Read Zotung Chin 2 SHERIANAW 7 Bible Online

2 SHERIANAW 7 - Zotung Chin bible

2 SHERIANAW 7

¹Solomon nynh saw a sang koute, vaawlang te maee yn ccah zah maee-ute silawnawpaw te silawnawpaw hae kha a u hae; te BAWIPAW phu-enaw tuh beikinn kya phe abeih.

²BAWIPAW phu-enaw tuh BAWIPAW inn kya phe abia keiccuze ranpibawi hae tuh BAWIPAW inn lungkhu lang tee kho khyh hae.

³Maee yn ccah zah BAWIPAW phu-enaw tuh beikinn vawlan a umpaw kha Israel hae balyn nynh he a muih hae tuh, lung aphaekuhpaw vawlan khe laekhu kya bakhung hae zah, BAWIPAW kha beikte lungtuabya ho hae zah, “Amaw tuh ahoy, atynpaw a sungsahnaw tuh zungzae atyn,” a ci hae.

⁴Te siapharan te ccungccaw hae balyn nynh BAWIPAW malang khe silawnaw a rae hae.

⁵Solomon Siapharan nynh tangnuapaw thong kuin lae ning te tuu cciing kheit thong kuin khate silawnaw a rae. Tuhcite siapharan te ccungccaw balyn nynh Pachia inn kha a ap hae.

⁶Ranpibawi hae tuh mih umnaw hmin kya a thadyn hae; Levi phin hae mah David nynh BAWIPAW thehoysah nawlan a raepaw khuakupaw uccaw hae kha khuakute thadyn hae zah David nynh rya a naw hae thyhte, “Atynpaw a sungsahnaw tuh zungzae atyn,” cite BAWIPAW kha the a hoysah hae. Minmin te arawsekunaw khe ranpibawi hae nynh mungkae tu hae zah, Israel hae balyn tuh a thadyn hae.

⁷Solomon nynh BAWIPAW inn malang umpaw voidu angaelung kha a thyaasah; Solomon nynh a raepaw sohin silawhang nynh maee-ute silawnaw, ccathae silawnaw te atho hae kha accawng khyh keiccuze tuin kyakhe maee-ute silawnaw hae te ccawkunaw silawnawpaw atho khate silawnaw a rae.

⁸Tuin ccyh lyakhe Solomon nynh a kya umpaw Israel hae balyn te myarya lungpaw ccungccaw zapi hae, Hamath khua teenaw kyate Izip Vaw kyacia a um hae paw ryte nin sari lungkhu poi a tua hae.

⁹Nin taryanaw nin khe athyaapaw pumkunaw kha a rae hae; pawccecize nin sari lungkhu silawhang apnaw rae hae zah nin sari lungkhu poi a tua hae.

¹⁰Sawpaw sah sarinaw, nin kuin lae thum nin khe ccungccaw hae kha mih inn lang a kisah hae, BAWIPAW nynh David, Solomon te a ccungccaw Israel hae kya a langsahkupaw hoynaw keiccuze minmin tuh lungtua lungpawte a ki hae.

¹¹Tuhcite Solomon nynh BAWIPAW inn te siapharan inn kha a lyn; Solomon nynh BAWIPAW inn kya te amaw inn kya cyi lan a paccynpaw balyn kha hoyte a lyn.

¹²BAWIPAW tuh Solomon kya khuazi khe langkuh zah: “Na sawsangnaw kha ka thae vae, e hmin hynh silawnaw inn lang kamaw elang ka poku vae.

¹³Khuaa araw khyh nawlan vaawlui kha ka khaw ze thuasah, laephi kya-e looh kha ae khylan tungkhipaw hae kha kaw ka pya hae ze thuasah, ka ccungccaw hae kya shethya ka thuasah ze thuasah,

¹⁴ka min te ko athua hae paw ka ccungccaw hae nynh zakawsangsakute sawsang hae zah ka mae kha ccungte ahoy leipaw mih laanpi kyate a maeleihku hae zetuh, vaawlang te ka thae cih zah mih seinaw kha ngaethyate mih ram kha ka dansah cih.

¹⁵E hmin kya saw a sang hae paw kha ka mit nynh a muih cih zah ka naw nynh a thae cih.

¹⁶Ka min tuh hein kya zungzae a um ccaw cite e inn hynh ka po zah ka thyaasah vae; ka mit te ka thinlung tuh hein kya tyty a um cih hae.

¹⁷Nang tuh na paaw David nynh a la ccia hawte, kaw kae pyapaw balyn thyhte cyite, ka phungbya hae te ka phungzae hae kha zuite ka malang na ccia zetuh,

¹⁸‘Israel a uk cih paw na ciihan tuh dae lan khyh,’ cite na paaw David ryte byakinnaw ka rae hawte, na siapharan bawitungkhung tuh zungzae ka tynsah cih.

¹⁹“Thuasalama ccanglang na maeleihkuh oh zah nae malang ka nungpaw ka kawbya hae te ka phungbya hae kha vuate, ccangpaw pachia hae kalan na cceih oh zah na beik oh zetuh,

²⁰nanning kae pya oh paw ram kyate poh kae khaee cih oh; ka min hanlan ka thyaasahpaw e inn hynh ka muihnaw kyate ka vua cih zah ccungccaw hae balyn kya phungtangbya te saryapaw lang ka tangsah cih.

²¹E inn a sung-epaw hynh a pe po a cceihpaw miakaw nynh mih ngaeangthua cih zah, ‘E ram te e inn hynh BAWIPAW nynh pawccemou hynhte a cyi?’ cite a ho cih hae.

²²Te minmin nynh, ‘Mih minpaaw hae kha Izip ram kyate a poukhae hae paw BAWIPAW mih Pachia kha vua hae zah, ccangpaw pachia hae kha doliakute beik hae zah rya a lawpya hae keiccu nynh thua; tukeiccuze BAWIPAW nynh e ronaw hynh mih tungvaw a thuasah,’ cite a ho cih hae,” a cipya.