Read Zotung Chin NEHEMIAH 5 Bible Online

NEHEMIAH 5 - Zotung Chin bible

NEHEMIAH 5

¹Te ccungccaw hae tuh mih zu hae ryte mih uno Judah hae kha rawsete thawte a sia hae.

²Ccungccaw abang nynh, “Kae ccanung hae kae ccapaw hae ryte ccungccaw kae lung; looh kae ae zah kae hiin nawlan looh kae mue hahe aho,” a ci hae.

³Abang nynh, “Kae loo, kae khokhu te kae inn hae kha ccakancci lungkhu looh mue nawlan kae pon vae,” a ci hae.

⁴Abang nynh, “Kae loo hae te kae misu khokhu hae hanlan siapharan kalan ngunto pya khylan phua kae koii hae.

⁵Atu tuh kae pyn tuh kae uno hae pyn hawte nynh kae thua vae; kae ccaaw hae tuh mih ccaaw hae hawte nynh thua vae hae; kae ccapaw hae te kae ccanung hae kha see lang tang lan kae nangse vae hae, kae ccanung hae abang tuh see lang zua athua vae hae; kaening tuh thawzung kae hoi vae khyh zah kae loo hae te kae misu khokhu hae tuh milae uccaw lang nynh a tang vae,” a ci hae.

⁶Mih siaruanaw te tuh-e mih lungccing leinaw bya hae tuh he ka thae te, myarya ka thinria.

⁷Tuh-e tuh hoyte ka tua koute, cciakhaetu hae te bawi hae kha seisahnaw bya ka hopah hae zah, “Nanning nynh naemaw ccungccaw hae kya-e ato kha na ae oh,” ka cipya hae. Te minmin ryte bya hopiaku khylan ccungccaw zapi patae kha ka ko hae zah,

⁸“Minphuin ccangpaw hae kalan zua athuapaw ah uno Judah hae kha aening nynh ah taening oh thyhte ah kikhae oh; thuasalama nanning nynh nae uno hae kha na zua oh zah, kaening nynh bua kae rethui hae aho cih!” ka cipya hae. Minmin tuh ho lanpaw bya kaw kheit san nykuh vae khyh hae zah daebabi lan a um hae.

⁹Tukeiccuze kae nynh, “Na cyi oh paw hynh hoy khyh. Ah rhaw hae minphuin ccangpaw hae nynh aening hynh oun sarya khyh nawlan hae, ah Pachia rawrite na hiin lan oh ccan khyh tou?

¹⁰Tuhpiaze kae te ka uno hae te ka ryalahtu hae nynh minmin kha phua te looh kae koiisaku hae. E ato lawkupaw hynh umtaw ccavae oh sih.

¹¹Atunin ccaccei maw, mih loo, mih misu khokhu, mih oliv khokhu, mih inn, phua ato na law oh paw, looh, misutui te chitui, minmin kya-e na law oh paw kha mimaw kalan kii oh,” ka cipya hae.

¹²Tetuh minmin nynh, “Abalynte kae kii cih hae zah minmin kyate pawpaw mah kae ngia vae lan khyh hae. Na ho hawte kae cyih cih,” a ci hae. Te ranpibawi hae kha ka ko hae zah, tuh-e hae nynh bya a kinku hae hawte a cyi nawlan hae, thyalawkunaw ka raesah hae.

¹³Kae nynh mah ka tae kya ka voikupaw boeining kha ka thyng zah, “E byakinkunaw a zui leipaw miakaw tuh inn kyate thuasah, sisua kyate thuasah hynhcite Pachia nynh thyng vae sah. Minmin tuh hynhcite thyng thua hae sah lah, accakaepaw lang cciataw thua hae sah,” ka ci. Te ccungccaw zapi balyn nynh, “Amen,” ci hae zah BAWIPAW kha thehoysah hae. Te ccungccaw hae nynh bya a kinku hae hawte a cyi hae.

¹⁴Tuhpiaze Judah ram a uktu lang khang ka thua ccyh kyate, Artazaksis Siapharan nynh siapharan lang a tangnaw kum kuinnaw te sung thum kum ningnaw cia, kum haw lae ning lungkhu, kae te ka uno hae tuh uktu bawi looh kha kae ae khyh.

¹⁵Kae ka maw e uktu rynpaw hae nynh ccungccaw hae kha phupaw ripaw phusah hae zah, minmin kyate ngun shekel sung pali apiaze looh te misutui kha a lawku hae. Mih ryalahtu hae nynh heize ccungccaw hae tungvaw phupaw a risah hae. Thuasalama kae tuh Pachia raw ka ri keiccuze tuhte ka cyih khyh.

¹⁶E khualungrua rya kyahin kamaw te kamaw ka pyakuh zah ka lawkupaw laephi um khyh; ka ryalahtu balyn tuh khuing kya ryalaw lan a sueluakuh hae.

¹⁷Tuhpiaze ah pepan e minphuin hae kyate ah kalan oun thua hae paw kha hobia leite, Judah hae te bawi hae za kheit sung pangaw tuh ka ccaboi kya tyty a ae hae.

¹⁸Nin kheit hanlan tangnuapaw sa kheit te popaw tuu sa taruh kha a paccyn hae; aw hae kha mah ka hanlan yn paccynpya hae; nin haw ze vae kheit misutui kha saving tui-ung te patae yn pya hae; tuhzemah ccungccaw hae tuh mih phupaw ari keiccuze uktu bawi nynh a lawku lanpaw looh kha ka lawkuh khyh.

¹⁹Pou ka Pachia, e ccungccaw hae hanlan ka cyipaw balyn hynh ka hoynaw elang beih yn ningpah nan.