Read Zotung Chin NEHEMIAH 8 Bible Online

NEHEMIAH 8 - Zotung Chin bible

NEHEMIAH 8

¹Sawpaw sah sarinaw he yn thua zah Israel ccungccaw hae tuh mimaw khua raveih kya he a um hae te, ccungccaw hae balyn tuh Tui Koikua malang accawnghannaw hmin khe a pumkuh hae. BAWIPAW nynh Israel a pyapaw Moses kawbya ccauh kha yn ccyng cite kawbya sazae Ezra kha a hopya hae.

²Ranpibawi Ezra nynh kawbya tuh thae kho zah a thaethyapaw balyn, nopi pise ccungccaw zapi malang khe sawpaw sah sarinaw nin kheit nin kya a thuakhae.

³Ezra nynh tuh-e ccauh tuh awkhua takaw te ninthu cia Tui Koikua malang accawnghannaw hmin kalan hawi zah, a thaethya khopaw nopi pise malang khe a ria; ccungccaw balyn nynh kawbya ccauh tuh pekite a ngae hae.

⁴Byaho nawlan a rae hae paw thing aduakuhpaw vawlan khe Ezra tuh thadyn zah amaw pe a ranglang khe Mattithiah, Shema, Anaiah, Uriah, Hilkiah te Maaseiah tuh a thadyn hae; a voilang khe Pedaiah, Mishael, Malkhijah, Hashum, Hashbaddanah, Zekhariah te Meshullam tuh a thadyn hae.

⁵Te Ezra nynh ccauh tuh ccungccaw balyn muihnaw khe a kia, aning tuh ccungccaw balyn laeze ahangnaw khe a thadyn; ccauh he a kia te, ccungccaw balyn tuh a thadyn hae.

⁶Ezra nynh BAWIPAW , alesaepaw Pachia kha a thehoysah, te ccungccaw balyn nynh mih kuih hang hae zah, “Amen, Amen,” a ci hae. Te mih lu bakhung hae zah laekhu kya bakhungte BAWIPAW kha a beik hae.

⁷Ccungccaw hae tuh mih umnaw kya a um lya hae khe Levi phin hae Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan te Pelaiah nynh mah ccungccaw hae nynh kawbya a thaethya nawlan hae a bawm hae.

⁸Tuhcite Pachia kawbya ccauh kha byaleih biate a ria hae. Ccungccaw hae nynh a ria hae paw kha a thaethya nawlan hae asuilan a ccaesahpya hae.

⁹Ram uktu Nehemiah, ranpibawi te kawbya sazae athuapaw Ezra te ccungccaw hae a ccangpahtu Levi phin hae nynh ccungccaw hae kha, “Atunin hynh BAWIPAW nae Pachia hanlan nin thyaapaw nynh thua; nae ngaethah nan sah, raw mah rah nan oh,” a cipya hae. Pawccecize ccungccaw balyn tuh kawbya kya-e bya kha he a thae hae tuh a rah hae.

¹⁰Te aning nynh minmin kha, “La cceih oh, looh athuathuapaw kha la ae oh lah, misutui a-epaw kha la neih oh, te pawpaw mah a hoi lei hae paw kha la neethungbua oh; pawccecize atunin tuh ah BAWIPAW hanlan athyaapaw nin nynh thua; BAWIPAW kya nae lungtuanaw tuh nae thawzung athua keiccuze nae ngaethah nan sah,” a cipya hae.

¹¹Tukeiccuze Levi phin hae nynh ccungccaw balyn kha daesah hae zah, “Atunin tuh athyaapaw nin athua keiccuze daebabi lan umtua oh; nae ngaethah nan sah,” a cipya hae.

¹²Te ccungccaw balyn nynh a hopya hae paw bya kha a thaethya hae keiccuze ae khylan, nia khylan, milae hae kha neethungbua khylan te lungpawnaw pipi rae khylan a cceih hae.

¹³Nin ningnaw nin khe ccungccaw balyn laku e puizia raveih kya-e lupi hae tuh ranpibawi hae te Levi phin hae ryte kawbya kya-e bya hae kha ccangku khylan kawbya sazae Ezra kalan a cceihkheih hae.

¹⁴Sawpaw sah sarinaw poi tua lungkhu Israel hae tuh bu kya a um cih hae, cite BAWIPAW nynh Moses kyate kaw a pya hae paw kawbya lungkhu kya azeikuhpaw kha a muih hae,

¹⁵mih khua hae balyn kya te Jerusalem khua kyakhe, “Mua hae kalan cceih oh lah, oliv nge hae, maeccaw nge hae, martal thing ange hae, ungcci ku ange hae te ccangpaw anaw saepaw thing hae kha kawbya kya azeiku thyhte bu sak nawlan oun thuakhae oh,” cite a thaesah hae.

¹⁶Tukeiccuze ccungccaw hae tuh cceih hae zah thingnge hae kha oun thuakhae hae zah, mih innccuvaw kya thuasah, mih inn voidu te Pachia inn voidu lungkhu thuasah, Tui Koikua kya accawnghannaw kya thuasah, Efraim Koikua accawnghannaw kya thuasah bu kha ccarou a sakku hae.

¹⁷Seetangnaw kyate a ki hae paw a pumkuh hae paw zapi balyn nynh bu sakkuh hae zah tuin kya a um hae; Nun ccapaw Jeshua she kyate tuin nin cia Israel ccungccaw hae nynh tuhte la cyih boi khyh hae. Myaryamaw mih lungpaw.

¹⁸Masaty nin kyate nyathya nin kyacia nin takyhte Pachia kawbya ccauh kya-e kha a ria. Nin sari lungkhu poi a tua hae; nin taryanaw nin khe phungzae thyhte athyaapaw pumkunaw a hoi hae.