Read Zotung Chin EZRA 7 Bible Online

EZRA 7 - Zotung Chin bible

EZRA 7

¹E koute, Persia Siapharan Artazaksis nynh ram a uk lyakhe Ezra tuh Babilon khua kyate a cceihthung; Ezra tuh Seraiah ccapaw, Seraiah tuh Azariah ccapaw, Azariah tuh Hilkiah ccapaw;

²Hilkiah tuh Shallum ccapaw, Shallum tuh Zadok ccapaw, Zadok tuh Ahitub ccapaw,

³Ahitub tuh Amariah ccapaw, Amariah tuh Azariah ccapaw, Azariah tuh Meraioth ccapaw,

⁴Meraioth tuh Zerahiah ccapaw, Zerahiah tuh Uzzi ccapaw, Uzzi tuh Bukki ccapaw,

⁵Bukki tuh Abishua ccapaw, Abishua tuh Finehas ccapaw, Finehas tuh Eleazar ccapaw, Eleazar tuh ranpibawi lepaw Aaron ccapaw nynh thua—

⁶Ezra tuh BAWIPAW , Israel Pachia nynh a pyapaw Moses kawbya kha myarya nyh zah a thyapaw ccazi nynh thua; BAWIPAW a Pachia thungnaw tuh a tungvaw a um keiccuze a ngiapaw miakaw kha siapharan nynh a pya.

⁷Siapharan Artazaksis nynh ram a uknaw kum sarinaw kum khe Israel hae abang, ranpibawi hae te Levi phin hae abang, hlawsahthya hae paw te sakoih ngawtu hae, te beikinn ryalahtu hae mah Jerusalem lang a cceihthung hae.

⁸Siapharan nynh ram a uknaw kum sarinaw, sawpaw sah pangawnaw khe Jerusalem khua a thua hae.

⁹Masaty sawpaw nin kheit nin khe Babilon khua kyate pou hae zah, sawpaw sah pangawnaw nin kheit nin khe a Pachia thawccinaw thungnaw tuh a tungvaw a um keiccuze Jerusalem a thua hae.

¹⁰Pawccecize Ezra nynh BAWIPAW kawbya kha ccangku lan te zui lan thuasah, phungbya hae te phungzae hae kha Israel hae kya ccangpya lan thuasah a thinlung kha a pyaku.

¹¹E hynh BAWIPAW nynh Israel hae hanlan a pya hae paw kawbya hae te a phungbya hae myarya athyapaw sazae, ranpibawi Ezra kalan Siapharan Artazaksis nynh a pyapaw ccaw khawpi nynh thua:

¹²“Siapharan hae siapharan Artazaksis nynh vaawlang Pachia kawbya sazae, ranpibawi Ezra kya: Daenaw um vae sah.

¹³Ka ram lungkhu umpaw Israel ccungccaw miakaw, mih ranpibawi hae, Levi phin hae kyaze Jerusalem lang amaw lungthote a cceih rypaw miakaw tuh na kya a cceihbua kho, cite kaw ka tho.

¹⁴Pawccecize na kuih kya umpaw na Pachia kawbya thyhte Judah te Jerusalem kong kha akaw-aleih dotua khylan siapharan te tuanaw a pyatu hae lu sari nynh nang kha kae saw,

¹⁵te siapharan te tuanaw a pyatu hae nynh Jerusalem kya umpaw Israel Pachia hanlan mimaw lungthote a hlu hae paw sui te ngun thuasah,

¹⁶Babilonia ram pynpi kya na mue cih paw sui te ngun balyn thuasah, ccungccaw hae te ranpibawi hae nynh Jerusalem kya umpaw mih Pachia inn hanlan lungthote a pya hae paw lungthote silawnawpaw thuasah na la phu cih.

¹⁷E phua hynhte tangnuapaw hae, tuutepaw hae, tuutaw hae ryte mih ccathae silawnawpaw te mih niapaw silawnawpaw hae kha arangte na re cih zah, tuh-e hae tuhte Jerusalem kya umpaw na Pachia inn silawhang vawlan khe si na law cih.

¹⁸Tuhlaepaw sui te ngun kha nang te na uno hae nynh ahoy na ci oh hawte, nae Pachia rynaw hawte na mang cih oh.

¹⁹Na Pachia inn ryalawnaw hanlan ae pya hae paw angphe hae kha Jerusalem khua Pachia malang khe na la pya cih.

²⁰Na Pachia inn hanlan ccangpaw aho ungpaw miakaw, nang nynh mang lan accanpaw kha siapharan phua kya-e kha na la mang cih.

²¹“Kae, Artazaksis nynh Vaw Khuraw lang ram kya umpaw phua ccytu hae balyn kalan kaw ka tho: Vaawlang Pachia kawbya sazaepaw, ranpibawi Ezra nynh ae ngia oh paw miakaw kha

²²ngun talent za kheit cia, chanvuih kor za kheit cia, misutui bath za kheit cia, chitui bath za kheit cia, te loi aho zeih kha pekite na pya cih oh.

²³Vaawlang Pachia nynh kaw a pyapaw miakaw tuh, siapharan te a rhoccoutu hae peenaw kya a thinrianaw accaw khyh nawlan, Pachia inn hanlan zuakute cyi thua sah.

²⁴Ranpibawi hae, Levi phin hae, hlawsahtu hae, thuakaw ngawtu hae, beikinn ryalahtu hae, e Pachia inn e ccangpaw ryalahtu hae humhung kalan mah ngunto, uccaw hoi mee te laanpi mang mee hae kha na khoi lan khyh oh cipaw kae thaesah bia oh.

²⁵“Nang, Ezra nynh na hoipaw Pachia pyapaw hawnaw thyhte, na Pachia kawbya a thaethya hae paw Vaw Khuraw lang ram e ccungccaw balyn kha bya a pia cih hae paw uktu bawi hae te byapiatu hae kha rya na khang cih hae; tuh-e kawbya a nyh lei hae paw kha na ccangpah cih hae.

²⁶Na Pachia kawbya te siapharan kawbya a zui leipaw balyn tuh chianaw, ram kyate deenaw, mih uccaw luanaw, thongsawnaw hae khate athathyhte byapianaw palou a ing cih hae,” a ci.

²⁷BAWIPAW , kae minpaaw hae Pachia tuh thehoyte um sah. Jerusalem kya umpaw BAWIPAW inn kha phu-esah khylan e uccaw hynh aning nynh siapharan thinlung kya sang zah,

²⁸siapharan te tuanaw a pyatu hae malang te siapharan kuihkaw e athungpaw bawi hae balyn malang khe atynpaw a sungsahnaw kha ka tungvaw a lesah. BAWIPAW , ka Pachia thungnaw tuh ka tungvaw a um keiccuze kae tuh ka rawthung zah kamaw ryte cciathung khylan Israel ccungccaw cciakhaetu hae kha ka suelua hae.