Read Zotung Chin EZRA 3 Bible Online

EZRA 3 - Zotung Chin bible

EZRA 3

¹Sawpaw sah sarinaw yn thua zah Israel hae tuh mih khua raveih kya he a um hae te, ccungccaw hae tuh Jerusalem khua kya a pumkuh hae.

²Tetuh Jozadak ccapaw Jeshua te a ban hae ranpibawi hae, te Shealtiel ccapaw Zerubbabel te a puizia hae nynh Pachia ccungccapaw Moses kawbya kya azeiku hawte, maee-ute silawnaw raenaw lanpaw Israel Pachia silawhang kha rae lan a thokuh hae.

³Mih pepan e ccungccaw hae kha a ri hae keiccuze silawhang kha amaw hmin kyakhe nung hae zah, a vawlan khe BAWIPAW kalan silawnaw kha awkhua zete a rae hae.

⁴Phungbya kya azeiku hawte, bu poi kha tua hae zah, phungzae thyhte nin takyh hanlan ahopaw nin takyh raepaw maee-ute silawnaw kha ahopaw milu zeihte a rae hae,

⁵tukoute tyty raepaw maee-ute silawnaw, sawpaw thawpaw kya raepaw silawnaw, BAWIPAW hanlan tuapyapaw athyaapaw poi miakaw kya raepaw silawnaw te BAWIPAW kalan lungthote silawnaw a raepaw miakaw nynh a rae hae paw silawnaw hae kha a rae hae.

⁶Sawpaw sah sarinaw nin kheit nin kyate BAWIPAW kalan maee-ute silawnaw kha a tho hae. Thuasalama BAWIPAW beikinn aleihpaw kha tuh bing loh khyh hae.

⁷Tukeiccuze pazan rya a lah hae paw te lehccama hae kha phua a pya hae, te Persia Siapharan Sairas nynh kaw a ua hae thyhte, sidar thing kha Lebanon mua kyate rili kalan, Joppa khua lang phu khylan Sidon hae te Tair hae kha aepaw, niapaw te chitui kha a pya hae.

⁸Jerusalem khua Pachia inn kya a thua kou hae te kum ningnaw, sawpaw sah ningnaw khe Shealtiel ccapaw Zerubbabel te Jozadak ccapaw Jeshua nynh tuhlaepaw mih ccungccaw hae, ranpibawi hae, Levi phin hae te a kyngnaw hae kyate Jerusalem lang a thua hae paw balyn ryte rya a tho hae. Kum kuin te palung lang Levi phin hae kha BAWIPAW inn ryalawnaw kya a do-oihtu lang a khang hae.

⁹Te Jeshua nynh a ccapaw hae te a puizia hae ryte, Kadmiel te a ccapaw hae, Binnui te Hodaviah nynh Henadad ccapaw hae ryte, Levi phin hae, mih ccapaw hae te mih puizia hae nynh Pachia inn e ryalaw kha pynkheihlan a law hae.

¹⁰Inn saktu hae nynh BAWIPAW beikinn aleihpaw kha he a bing hae te, Israel Siapharan David nynh a la hopya hae hawte, BAWIPAW kha thehoysah khylan ranpibawi hae tuh mih boeining lawkute mungkae kha a ccyngkuh hae, te Levi phin hae, Asaf ccapaw hae nynh lanchi a ccyngku hae;

¹¹BAWIPAW kha lungtuate thehoysah hae zah, “BAWIPAW tuh ahoy, atynpaw a sungsahnaw tuh Israel tungvaw kya zungzae atyn,” cite liakute hlaw a sah hae. BAWIPAW inn aleihpaw kha bing athua vae keiccuze ccungccaw balyn nynh BAWIPAW kha thehoysah hae zah thawte a sia hae.

¹²Thuasalama langmawlya e inn a la muih boi hae paw ranpibawi hae, Levi phin hae te puizia raveih kya-e lu hae nynh atu e inn aleihpaw abingkuhpaw kha he a muih hae tuh, ccungccaw patae nynh lungpawte a sia hae zemah, minmin tuh thawte a rah hae,

¹³tukeiccuze lungtuanaw roi kha ccungccaw hae rawnaw roi kyate phiathya khyh hae; pawccecize ccungccaw hae tuh myarya ccae lan sia hae zah mih roi tuh laansawpi te thae lan phe um.