Read Zotung Chin NEHEMIAH 4 Bible Online

NEHEMIAH 4 - Zotung Chin bible

NEHEMIAH 4

¹Kaening nynh khualungrua kae raepaw kha Sanballat nynh he a thae tuh, myaryamaw a thinria zah Judah hae kha a sarya hae.

²A uno hae te Samaria rhawkaw hae malang khe aning nynh, “E athawzyapaw Judah hae hynh pawmou a cyi hae? Uccaw hynh a raekuh thui cih hae tou? Silawnaw a rae cih hae tou? Nin kheit te a lyn cih hae tou? Maee nynh a upaw lung hae kha athupaw apumkuhpaw lungkhu kyate a raethui cih hae tou?” a ci.

³Ammon ccungccaw Tobiah tuh a pe khe um zah aning nynh mah, “Minmin nynh a rae hae paw lungrua vawlan khe suizaw nynh a kaenaw ze ating cih!” a ci.

⁴Pou kae Pachia, kaening hynh oun theihrya hae keiccuze beih oun thaepya tua; mih saryanaw bya kha mimaw lu vawlan ccawsah tua, te kyng hae zah a cciakhaenaw hae ram kyakhe luadenaw a teingpaw ccungccaw lang tang sah hae.

⁵Mih cyiseinaw kha bongpah nan hae lah, mih seinaw kha na muihnaw kyate thepah nan hae; pawccecize minmin nynh khualungrua a raetu hae malang saryanaw bya a ho hae.

⁶Tuhcite khualungrua kha kae rae zah, ahangpaw angankuh cia po lekuh lan rae athua vae; pawccecize ccungccaw hae tuh ryalaw rynaw thinlung a hoi hae.

⁷Thuasalama Jerusalem khualungrua raethuinaw rya tuh dyadya cceihthya zah a uanaw hmin hae tuh a ping takaw vae hae cipaw kha Sanballat, Tobiah, Arab hae, Ammon hae te Ashdod ccungccaw hae nynh he a thae hae tuh, myarya mih thinria zah,

⁸Jerusalem kha ccianuate tuk lan zah vawsawnaw pya lan cite mih balyn te pynkheihlan khua a khanku hae.

⁹Tukeiccuze kae Pachia kalan saw kae sang zah, minmin kyate oun thungkhawtu lang rhawviatu kha khuazi khuadae kae nung.

¹⁰Thuasalama Judah hae nynh, “Phupaw phutu hae tuh mih thawzung athang vae, athupaw tuh myaryamaw lung zah khualungrua phe thang lan ryalaw kho lei lan,” a ci hae.

¹¹Te kae rhaw hae nynh mah, “Minmin nynh pawpaw mah a ny maw hae te a muih maw hae khe, ccianua lan hae zah chia lan hae, te ryalaw kha ro lan,” a ci hae.

¹²Rhaw hae pe a umpaw Judah hae nynh oun cceih hae zah kae kyakhe, “Rhaw hae nynh mih umnaw miakaw kyate tuk lan oun ccianua cih hae,” cite vae haw oun hopya hae.

¹³Tukeiccuze khualungrua nulang, anenaw hmin, accawnghannaw hmin kyakhe ccungccaw hae kha mih puizia raveihte, mih thaloi, mih ccoi te mih li hae ryte ka nung hae.

¹⁴E hae balyn kha ka dopah kou hae te, ka thadyn zah cciakhaetu hae, bawi hae te tuhlaepaw ccungccaw hae kyakhe, “Minmin kha rih nan oh. Alesaepaw te ri lan umpaw BAWIPAW kha ning nan oh lah, nae vaeccaw hae, nae ccapaw hae, nae ccanung hae, nae zu hae te nae inn nae loo hanlan rhawtuk oh,” ka cipya hae.

¹⁵Mih paccynkunaw kha Pachia nynh roh zah kaening nynh kae ny vae cipaw kha kae rhaw hae nynh he a nyh hae tuh, kae balyn mawte khualungrua kalan kae ki zah mawmaw rya raveih kha bua kae lah.

¹⁶Tuin nin te vae tuh, ka ccungccaw hae angankuh tuh ryalah hae zah, angankuh tuh ccoi, khawriaphua, li te sivaw angki kha a ccyngku hae; cciakhaetu hae tuh khualungrua a rae hae paw Judah hae nulang khe a um hae.

¹⁷Phupaw phutu hae nynh mih kuih voikheit te mih uccaw kha kyng hae zah ccangpaw voikheit te mih zunghe kha a kyng hae.

¹⁸Ryalahtu hae balyn nynh rya a lah lalia lan hae te mih tae kyakhe mih thaloi kha ccarou a keku hae. Mungkae a tupaw tuh ka pe khe a um.

¹⁹Kae nynh cciakhaetu hae, bawi hae te tuhlaepaw ccungccaw hae kha, “Rya tuh myarya le zah myarya ko lan apazaekuh, aening mah khualungrua vawlan khe ah phiakuh oh zah lu kheit te lu kheit ah sawkuh oh.

²⁰Tukeiccuze mungkae roi na thaenaw oh hmin takyh kyate kae kalan nae pumkuh cih oh. Ah Pachia nynh aening hanlan rhaw oun tukpah cih,” ka cipya hae.

²¹Tuhcite rya kae lah zah ccungccaw angankuh nynh khuadaetakaw te awsi phe alang cia ccoi a ccyngku hae.

²²Tuh ccyh lyakhe kae nynh mah ccungccaw hae kha, “Ccungccaw miakaw nynh a ryalahtupaw ryte Jerusalem khua kya khuazi a rya cih, tuhteze nynh minmin tuh khuazi kya aening elang rhawviatu athua cih hae zah khuadae kya rya a lah cih hae,” cite ka hopya hae.

²³Tuhcite kamaw thuasah, ka uno hae thuasah, ka ryalahtu hae thuasah, kae yn zui hae paw rhawviatu hae thuasah boeining kae khahkuh khyh; lu raveih nynh zunghe kha ranglang kuih kya tyty kae ccyngku.