Read Zotung Chin EXODUS 12 Bible Online

EXODUS 12 - Zotung Chin bible

EXODUS 12

¹BAWIPAW nynh Moses te Aaron kha Izip ram kya hynhte a hopya hae:

²“Atu sawpaw hynh nae hanlan sawpaw he athonaw a thua cih; nanning hanlan kum kheit lungkhu ze sawpaw masaty[3] a thua cih.

³Nanning nynh Israel zapi hae kha hynhte na hopah cih oh: Atu saw nin hawnaw nin kya innbyn raveih hanlan innbyn byn kheit nynh tuutaw sa kheit cci kha na paccynkuh cih oh.

⁴Tuutaw sa kheit a pyn balyn kha a ae cih paw innbyn kya-e ccungccaw tuh eih azya lanze, anaekuh huapaw innbyn ryte na mungkuh cih oh zah, a ae lanpaw milu thyhte tuutaw kha na neekuh cih oh.

⁵Nae tuutaw tuh douccahpaw a thua cih zah kum kheit beih vae paw pise a thua cih; tuu zemah thuasah, miaa zemah thuasah na paccyn kho oh.

⁶Tuh-e tuutaw tuh atu sawpaw nin haw lae pali nin cia na nung cih oh; oute tuh-e nin zetesang kyakhe Israel ccungccaw balyn nynh tuh-e tuutaw tuh na theih cih oh.

⁷Tuutaw chii abang kha na lah cih oh zah, tuh-e tuutaw saw na ae cihnaw oh inn thuakawtung tungning kya te avawlan e thuakawccaw kyakhe na noi cih oh.

⁸Tuh-e nin khuazi khe saw kha maee te na e cih oh zah ransi phing leipaw sanlou te akhahpaw anaw-athae ryte na aede cih oh.

⁹Saw kha ahe te thuasah, tui te thungte thuasah na ae lan khyh oh, thuasalama alu, accu hae, alungkhu e aring-akua hae balyn ryte maee kya na e cih oh zah na ae cih oh.

¹⁰Alaepaw kha awkhua cia na nung lan khyh oh; alaepaw tuh awkhua cia a um ze, maee te na u cih oh.

¹¹Khah-e kha pawtemou na ae cih oh ci lanze: nae taevoiboei kha na voikuh cih oh, nae phanah kha na nawkuh cih oh zah nae hoitang kha na kyng cih oh; te arangte na ae cih oh. Tuh-e tuh BAWIPAW kya-e kawtaw poi nynh thua.

¹²Pawccecize tuh-e khuazi khe Izip ram balyn phe lekuh lan ka cceih cih zah Izip ram umpaw ccungccaw ccatawccaw miakaw te sarangpaw thanty miakaw kha ka theih cih hae; Izip ram e pachia hae kha bya ka pia cih hae; kae tuh BAWIPAW nynh ka thua.

¹³Chiise tuh na umnaw oh inn kya nae hanlan syntawnaw athua cih; chiise kha he ka muih tetuh nanning kha kae kawtaw cih oh zah Izip ram kha de he ka tah te, shethya nynh nanning kha ae roh lan khyh oh.

¹⁴“E nin hynh nae hanlan liathuipaw nin a thua cih zah BAWIPAW kalan beiknaw poi lante nae she takyh kya zungzae tynpaw phungzae lang na zui cih oh.

¹⁵Nin sari lungkhu ransi phing leipaw sanlou kha na ae cih oh; masaty nin kya ransi kha nae inn kyate ccanglang na nung cih oh, pawccecize humhung zemah masaty nin kyate nin sarinaw nin kyacia ransi phingkuhpaw sanlou a aepaw tuh Israel phin kyate vua a thua cih.

¹⁶Masaty nin te nin sarinaw nin kyakhe athyaapaw pumkunaw kha na rae cih oh; tuh-e nin hae kya rya na lah lan khyh oh; na ae lan oh paw looh hanlan rou kha rya na lah cih oh.

