “Judah siapharan, nang te kae tuh pawmou cyiku lanpaw a um? Atunin nang kha tuk lan kae ccianua khyh, kae te rhaw kae tukkuhpaw innbyn kha tuk khylan nynh kae ccia; Pachia nynh arangte cyi lan kaw yn pya. Ka kya a umpaw Pachia kha rawse leite zya umtua, tuhteze nynh nang kha ae roh lan khyh,” a cipya.

²²Thuasalama Josiah nynh ccanglang maetawku leite, aning te tukku khylan a muinsan a rulaeku. Pachia mung kyate apoupaw bya Neko bya kha ngae khyh zah Megiddo bialae kya rhawtukku lan a cceih.

²³Thekawthya hae paw nynh Siapharan Josiah kha a kaw hae; te siapharan nynh a ryalahtu hae kha, “Vaemaw myarya ccih lan ka mue vae keiccuze yn cciakhae oh,” a cipya hae.

²⁴Tukeiccuze a ryalahtu hae nynh marangle kyate poukhae hae zah a marangle ccangningnaw kyakhe khang hae zah Jerusalem lang a cciakhae hae. Tuin kyakhe chih zah a minpaaw hae shawku kyakhe a uu hae. Judah hae te Jerusalem khuaccaaw hae balyn tuh Josiah hanlan a rah hae.

²⁵Jeremiah nynh mah Josiah kha rawkhuinaw hlawphua zah, hlawsahthyapaw pise hae te nopi hae balyn nynh Josiah kha atunin cia mih rawkhuinaw hlaw kya a mang hae. E hynh Israel phungzae lang a mang hae; Rawnaw Hlaw kya a zei hae.

²⁶Tuhlaepaw Josiah nynh rya a lawpaw, BAWIPAW phungbya kya azeiku thyhte lungzite a cyipaw,

²⁷a ryalawnaw atakaw te athangnaw cia Israel te Judah Siapharan hae Ccauh kya a zei hae.