Read Zotung Chin NEHEMIAH 6 Bible Online

NEHEMIAH 6 - Zotung Chin bible

NEHEMIAH 6

¹Khualungrua kha ka rae kou vae zah a uanaw um vae khyh cipaw kha Sanballat, Tobiah, Arab ccungccaw Geshem te tuhlaepaw kae rhaw hae nynh he a thae hae tuh (tuin ccyh kyacia koikua hae kya thuakaw hae kha ka bing loh khyh zemah),

²Sanballat te Geshem nynh ka kalan ccungccaw oun saw hae zah, “Yn cceih lah Ono bialae e khua khuakheit kya tungku tua oh sih,” yn cipya hae. Thuasalama minmin nynh kae kha vawsaw pya lan oun nounuaku hae.

³Tukeiccuze minmin kalan locceihtu hae ka saw hae zah, “Kae tuh myarya lepaw rya kha ka lah cciamang zah kae cceihbung lan khyh. Nanning kalan cciabung khylan pawccemou rya kha ka cciataw cih zah ka um cih?” ka cipya hae.

⁴Tuhcite vae pali cia bya yn taw hae zah, kae nynh mah tuhmaminte ka khungru hae.

⁵Tuhmaminte vae pangawnaw kya Sanballat nynh a ryalahtupaw kha yn saw zah tazeih khiakuh leipaw ccaw kha ka kalan yn pyasah.

⁶Ccaw lungkhu khe, “Nang te Judah hae tuh rhawtho lan na paccynkuh oh cite minphuin hae laku kya bya athan, Geshem nynh mah a ho; tukeiccu nynh khualungrua hynh na rae oh; tuh-e bya thyhte nang tuh mih siapharan lang tang na ry.

⁷‘Judah ram kya siapharan a um!’ cite na konglang Jerusalem kya a siakhae lanpaw profeh hae kha mah na nung vae hae. Atu tuh e bya hae thyhte siapharan kha thaesah athua cih. Tukeiccuze yn cceih lah, la hokheih tua oh sih,” a cipya.

⁸Tetuh kae nynh a kalan ccungccaw ka saw zah, “Nang nynh na ho hawte ryalawpaw pawpaw mah um khyh; namaw na tuanaw te tuh-e hae tuh na raekupaw nynh thua,” ka cipya.

⁹Pawccecize minmin nynh kaening kha mih thawsia sah ci ry hae zah, “Ryalaw kha umtaw hae sah lah, rya kha lyn nan hae sah,” cite a tua hae. Thuasalama pou Pachia, ka kuih hynh thawzung pyatua.

¹⁰Nin kheit tuh Mehetabel ccapaw athuapaw Delaiah a ccapaw Shemaiah, a inn kyate a pou kho leipaw ccungccapaw inn lang he ka cceih tuh, aning nynh, “Pachia inn, beikinn lungkhu kya tungku tua sih lah, beikinn thuakaw hae kha khaw sih, pawccecize nang kha chia khylan oun cceih cih hae, atu khuazi nang kha chia khylan solei oun cceih cih hae,” yn cipya.

¹¹Thuasalama kae nynh, “Kae tahawpaw ccungccaw nynh a ccue cih zawtou? Kae tahawpaw ccungccaw nynh a hiinnaw khyn khylan beikinn lungkhu lang a tee cih zawtou? Ka tee lan khyh!” ka ci.

¹²Pachia nynh aning kha yn sawpaw thua leite, Tobiah te Sanballat nynh amee pyate a hoh hae keiccuze kae kha rawsenawpaw bya a ho cipaw ka nyh zah ka muih.

¹³Minmin nynh kae kha theihryapaw lang a tang ccaw cite, kae kha siisakute tuhcite cyi liate seinaw rae sah lah, a minthu sah cite tuh-e paw tuh a hoh hae.

¹⁴Pou ka Pachia, Tobiah te Sanballat hynh a cyi hae paw e uccaw hae thyhte syntaw hae lah, profehnung Noadiah te kae oun risah ry hae paw tuhlaepaw profeh hae kha mah syntawtua hae.

¹⁵Khualungrua tuh sung pangaw nin ning aro te, Elul sawpaw nin kuin lae pangaw nin khe lyn athua.

¹⁶Kae rhaw hae balyn nynh tuh-e tuh he a thae hae te, kae pepan e minphuin hae balyn tuh rih hae zah mimaw te mimaw a zynkunaw hae kha myarya azyabung; pawccecize e rya tuh kae Pachia bawmnaw liate lyn athua vae cipaw kha a ny hae.

¹⁷Tuhpiaze tuh ccyh lya tuh Judah cciakhaetu hae nynh Tobiah kha ccaw patae ky hae zah Tobiah ccaw mah minmin kya a thua.

¹⁸Tobiah tuh Arah ccapaw Shekaniah ccanung a vawpaw athua keiccuze Judah hae patae tuh Tobiah kalan byakinkute a pan hae: a ccapaw Jehohanan nynh Berekhiah ccapaw Meshullam ccanung kha zu lang a hoi.

¹⁹Tobiah nynh hoynaw a raepaw kong kha mah minmin nynh yn honua hae zah, ka bya kha amaw kalan a thaesah hae. Te Tobiah nynh kae kha a thawsia sah cite ccaw yn ky.