¹⁷ransi phing leipaw sanlou poi kha na tua cih oh, pawccecize hynh-e nin ccaccei khe nanning kha aphuphute Izip ram kyate kae poukhae oh; tukeiccuze hynh-e nin hynh nae she takyh kya zungzae tynpaw phungzae lante na zui cih oh.

¹⁸Masaty sawpaw kya, nin haw lae palinaw nin zete kyate nin kuin lae kheitnaw nin zete kyacia ransi phing leipaw sanlou kha na ae cih oh.

¹⁹Nin sari lungkhu nae inn kya ransi um lan khyh; humhung zemah ransi phingpaw sanlou a aepaw tuh ramccangpaw thuasah, ram kya-e ccungccaw thuasah, Israel phin aphu kyate vua a thua cih.

²⁰Ransi phingpaw sanlou kha na ae lan khyh oh; na umnaw oh kya ransi phing leipaw sanlou kha na ae cih oh,” a cipya hae.

²¹Oute Moses nynh Israel piccan balyn kha ko hae zah, “La cceih oh lah nae innbyn raveih hanlan tuutaw kha pokuh oh lah kawtaw poi hanlan theih oh.

²²Hyssop ku ange ngekheit kha lah oh lah pakepi kya umpaw chii kyakhe dung oh, te pakepi kya umpaw chii khate thuakawtung tungning te thuakawccaw kha noi oh. Awkhua cia nae inn thuakaw atolang na pou lan khyh oh.

²³Pawccecize BAWIPAW tuh Izip hae kha detah khylan phe lekuh lan yn cceih cih; aning nynh thuakawtung tungning te thuakawccaw kya anoikuhpaw chiise kha he a muih tuh, BAWIPAW nynh khah-e thuakaw kha a kawtaw cih zah nanning chia khylan nae inn lungkhu lang rohtu hae tee lanpaw kha kaw-ua lan khyh.

²⁴Naemaw te nae ccaaw hae nynh e phung hynh zungzae tynpaw phungzae lante na zui cih oh.

²⁵BAWIPAW nynh bya ae kinpyaku oh hawte ae pya cih oh paw ram kya he na thua oh te, e naawpawphung hynh na tynsah cih oh.

²⁶Te nae ccaaw hae nynh, ‘E naawpawphung asuilan tuh pawmou athua?’ cite ae khia oh ze,

²⁷nanning nynh, ‘BAWIPAW kalan pyapaw kawtaw silawnaw nynh thua, pawccecize BAWIPAW nynh aening inn kha luesah zah Izip hae kha de he a tah hae tuh, Izip ram umpaw Israel hae inn kha phe a kawtaw,’ cite na hopah cih oh,” a cipya hae. Te ccungccaw hae nynh bakhung hae zah a beik hae.

²⁸BAWIPAW nynh Moses te Aaron kalan kawpya hae thyhte Israel hae nynh cceih hae zah a cyi hae.

²⁹Ziraccyng khe BAWIPAW nynh Izip ram e ccatawccaw balyn kha a chia hae, bawi haungnaw kya a haungpaw Faro a ccatawccaw kyate tho zah thong lungkhu umpaw thongccahpaw a ccatawccaw kyacia a chia hae, te sahiin-awvaw kyaze thanty balyn kha a chia hae.

³⁰Faro te a ryalahtu bawi hae balyn te Izip hae balyn tuh khuazi khe a tho hae; Izip ram kya rawkhuinaw te phe a beih, pawccecize michi a um leinaw inn innkheit sanmah um khyh.

³¹Oute Faro nynh Moses te Aaron kha khuazi khe ko hae zah, “Naemaw te Israel hae tuh thokuh oh lah ka ccungccaw hae kyate cceih oh. Na ho oh hawte cceih oh lah BAWIPAW kha la beik oh.

³²Na ho oh hawte nae tuu, nae miaa te nae vaetua hae kha cciakhae oh lah pou oh. Te kamaw hynh mah hythuanaw yn pya oh!” a cipya hae.

