Read Zotung Chin EZRA 5 Bible Online

EZRA 5 - Zotung Chin bible

EZRA 5

¹Profeh Haggai te Iddo ccapaw profeh Zekhariah nynh mih tungvaw umpaw Israel Pachia min te Judah te Jerusalem kya um hae paw Judah hae kyakhe profehbya a ho hae.

²Tetuh Shealtiel ccapaw Zerubbabel te Jozadak ccapaw Jeshua nynh thokuh hae zah Jerusalem khua e Pachia inn sakthuinaw rya kha bua a tho hae; Pachia profeh hae tuh minmin ryte um hae zah minmin kha a bawm hae.

³Tetuh Vaw Khuraw lang ram a uktu Tattenai, Shethar-bozenai te mih ban hae nynh minmin kalan oun cceih hae zah, “E inn hynh sak lan te e inn a uccaw hae hynh raethuite phe lyn lan cite hum nynh mou kaw ae pya oh?” a cipya hae.

⁴“E inn a sak hae paw min tuh humhungmou athua hae?” cite mah a khia hae.

⁵Thuasalama mih Pachia nynh Judah piccan hae kha tyty a do hae, Darias kalan thaesahnawpaw ccaw a thua mawlaezung te tuh-e kong kha leihrunawpaw ccaw yn thua mawlaezung tuh rya kha umtaw khyh hae.

⁶Vaw Khuraw lang ram a uktu Tattenai, Shethar-bozenai te Vaw Khuraw lang ram a um hae paw mih ban hae uktu bawi hae nynh khawpi ccaw kha Darias siapharan kalan a ky hae;

⁷tuh-e a ky hae paw ccaw kyakhe akawlan thyhte a zei hae: “Siapharan Darias tungvaw daenaw tyty um vae sah!

⁸Kaening nynh Judah ram lang, alesaepaw Pachia inn lang kae la cceih. Inn kha a-awkuhpaw lung pipi te sak hae zah pang kyakhe thing awkuhpaw kha a khang hae; e rya hynh pekite lah hae zah mih ryalaw tuh kou a cceihthya cipaw kha siapharan nynh beih la nytua.

⁹Te kaening nynh tuh-e piccan hae kha, ‘E inn sak lan te e inn a uccaw hae hynh raethuite phe lyn lan cite hum nynh mou kaw ae pya oh?’ cite kae khia hae.

¹⁰Mih piccan hae min kha lawte namaw kalan thaesah khylan mih min kha mah kae khia hae.

¹¹E hynh kaening kalan oun leihru hae paw nynh thua: ‘Kaening tuh vaaw te lae Pachia a ryalahtu hae kae thua zah, alesaepaw Israel siapharan nynh la sak zah la lynpaw inn, langmawlya te a la sakpaw inn kha nynh kae sakthui.

¹²Kae minpaaw hae nynh vaaw Pachia kha a thin a riasah hae keiccuze minmin kha Khaldi ccungccaw Babilon siapharan Nebukhadnezzar kuih kalan a pya hae, te tuh-e paw nynh e inn hynh roh zah ccungccaw hae kha Babilon lang a cciakhae hae.

¹³Tuhzemah Babilon Siapharan Sairas nynh ram a uknaw masaty kum khe, e Pachia inn hynh sakthui athua cih, cite kaw a tho.

¹⁴Tuhpiaze, Nebukhadnezzar nynh Jerusalem beikinn lungkhu a umpaw kha lah zah Babilon beikinn lungkhu lang a cciakhaepaw Pachia inn e sui te ngun angphe hae kha Siapharan Sairas nynh Babilon beikinn kyate thuaa zah uktu bawi lang a khangpaw a min Sheshbazzar cikuhpaw ccungccapaw kha a pya.

¹⁵Sairas nynh amaw kha, “E angphe hae hynh lah hae lah, Jerusalem kya umpaw beikinn lungkhu khe la nung hae, te Pachia inn tuh amaw hmin khe sakthui thua sah,” a cipya.

¹⁶Tetuh Sheshbazzar nynh cceih zah Jerusalem kya umpaw Pachia inn aleihpaw kha a bing; tuin ccyh kyate atu cia inn kha po kae sak zah kae lyn loh khyh,’ a ci hae.

¹⁷Tukeiccuze Jerusalem kya umpaw e Pachia inn sakthuinaw kong hynh Siapharan Sairas nynh kaw a tho tou tho khyh tou cipaw ny khylan, Babilon khua umpaw siapharan ccaw ccakhungnaw khaan kyakhe na ccung ry ze la ccungsah tua hae. E kong hynh siapharan nynh a ry hawte kae kalan oun ky sah,” a ci hae.