Read Zotung Chin EXODUS 22 Bible Online

EXODUS 22 - Zotung Chin bible

EXODUS 22

¹Lukhakheit nynh tangnuapaw khyhze tuu kha ruh zah a chia ze thuasah, a zua ze thuasah miruh nynh tangnuapaw sa kheit hanlan tangnuapaw sa pangaw kha a rung cih zah tuu sa kheit hanlan tuu sa pali kha a rung cih.

²Miruh nynh pyaru lanpaw kharouh a hoi khyh ze, a rupaw hanlan amaw kha zua athua cih. Miruh kuih kyakhe sahiin, tangnuapaw khyhze lann khyhze tuu kha a hiin te muihbia athua zetuh miruh nynh leit ning a rung cih. Miruh nynh inn a kia lyakhe muihbia thua zah phe chih lan bua athua zetuh ccungccaw chiapaw thua khyh. Thuasalama khuanin thua koute acyiku zetuh ccungccaw chiapaw nynh thua.

⁵Lukhakheit nynh milae loo khyhze misu khokhu kha a sahiin a ae sah ze thuasah, a sahiin kha milae loo kya a paeesah ze thuasah, amaw loo khyhze a misu khokhu kya-e ahoy huapaw kha a rung cih.

⁶Maee-u zah lonua hae kha a u keiccuze apumkuhpaw looh thuasah, a thadynpaw looh thuasah loo kha phe a u zetuh maee a soitu nynh phe ccing lan a rung cih.

⁷Lukhakheit nynh phua khyhze uccaw kha a khyn ccaw cite a innpaw kya a ccysahku, te tuh-e uccaw hae tuh a innpaw inn kyate miruh nynh phe ruh zah miruh kha kyngbia a thua zetuh miruh nynh leit ning a rung cih.

⁸Miruh kha muih kho a um vae khyh zetuh inn hoitu tuh a innpaw kya-e uccaw kha a kuih te a ty tou, ty khyh tou cipaw ny nawlan Pachia malang thuakhae a thua cih.

⁹Uccaw luakunaw kong kyaze, a luaku hae paw tangnuapaw, lann, tuu, boeining khyhze a shung hae paw ccangkhakheit kha lukhakheit nynh, “E hynh ka uccaw nynh thua,” cite a ho ze, parouh mawte Pachia malang a thua cih hae; Pachia nynh na sei a cipyapaw kha nynh ccangpaw lu kheit kha leit ning a rung cih.

¹⁰Lukhakheit nynh lann, tangnuapaw, tuu khyhze ccangpaw sahiin sakhakheit kha ccangpaw lu kheit kha a do-oihsah, te tuh-e sahiin tuh a chih, tuhkhyhze vaemaw a mue, tuhkhyhze a muih biapaw um leite lukhakheit nynh ccanglang po a sue ze,

¹¹a do-oihtu te a do-oihsahtu mih lu ning laku kya BAWIPAW malang thyalawkunaw nynh bya a pae cih; a hoitu nynh thyalawkunaw kha a nawccah cih zah a do-oihtu nynh a la ru khyh zetuh rungsah lan khyh.

¹²Thuasalama lukhakheit nynh a la ru zetuh a do-oihtu nynh a hoitu kha a rung cih.

¹³Sarepaw nynh a tei zetuh a chihpaw kha ccaekia lan thuakhae a thua cih, sarepaw nynh a teipaw hanlan rungrunaw um lan khyh.

¹⁴Lukhakheit nynh milae kya-e sahiin kha hoh zah a hoitu a um khyh lyakhe vaemaw a mue, tuhkhyhze phe a chi zetuh a hohtu nynh a rung cih.

¹⁵A hoitu a umbua zetuh a hohtu tuh rung lan khyh; hohpaw a thua zetuh a hoitu nynh hohnaw mee kyalya kha a mue cih.

¹⁶Pise lukhakheit nynh zu lang a dy leipaw liaccaw kha hyy zah a ikhae zetuh mee kha a pya cih zah a zu lang a umkhae cih.

¹⁷Thuasalama liaccanung a paaw nynh a nawccaw khyh zetuh tuh-e pise nynh liaccaw mee kha a rung cih.

¹⁸Puimawnung kha na hiin lan khyh oh.

¹⁹Humhung zemah sarangpaw ryte nopi pise seinaw a raepaw tuh chia a thua cih.

²⁰Humhung zemah BAWIPAW laelan ccangpaw pachia kha si a lawpaw tuh ro a thua cih.

²¹Ramccang ccungccaw kha na dothatheih lan khyh oh zah, na tuaasah lan khyh oh, pawccecize nanning tuh Izip ram kya ramccang ccungccaw lang na tang boi oh.

²²Nomaenung hae khyhze ngawraw hae kha na theihrya lan khyh oh.

²³Minmin kha na theihrya oh zah minmin nynh kamaw kalan a siarua hae zetuh minmin siaruanaw kha solei ka thae cih;

²⁴Ka thinrianaw tuh maee lang a rua cih zah nanning kha thaloi te kae theih cih oh, te nae zu hae kha nomaenung lang a tang cih hae zah nae ccaaw hae tuh ngawraw hae lang a tang cih hae.

²⁵Nanning lakuze a ryachipaw ka ccungccaw hae kha phua na koiisaku oh ze, phua ato lawkute a koiisakuh hae paw hawte minmin tungvaw na cyih lan khyh oh; minmin kyate phua ato kha na ngia lan khyh oh.

²⁶Na innpaw kya-e boei kha ponpaw uccaw lante na law ze, khuanin a ccaw maw, bua na pya cih;

²⁷pawccecize khah-e boi kyalya kha nynh thyku lanpaw a hoi; aning nynh pawtemou a ih kho cih? Aning nynh kamaw kalan a sia zetuh ka ngaepah cih, pawccecize kae tuh thaw a ccihthyapaw nynh ka thua.

²⁸Pachia kha the na thyasah lan khyh, na ccungccaw hae a uktupaw kha thya na law lan khyh.

²⁹Na looh kyaze avoi typaw athae te na su typaw atui kha thysung leite nae pya cih. Na ccatawccaw ccapise kha nae pya cih.

³⁰Tuhawte na vaetua hae te na tuu hae nynh a thanty hae paw kha nae pya cih: nin sari lungkhu a pi kya a umbua cih zah, nin taryanaw nin khe kamaw kha nae pya cih.

³¹Nanning tuh kamaw kya athyaapaw ccungccaw na thua cih oh; tukeiccuze ramkaw kya sarepaw nynh a teipaw saw kha na ae lan khyh oh; ui hae kha na vuapah cih oh.