³³Izip hae nynh, “Kae balynte pong kae chih vae cih,” ci hae zah ram kyate arangte a pou nawlan hae, Israel hae kha a ngia hae.

³⁴Tukeiccuze Israel hae nynh ransi phingkuh leipaw vaekhui kha lah hae zah mih uccaw te a tung hae paw sanlou nonnawpaw pake ryte mih raw kya a puih hae.

³⁵Moses nynh a hopya hae thyhte Israel hae nynh Izip hae kha sui uccaw, ngun uccaw te boeiningsungpue kha a ngia hae.

³⁶Israel hae nynh a ngia hae paw kha Izip hae nynh a pya nawlan hae, BAWIPAW nynh Israel hae kha Izip hae mitmuihnaw kya maehoynaw a pya hae. Tuhcite Israel hae nynh Izip hae uccaw kha a luade hae.

³⁷Israel hae tuh Rameses khua kyate Sukkoth lang cceih hae zah nopi te imua holeite pise milu thung za taruh loukaw acih hae.

³⁸Ccangpaw ccungccaw zapi hae mah sahiin-awvaw hae tuu, miaa te vaetua hae patae ryte a cceihbua hae.

³⁹Minmin nynh Izip ram kyate a poukhae hae paw ransi phing leipaw sanlou kha maee kya a rua hae; minmin kha Izip ram kyate arangte a dee hae keiccuze ransi kha phing vae khyh hae, mimaw hanlan looh kha paccynkuh mang vae khyh hae.

⁴⁰Israel hae tuh Izip ram kya kum za pali sung thum a um hae.

⁴¹Kum za pali sung thum he accing nin ccaccei khe BAWIPAW ccungccaw balyn tuh Izip ram kyate a pou hae.

⁴²Tuh-e khuazi tuh BAWIPAW nynh minmin kha Izip ram kyate poukhae khylan phang a ngaw hae paw khuazi nynh thua; tukeiccuze tuh-e khuazi tuh Israel hae nynh mih she takyh kya BAWIPAW hanlan leih a ngaw hae paw khuazi nynh thua.

⁴³BAWIPAW nynh Moses te Aaron kha hopah hae zah, “Kawtaw poi tuanaw phungzae tuh hynhte athua cih: Ramccang ccungccaw nynh kawtaw poi kya ae bua lan khyh,

⁴⁴thuasalama repaw see tuh vingdungaw a thua koute a ae cih;

⁴⁵sohsoh um buapaw nynh thuasah, amee te hohpaw ryalahtu nynh thuasah ae lan khyh.

⁴⁶Saw sa kheit kha inn innkheit kya ae athua cih; saw kha ccapyh sanmah inn atolang na poukhae lan khyh oh, aru ccangkheit sanmah na khya lan khyh oh.

⁴⁷Israel ccungccaw zapi balyn nynh e poi hynh a tua hahe cih hae.

⁴⁸Nae kya um buapaw ramccang ccungccaw lukhakheit nynh BAWIPAW hanlan kawtaw poi kha tua bua a ry zetuh amaw kya umpaw pise balyn kha vingdungaw a thua cih hae; tukoute tuh poi kya a umbua kho vae cih; amaw kha ramccungccaw lu kheit lante riabua athua vae cih. Thuasalama vingdungaw a thua leipaw nynh tuh-e poi kya ae lan khyh.

⁴⁹Israel ccungccaw hanlan thuasah, naemaw kya um buapaw ramccang ccungccaw hanlan thuasah hynh-e upadi ccangkheit kyalya a um cih,” a cipya hae.

⁵⁰BAWIPAW nynh Moses te Aaron kalan kawpya hae thyhte Israel hae balyn nynh a cyi hae.

⁵¹Tuh-e nin ccaccei khe BAWIPAW nynh Israel hae kha Izip ram kyate aphuphute a cciakhae hae.