Read Zotung Chin 2 SHERIANAW 8 Bible Online

2 SHERIANAW 8 - Zotung Chin bible

2 SHERIANAW 8

¹Solomon nynh BAWIPAW inn te siapharan inn kha sak zah kum kuin he aro te,

²Huram nynh a pyapaw khua hae kha Solomon nynh raethui zah tuin kya Israel hae kha a umsah hae.

³Solomon nynh Hamath-zobah ram kha ccianua zah a law.

⁴Ramkaw kya Tadmor khua kha rae zah, Hamath ram kya uccaw ccakhungnaw khua hae balyn kha a rae.

⁵Khualungrua hae, koikua hae, sakoih ccong hae te akoihkuhpaw khua hae Palung Beth-horon te Alia Beth-horon khua hae kha mah a rae hae,

⁶Baalath khua, Solomon kya-e uccaw ccakhungnawpaw khua hae balyn, marangle hae hanlan khua hae, a marang rhawkaw hae hanlan khua hae te Solomon nynh Jerusalem kya, Lebanon kya te a ukpaw ram hae balyn kyakhe sak a rypaw miakaw kha a sak.

⁷Hit hae, Amor hae, Periz hae, Hiv hae te Jebus hae lungkhu e a laehy hae paw balyn, Israel ccungccaw athua lei hae paw,

⁸ram kya a laehy hae paw mih ciihan hae kya-e Israel ccungccaw hae nynh a ro lei hae paw kha— Solomon nynh nangsete ryalawsahnaw kya nung hae zah, atunin cia tuhcite a um hae.

⁹Thuasalama Israel hae kha tuh Solomon nynh a ryalaw kya see lang mang khyh hae; minmin tuh rhawkaw hae, a kuihkaw e bawi hae, a marangle rhawkaw hae te a marang rhawkaw hae a uktu rhawbawi hae nynh thua hae.

¹⁰E hae tuh Solomon Siapharan kuihkaw e bawi lepaw hae, ccungccaw hae tungvaw kawhoitu hae za ning sung pangaw nynh thua hae.

¹¹Solomon nynh Faro ccanung kha David khua kyate a sakpyapaw inn kalan khe a cciakhae; pawccecize Solomon nynh, “BAWIPAW byakin thingkua a thuanaw hmin tuh athyaa keiccuze ka zu tuh Israel Siapharan David inn kya um lan ccan khyh,” a ci.

¹²Tee takawnaw akhaan malang kya a raepaw BAWIPAW silawhang vawlan khe Solomon nynh BAWIPAW kalan maee-ute silawnaw kha a rae,

¹³tuh-e tuh Moses kawbya thyhte sabbath nin hae, sawpaw thawpaw hae te kum kheit ze vae thum tuapaw poi hae—ransi phing leipaw sanlou poi, lonaw poi te bu poi hanlan nin takyhte raepaw silawnaw kha leih a rae hae.

¹⁴A paaw David phungzae thyhte, ranpibawi hae kha mih rya raveih hanlan aphuphute ryalaw a nee hae, te Levi phin hae tuh nin takyhte law lanpaw rya thyhte, ranpibawi hae ryte thehoysahpaw rya te law lanpaw mih rya kha nee athua hae, sakoih ngawtu hae kha mah sakoih patae hanlan aphuphute rya a nee hae; pawccecize Pachia ccungccapaw David nynh tuhcite kaw a la pya hae.

¹⁵Ryalaw miakaw te asekuhpaw kong thuasah, sisua hae te asekuhpaw kong thuasah siapharan nynh kaw a pya hae paw kha ranpibawi hae te Levi phin hae nynh ccanglang maetawkuh khyh hae.

¹⁶BAWIPAW inn aleihpaw bing nin kyate BAWIPAW inn marya lyn athua mawlaezung, Solomon rya miakaw kha tuhcite a lyn hae.

¹⁷Te Solomon tuh Edom ram kya rili kin a umpaw Eziongeber te Eloth lang a cceih.

¹⁸Huram nynh sanphalung hae kha tuh-e hae a do-oih hae paw a ryalahtu hae te rili kya ryalah thya hae paw ryte Solomon kalan a saw hae. Minmin tuh Solomon a ryalahtu hae ryte Ofir lang cceih hae zah, tuin kya-e sui talent za pali sung pangaw kha Solomon Siapharan kalan a phupya hae.