Read Zotung Chin NEHEMIAH 2 Bible Online

NEHEMIAH 2 - Zotung Chin bible

NEHEMIAH 2

¹Siapharan Artazaksis nynh siapharan lang a tangnaw kum kuinnaw, Nisan sawpaw khe, amaw kha misutui dang athua lyakhe misutui kha ka ccyng zah siapharan kha ka pya. Tuh maw lya tuh amaw malang ka ngaethah boi khyh.

²Tukeiccuze siapharan nynh kae kha, “Mang na dan pite pawccemou na maesue hoy khyh rei? E hynh na thinlung a ngaethyanaw nynh thua,” cite yn cipya. Tetuh myarya ka rih.

³Kae nynh siapharan kha, “Siapharan tuh a hiinkhua zungzae sae vae sah! Ka minpaaw hae shawku a umnaw khua tuh roh zah a koikua hae tuh maee nynh marya a u lyakhe pawccemou ka maesue tuh ro leite a um cih?” ka cipya.

⁴Te siapharan nynh kae kha, “Pawmou nae ngia ry?” yn cipya. Tukeiccuze vaawlang Pachia kalan saw ka sang.

⁵Te kae nynh siapharan kha, “Siapharan nynh na ry zah na ryalahtupaw nynh na tungvaw kya maehoynaw ka mue zetuh, kae minpaaw hae shawku a umnaw khua kha raethui khylan Judah ram lang, tuh-e khua kalan kae hynh beih yn saw,” ka cipya.

⁶Siapharan nynh kae kha (siapharan bawinung mah a pe a haung), “Na ccia ze hohsemou nae ro cih? Hohtuhmou nae ki cih?” yn cipya. Tuhcite siapharan nynh kae kha yn cciasah ry zah, kae nynh ninsaw kha ka hopya.

⁷Tukoute kae nynh siapharan kha, “Siapharan nynh na ry zetuh, Vaw Khuraw lang ram a uktu hae nynh kae hynh Judah ram ka thua cia ccianaw kaw yn ua nawlan hae ccaw beih yn pya;

⁸beikinn rhawlungrua sakoih hae hanlan, khua koihnawpaw khualungrua hanlan te ka umnaw lanpaw inn hanlan thing kha yn pya nawlan, siapharan tuhpi a uktu Asaf kalan pya lanpaw ccaw kha beih yn pya,” ka cipya. Ka Pachia a thawccinaw kuih tuh ka tungvaw a um keiccuze ka ngiapaw kha siapharan nynh yn ua.

⁹Te Vaw Khuraw lang ram uktu hae kya ka thua zah siapharan ccaw kha ka pya hae. Siapharan nynh rhawbawi hae te marang rhawkaw hae kha ka kya a cciasah bua hae.

¹⁰Israel ccungccaw hae hoynaw kha ccungpya khylan ccungccaw lu kheit yn thua cipaw kha Horon ccungccaw Sanballat te Ammon ccungccaw bawi lu kheit Tobiah nynh he a thae hae tuh myaryamaw mih lunghoy khyh.

¹¹Tuhcite Jerusalem ka thua zah nin thum ka um.

¹²Ka kya um hae paw ccungccaw beihtaraw ryte khuazi khe kae thokuh; Jerusalem hanlan cyi lan ka Pachia nynh ka thinlung kya yn sangpaw kha tuh humhung mah ka hopah khyh. Ka ccikupaw sahiin laelan pawpaw sahiin mah ka kya um khyh.

¹³Khuazi khe Accya Koikua kyate ka pou zah Nakaa-hupi Tuisung po khung lang Athupaw Koikua kyacia ka cceih, te atingpaw Jerusalem khualungrua te maee nynh a ropaw a sakoih hae kha ka do hae.

¹⁴Te Tuidy Koikua te Siapharan Tuili kyacia po ka cceih; thuasalama ka ccikupaw sahiin hanlan po ccia nawlan laanpi um khyh.

¹⁵Tukeiccuze khuazi khe accya laanpi kyate ka cceihthung zah khualungrua kha ka do. Te nulang ka maeleihkuh zah Accya Koikua kyate ka tee zah ka ki.

¹⁶Teilangmou ka ccia cipaw te pawmou ka cyi cipaw kha bawi hae nynh nyh khyh hae; Judah hae, ranpibawi hae, cciakhaetu hae, bawi hae te tuhlaepaw ccungccaw hae kha ryalaw lanpaw ka hopah loh khyh hae.

¹⁷Te kae nynh minmin kha, “Aening ah teing oh paw vawsawnaw, Jerusalem a ronaw te a koikua hae tuh maee nynh a upaw kha na muih oh. Aening nynh thethyanaw ah ccou vae khyh nawlan oh, rang oh, Jerusalem khualungrua kha raethui oh sih,” ka cipya hae.

¹⁸Ka Pachia thungnaw nynh ka tungvaw thawccinaw a hoipaw kha thuasah, siapharan nynh yn hopyapaw bya kha mah thuasah ka hopya hae. Tetuh minmin nynh, “Tho oh sih lah, sak oh sih!” a ci hae. Tuhcite rya hoypaw law khylan mih thawzung kha a pyaku hae.

¹⁹Thuasalama Horon ccungccaw Sanballat, Ammon ccungccaw bawi lu kheit Tobiah te Arab ccungccaw Geshum nynh tuh-e tuh a thae hae tuh, kaening kha nuinsete oun sarya hae zah, “E na cyi oh paw hynh pawmou athua? Siapharan tou na dou oh?” oun cipya hae.

²⁰Kae nynh minmin kha, “Vaaw Pachia nynh laansui-uanaw oun pya cih zah, amaw ryalahtu hae kaening nynh kae tho cih zah kae sak cih; thuasalama nanning tuh Jerusalem khua kya ccoupaw nae kya-e thuasah, nae hanpaw thuasah, syntawnawpaw ccaekia thuasah na hoi khyh oh,” cite ka khung hae.