Read Zotung Chin EZRA 4 Bible Online

EZRA 4 - Zotung Chin bible

EZRA 4

¹Seetangnaw kyate a ki hae paw nynh BAWIPAW , Israel Pachia elang beikinn a sak hae cipaw kha Judah phin hae te Benjamin phin hae a rawsetu hae nynh he a thae hae tuh,

²Zerubbabel te puizia raveih kya-e lu hae kalan cceih hae zah, “Nanning ryte inn hynh sakkheih oh sih, pawccecize nae Pachia kha nanning hawte kaening nynh mah kae beik, hein kya oun thuakhaepaw Assiria siapharan Esar-haddon she lya mawte Pachia kalan silawnaw kha po kae la rae vae,” a cipya hae.

³Thuasalama Zerubbabel, Jeshua te Israel ram e tuhlaepaw puizia raveih kya-e lu hae nynh, “Kae Pachia hanlan inn saknaw kya kaening ryte na sakbua lan khyh oh; Persia Siapharan Sairas nynh kaw oun pya thyhte BAWIPAW , Israel Pachia hanlan kaemaw kyalya nynh kae sak cih,” a cipya hae.

⁴Tetuh ram kya-e ccungccaw hae nynh Judah hae kha thawthyanaw hopah hae zah inn sak lan a risah hae,

⁵Judah hae paccynnaw kha ro khylan Persia Siapharan Sairas a uk ccyh kyate Persia Siapharan Darias a uk ccyh kyacia minmin nynh bawi hae kha pyaruh a pya hae.

⁶Ahasuerus nynh a uk lungkhu, ram he a uk takaw kum khe, Judah te Jerusalem kya um hae paw tungvaw kya seibenawpaw ccaw kha a zei hae.

⁷Artazaksis she lyakhe Bishlam, Mithredath, Tabeel te tuhlaepaw mih ban hae nynh Persia Siapharan Artazaksis kalan ccaw a zei hae; ccaw tuh Aramaik bya te zei hae zah a leih hae.

⁸Ram uktu Rehum te ccazipaw Shimshai nynh Siapharan Artazaksis kalan khe Jerusalem rawsenawpaw ccaw kha akawlan thyhte a zei hae

⁹(ram uktu Rehum, ccazipaw Shimshai te tuhlaepaw mih ban hae, byapiatu hae, locceihtu hae, bawi hae, Persia ccungccaw hae, Erek ccungccaw hae, Babilon ccungccaw hae, Susa ccungccaw hae, tuh-e hae tuh Elam ccungccaw hae nynh thua,

¹⁰te alesaepaw te athungpaw Osnappar nynh dee hae zah Samaria khua hae te Vawpi Khuraw niccaw lang ram a umsah hae paw ccangpaw ccungccaw hae nynh ccaw tuh a zei hae,

¹¹e hynh minmin nynh a ky hae paw ccaw khawpi nynh thua): “Artazaksis siapharan kalan: Vawpi Khuraw niccaw lang ram um hae paw na ryalahtu hae nynh ccaw te kae beihlang.

¹²Na kyate kaening kalan oun cceihthung hae paw Judah hae tuh Jerusalem lang a cceih hae cipaw kha siapharan nynh beih nytua; rhawtho a mangpaw te ahoy leipaw khua kha raethui hae zah khualungrua hae kha a lyn bia vae hae, khua aleihpaw kha a raethui cciamang hae.

¹³E khua hynh raethui hae zah khualungrua kha a lyn vae hae zetuh, minmin nynh ngunto, uccaw hoi mee te laanpi mang mee kha pya vae lan khyh hae zah siapharan phua muenaw tuh azya vae cih cipaw kha siapharan nynh nyh vae sah.

¹⁴Kaening tuh siapharan inn e loi a ae hae paw kae thua keiccuze siapharan a thethya lanpaw kha kae ry khyh, tukeiccuze na kalan ccaw kae ky zah kae thaesah.

¹⁵Na minpaaw hae phungpaw ccauh kya la ccungtua lah, e khua tuh langmawlya mawte rhawtho a mangpaw khua, siapharan te ram kha vawsaw a pyapaw khua te khua lungkhu kya rhawtho lan leih a paccynkuhpaw khua cipaw kha tuh-e phungpaw ccauh kya ccahe na la muih cih. Tuh-e keiccu nynh hynh-e khua hynh ro a la thua.

¹⁶E khua hynh raethui thua zah khualungrua hae kha lyn athua vae zetuh, Vawpi Khuraw lang ram kya uknaw kaw na hoi vae lan khyh cipaw kha kae nysah,” a cipya hae.

¹⁷Siapharan nynh ccaw leihru hae zah: “Uktu bawi Rehum, ccazipaw Shimshai, te Samaria te Vaw Khuraw lang ram um hae paw tuhlaepaw mih ban hae kalan ccaw te kae beihlang oh.

¹⁸Kaening kalan ccaw nae ky oh paw kha bya oun leihpah hae zah ka malang a ria vae hae.

¹⁹Te kaw ka pya hae zah a ccung hae, langmawlya mawte e khua hynh siapharan hae kha a rawse hae, rhawtho hae zah khua lungkhu kya rhawtho lan leih a paccyn hae cipaw kha a muih hae.

²⁰Vawpi Khuraw lang ram balyn kha uk hae zah ngunto, uccaw hoi mee te laanpi mang mee a lawkuh hae paw siapharan hae athung hae paw tuh Jerusalem kya a la um boi hae.

²¹Tukeiccuze kae nynh kaw ka tho mawlaezung, e ccungccaw hae hynh zya daesah thua hae zah, e khua hynh bua a raethui khyh nawlan hae kawtho oh.

²²Tuhpiaze, e ryalaw kyahin na sawphahku khyh nawlan oh raeringkuh oh; pawccemou siapharan kha vawsawnaw pya khylan ronaw tuh alethung cih?” a cipya hae.

²³Siapharan Artazaksis ccaky khawpi tuh Rehum, ccazipaw Shimshai te mih ban hae malang khe he a ria kou hae tuh, minmin nynh Jerusalem umpaw Judah hae kalan arangte cceih hae zah huhan te nangsete mih ryalaw kha a haeungsah hae.

²⁴Tuin ccyh khe Jerusalem umpaw Pachia inn sakpaw rya kha umtaw hae zah Persia Siapharan Darias nynh ram a uknaw kum ningnaw kum kyacia rya kha po lah khyh hae.