Read Zotung Chin 2 SHERIANAW 5 Bible Online

2 SHERIANAW 5 - Zotung Chin bible

2 SHERIANAW 5

¹Tuhcite Solomon nynh BAWIPAW inn hanlan rya a lawpaw balyn kha a thangsah. A paaw David nynh a hlu vae paw uccaw hae kha Solomon nynh teekhae zah Pachia inn e sisuakhaan kyakhe sui, ngun te angphe balyn kha a nung.

²BAWIPAW byakin thingkua kha Zion cikuhpaw David khua kyate poukhae khylan, Solomon nynh Israel piccan hae balyn, mih phin raveih kya-e lu hae balyn, Israel ciihan cciakhaetu hae balyn kha Jerusalem khua kya a pum hae.

³Israel hae balyn tuh sawpaw sah sarinaw kya tuapaw poi kyakhe siapharan malang a pumkuh hae.

⁴Israel piccan hae balyn tuh oun thua hae zah Levi phin hae nynh thingkua kha a puih hae.

⁵Minmin nynh thingkua, tungkunaw bu te bu lungkhu umpaw athyaapaw angphe balyn kha a cciakhae thung hae; ranpibawi hae te Levi phin hae nynh a cciakhae thung hae.

⁶Solomon Siapharan te a malang pumkuh hae paw Israel zapi balyn tuh thingkua malang khe um hae zah, minmin nynh riatae um lei lan alungpaw tuu hae te tangnuapaw hae khate silawnaw a rae hae.

⁷Ranpibawi hae nynh BAWIPAW byakin thingkua kha beikinn alungkhu lang e hminthyaa kya, hmin thyaa huaccepaw kya, cherubim sake hae kaw, amaw hmin kyakhe a nung hae.

⁸Pawccecize cherubim hae nynh mih sake hae kha thingkua umnaw luki khe daw hae zah, thingkua te puihnawpaw ccong hae kha a dawpya hae.

⁹Puihnawpaw ccong hae tuh eih asae keiccuze adung kha alungkhu lang e hminthyaa malang umpaw athyaapaw hmin kyate muih kho athua; thuasalama atolang te muih kho thua khyh; atunin cia tuin kya a um hae.

¹⁰Israel hae nynh Izip ram kyate a pou lya hae ze, BAWIPAW nynh minmin ryte byakinnaw a raenaw Horeb mua kya Moses nynh a la sangpaw lungphe phe ning laelan, thingkua lungkhu kya ccangpaw pawpaw mah um khyh.

¹¹Ranpibawi hae tuh athyaapaw hmin kyate he a pou hae te (tuin kya umpaw ranpibawi balyn tuh a umnaw hae aphu kha peki leite, phe a thyaasakuh vae hae,

¹²te Levi phin hlawsahthya hae paw balyn, Asaf, Heman te Jeduthun, mih ccapaw hae te mih puizia hae kha nebaleihpaw laaw te kuakuhpaw boei khate ccaankuh hae zah, lanchi, tintang te tang-oi hae kha ccyngkute mungkae tu hae paw ranpibawi hae za kheit lu kuin ryte silawhang nithua langkhe a thadyn hae).

¹³Mungkae tu hae paw te hlawsahthya hae paw mih rya tuh BAWIPAW luungnaw hlaw te thehoysahnaw hlaw kha roi kheit lante ccaesah lanpaw athua keiccuze mungkae, lanchi te ccangpaw khuakupaw uccaw hae khate, “Pawccecize amaw tuh ahoy, atynpaw a sungsahnaw tuh zungzae atyn,” cite BAWIPAW kha thehoysahte hlaw he a sah hae tuh, inn, BAWIPAW inn tuh maeking te phe abeih,

¹⁴maeking keiccuze ranpibawi hae tuh ryalaw lan thadyn kho khyh hae; pawccecize BAWIPAW phu-enaw tuh Pachia inn kya phe abeih.