Read Zotung Chin EZRA 8 Bible Online

EZRA 8 - Zotung Chin bible

EZRA 8

¹Siapharan Artazaksis nynh ram a uk lyaze Babilonia ram kyate ka kya a cceihthung bua hae paw mih thokeinaw te mih puizia raveih kya-e lu hae ccazing tuh:

²Finehas ciihan kya-e Gershom. Ithamar ciihan kya-e Daniel. David ciihan kya-e Shekaniah ccapaw Hattush,

³Parosh ciihan kya-e Zekhariah, amaw ryte ccazing kya umpaw pise za kheit sung pangaw.

⁴Pahath-moab ciihan kya-e Zerahiah ccapaw Eliehoenai, amaw ryte pise za ning.

⁵Zattu ciihan kya-e Jahaziel ccapaw Shekaniah, amaw ryte pise za thum.

⁶Adin ciihan kya-e Jonathan ccapaw Ebed, amaw ryte pise sung pangaw.

⁷Elam ciihan kya-e Athaliah ccapaw Jeshaiah, amaw ryte pise sung sari.

⁸Shefatiah ciihan kya-e Mikhael ccapaw Zebadiah, amaw ryte pise sung tarya.

⁹Joab ciihan kya-e Jehiel ccapaw Obadiah, amaw ryte pise za ning lu haw lae tarya.

¹⁰Bani ciihan kya-e Josifiah ccapaw Shelomith, amaw ryte pise za kheit sung taruh.

¹¹Bebai ciihan kya-e Bebai ccapaw Zekhariah, amaw ryte pise lu kuin lae tarya.

¹²Azgad ciihan kya-e Hakkatan ccapaw Johanan, amaw ryte pise za kheit lu haw.

¹³Adonikam ciihan kya-e nulang te oun thuabua hae paw, mih min tuh Elifelet, Jeuel te Shemaiah thua zah minmin ryte pise sung taruh.

¹⁴Bigvai ciihan kya-e Uthai te Zakkur, minmin ryte pise sung sari.

¹⁵Minmin kha Ahava khua lang aluapaw vaw pe khe ka pum hae zah, tuin kya nin thum kae um. Ccungccaw te ranpibawi hae kha he ka dotua thui hae tuh, Levi ciihan hae lu kheit san ka muih khyh.

¹⁶Tetuh cciakhaetu hae Eliezer, Ariel, Shemaiah, Elnathan, Jarib, Elnathan, Nathan, Zekhariah te Meshullam, te mihaw hae Joiarib te Elnathan kha ka ko hae zah,

¹⁷Kasifia khua e cciakhaetu athuapaw Iddo kalan ka saw hae zah, Kasifia khua um hae paw Iddo te a uno hae beikinn ryalahtu hae nynh kae Pachia inn hanlan ryalahtu hae kha oun sawpya nawlan hae, minmin kya a ho lan hae paw bya kha ka taw hae.

¹⁸Kae Pachia a thawccinaw kuih tuh kae tungvaw a um keiccuze Israel ccapaw Levi a ccapaw Mahli ciihan hae kya-e ahawpaw ccungccaw Sherebiah te a ccapaw hae te a puizia hae lu haw lae tarya,

¹⁹Hashabiah te Merari ciihan hae kya-e Jeshaiah te a puizia hae te mih ccapaw hae lu kuin,

²⁰tuhpiaze David te a kuihkaw e bawi hae nynh Levi phin hae do-oih khylan taekhiate a nung hae paw beikinn ryalahtu hae za ning lu kuin tuh kaening kalan oun thuakhae hae. E hae hynh mih min marya zei athua hae.

²¹Te kaemaw hanlan, kae ccaaw hae hanlan te kae hoipaw uccaw balyn hanlan akhynpaw laanccia kha Pachia kalan ngia khylan kae Pachia malang zakaw kae sangsaku nawlan, Ahava vaw pe khe looh-aesungnaw kha ka hopya hae.

