Read Zotung Chin 2 SHERIANAW 4 Bible Online

2 SHERIANAW 4 - Zotung Chin bible

2 SHERIANAW 4

¹Solomon nynh asaepaw dong kuin, akopaw dong kuin te ahangpaw dong haw acihpaw sohin silawhang ccangkheit a rae.

²Te sohin tuikua kha apyng lante rae zah, voikheih lang arae te voikheih lang arae tuh dung haw sawkuh zah, dung pangaw ahang. Po voilu lante tou lanze dung sung thum acih.

³Tuikua arae zakaw khe po voilu lante dong kheit ze tui-ung ccanghaw ccite, tui-ung tang tangning kha tuikua po voilu lan sohin te a laee.

⁴Tuh-e tuikua tuh tangnuapaw sa haw lae ning vawlan khe a um, tangnuapaw hae sa thum tuh thahlang, sa thum tuh niccaw lang, sa thum tuh alia lang, sa thum tuh nithua lang a hawi hae. Tuikua tuh mih tungvaw khe um zah, alungkhu langkhe mih nulang kha a sangsah hae.

⁵Tuikua tuh zapae thaw zah, arae tuh banang rae hawte thua zah, lili haetapaw te alokuh; tuikua tuh tui kha bath thong ning accawng.

⁶Singku nawlan pakepi ccanghaw rae zah, ccangpangaw kha ranglang khe nung zah, ccangpangaw kha voilang khe a nung. E hae lungkhu hin maee-ute silawnaw kya mangpaw uccaw hae kha a ccikan hae. Tuikua tuh ranpibawi hae nynh a singku nawlan hae paw nynh thua.

⁷Synriaty athua vae hawte, sui maeekhuatung ccanghaw kha rae zah beikinn lungkhu, alia langsang khe ccangpangaw, thahlang sang khe ccangpangaw a nung.

⁸Ccaboi kha mah ccanghaw rae zah beikinn lungkhu, ranglang sang khe ccangpangaw, voilang sang khe ccangpangaw a nung. Te sui pakepi za kheit a rae.

⁹Ranpibawi hae voidu, voidu lepaw te voidu elang thuakaw hae kha rae zah, thuakaw hae kha sohin te a thei hae.

¹⁰Tuikua kha inn nithua-alia lang apaki khe a nung.

¹¹Huram nynh ang hae, buhhawlua hae te pakepi hae kha a rae. Tuhcite Huram nynh Solomon Siapharan hanlan Pachia inn kya rya a lawpyapaw kha a lyn:

¹²tungpi ccangning, pakekhupaw hae, tungpi dung hae kya-e tunglukhung ccangning, tungpi dung hae kya umpaw tunglukhung hae bong lanpaw miabu hawte akhelekuhpaw ccangning;

¹³tungpi dung hae kya umpaw tunglukhung hae bong lanpaw miabu hawte akhelekuhpaw ccangning hae hanlan ccalee thae za pali, tuh-e miabu lopaw ccangkheit cci hanlan ccalee thae atang tang ning,

¹⁴thadynsahnawpaw hae, thadynsahnawpaw hae vawlan umpaw pakepi hae,

¹⁵tuikua ccangkheit, tuh-e tuikua kaw umpaw tangnuapaw hae sa haw lae ning kha a rae.

¹⁶Ang hae, buhhawlua hae, phedung hae te hynh-e hae hanlan ahopaw uccaw balyn tuh Huram-abi nynh Solomon Siapharan elang BAWIPAW inn hanlan awrarihpaw sohin te a raepya.

¹⁷Jordan bialae, Sukkoth te Zeredah laku anglae a umnaw hmin kyakhe siapharan nynh tuh-e hae tuh a raesah hae.

¹⁸Solomon nynh e uccaw hae balyn hynh patae a rae keiccuze sohin tuh hohzeihmou ari cipaw ny kho um khyh.

¹⁹Tuhcite Solomon nynh Pachia inn kya umpaw uccaw balyn kha a rae: sui silawhang, nungpyapaw sanlou nungnawpaw ccaboi,

²⁰synriaty athua vae hawte, alungkhu lang e hminthyaa malang maee aw nawlan sui ccipaw te raepaw maeekhuatung hae te mih maeeinn hae;

²¹sui ccipaw te raepaw haetapaw hae, maeeinn hae, tetakia hae;

²²sui ccipaw te raepaw tetakia hae, pakepi hae, angsaw hae, maee-e nungnawpaw pake hae; beikinn lungkhu lang teenaw hae tuh: hmin thyaa huaccepaw kalan teenawpaw alungkhu lang e thuakaw hae te beikinn akhaanpi kya-e thuakaw hae kha sui te a rae.