²²Pawccecize kae Pachia kuih tuh amaw a ccung hae paw miakaw kya thawccinaw hoi zah, amaw a vua hae paw miakaw kha tuh a thungnaw te a thinrianaw nynh a rawse hae, cite siapharan kha phe kae hopya vae keiccuze kae laanpi kya rhaw hae oun thungkhaw lanpaw rhawkaw hae te marang rhawkaw hae phu kheit kha siapharan kalan ngia lan ka maethah vae.

²³Tukeiccuze tuh-e hanlan looh-ae kae sung zah kae Pachia kalan saw kae sang, te kae ngiapaw kha aning nynh oun thaepya.

²⁴Te ranpibawi lepaw hae lu haw lae ning, Sherebiah, Hashabiah te mih uno hae lu haw kha taekhiate ka nung hae.

²⁵Siapharan te tuanaw a pyatu hae, a kuihkaw e bawi hae te tuin kya umpaw Israel hae balyn nynh kae Pachia inn hanlan a hlu hae paw sui, ngun te angphe hae kha ka khinpah hae zah ka pya hae;

²⁶mih kuih kalan ka khinpya hae paw tuh: ngun talent za taruh sung pangaw, ngun angphe talent za kheit mee, sui talent za kheit,

²⁷sui pakekhupaw ccangkuin, darik thong kheit mee, te sui hawte aphutepaw sohin ang awrarihpaw ccangning.

²⁸Kae nynh minmin kha, “Nanning tuh BAWIPAW hanlan na thyaa oh, angphe hae mah athyaa hae; sui te ngun hynh BAWIPAW , nae minpaaw hae Pachia hanlan lungthote a hlu hae paw nynh thua.

²⁹Jerusalem khua BAWIPAW inn akhaan lungkhu kya ranpibawi lupi hae, Levi phin hae te Israel hae puizia raveih kya-e lu hae malang khe tuh-e ahlu hae tuh na khinpya mawlaezung oh, na ccy cih oh zah na rin cih oh,” ka cipya hae.

³⁰Tukeiccuze ranpibawi hae te Levi phin hae nynh a khin hae paw sui, ngun te angphe hae kha Jerusalem lang, kae Pachia inn lang cciakhae khylan a law hae.

³¹Kaening tuh Jerusalem lang ccia khylan masaty sawpaw nin haw lae ning nin khe Ahava vaw kyate kae thokuh; Pachia thungnaw tuh kae tungvaw um zah, rhaw hae kuih te buhkhawtu hae kuih kyate laanpi kya po oun luesah.

³²Jerusalem khua kae thua zah nin thum kae um.

³³Nin palinaw nin khe kae Pachia inn lungkhu kya sui, ngun te angphe hae kha Uriah ccapaw ranpibawi Meremoth kuih kalan kae khinpah zah kae pya, amaw ryte Finehas ccapaw Eleazar, Levi phin hae Jeshua ccapaw Jozabad te Binnui ccapaw Noadiah mah a umbua hae.

³⁴Abalynte ria hae zah a khin hae, te atyn-are hohzeih nynh ari cipaw kha ccazing kya a nung hae.

³⁵Tuin ccyh lyakhe kyngkunaw kyate oun thua vae hae paw, seetangnaw kyate oun ki hae paw nynh Israel Pachia kalan maee-ute silawnaw kha rae hae zah Israel hae balyn hanlan tangnuapaw sa haw lae ning, tuutepaw sung takua sa taruh, tuutaw sung sari sa sari, te seithyaanaw silawnaw lang miaatepaw sa haw lae ning te silawnaw a rae hae; e hae balyn hynh BAWIPAW kalan raepaw maee-ute silawnaw nynh thua.

³⁶Siapharan nynh a khangpaw bawi lepaw hae kalan te Vaw Khuraw lang ram e uktu bawi hae kalan khe siapharan nynh a zeipaw kawthopaw ccaw kha mah minmin nynh a pya hae; te tuh-e hae nynh ccungccaw hae te Pachia inn kha a bawm hae.