Read Zotung Chin EXODUS 3 Bible Online

EXODUS 3 - Zotung Chin bible

EXODUS 3

¹Moses tuh Midian ranpibawi a thuapaw, a zu paaw Jethro kya-e tuu hae te miaa hae kha a rin hae, te sahiin hae kha laesia ram akhung langkhe cciakhae hae zah Horeb[2] cikuhpaw Pachia mua kya a thua.

²BAWIPAW vaawpaw tuh thabu lungkhu kyate maeesoi hawte Moses kalan yn langkuh; Moses nynh do zah thabu tuh maee lang a rua, thuasalama thabu tuh u khyh.

³Oute Moses nynh, “Ka ccianua cih zah khuh-e myarya lepaw ka muihpaw ngaeangnaw khuh ka dotua cih, pawcce thabu khuh karae a u khyh cipaw ka dotua cih,” a ci.

⁴Moses nynh dotua lan a ccianua vae cipaw BAWIPAW nynh he a muih tuh, thabu kyate Pachia nynh, “Moses, Moses,” cite a ko. Moses nynh, “Hein kya mang ka um,” a ci.

⁵Oute Pachia nynh, “Oun naekuh nan vae! Na phanah kha khahkuh, pawccecize na thadynnaw hmin kha athyaapaw laephi nynh thua,” a ci.

⁶Te Pachia nynh, “Kae tuh na paaw a Pachia, Abraham Pachia, Isak Pachia, te Jakob Pachia nynh ka thua,” a cipya. Te Moses nynh Pachia kha a do ngan khyh keiccuze a mae kha a khawku.

⁷Oute BAWIPAW nynh, “Izip ram umpaw ka ccungccaw hae vawsawnaw kha phe ka muih vae; minmin tungvaw ryalaw uktu bawi hae keiccuze a siarua hae paw roi kha phe ka thae vae. Mih teingnaw kha ka ny ccaccing vae,

⁸te minmin kha Izip ram kyate luesah khylan, tuh-e ram kyate poukhae khylan, te ahoypaw te akopaw ram, mateitui te khoilutui a luanaw ram, Kanaan hae, Hit hae, Amor hae, Periz hae, Hiv hae te Jebus hae nynh a umnaw hae ram lang cciakhae khylan kae rungbung vae.

⁹Israel hae siaruanaw tuh atu kamaw kya yn thua vae; Izip hae nynh minmin tungvaw pawcihtemou a tuaa a sah hae cipaw kha mah phe ka muih vae.

¹⁰Tukeiccuze atu yn cceih, ka ccungccaw Israel hae kha Izip ram kyate poukhae khylan Faro kalan kae saw cih,” a ci.

¹¹Thuasalama Moses nynh Pachia kha, “Kae tuh pawcihawpaw ccungccaw ka thua zahte mou, Faro kalan cciate Israel hae kha Izip ram kyate ka poukhae lan hae paw tuh?” a ci.

¹²Pachia nynh, “Nang kha kae umkhae cih; kae nynh nang kha kae saw cipaw namaw hanlan muihsahnaw tuh hynhte a thua cih: Izip ram kyate ccungccaw hae kha he na poukhae hae te, e mua vawlan hin Pachia kha na beik cih,” a cipya.

¹³Thuasalama Moses nynh Pachia kha, “Israel hae kalan ka la thua cih zah, ‘Nae minpaaw hae Pachia nynh kae kha nae kalan yn saw,’ cite ka hopah hae zah minmin nynh, ‘A min hummou?’ cite yn khia hae ze pawtemou ka hopah cih hae?” a ci.

¹⁴Pachia nynh Moses kha, “KAE TUH KAE NYNH KA THUA. Tukeiccuze, ‘KAE NYNH KA THUA a cihtupaw nynh kae kha nae kalan yn saw,’ cite Israel hae kha na hopah cih hae,” a cipya.

¹⁵Te Pachia nynh Moses kha bua hopah zah, “Tukeiccuze Israel hae kha, ‘BAWIPAW , nae minpaaw hae Pachia, Abraham Pachia, Isak Pachia, te Jakob Pachia nynh kae kha nanning kalan yn saw,’ cite na hopah cih hae. E hynh zungzae hanlan ka min nynh thua, e hynh malang she balyn hanlan ka min nynh thua.

¹⁶La cceih lah Israel piccan hae kha la pum hae lah, ‘BAWIPAW , nae minpaaw hae Pachia, Abraham Pachia, Isak Pachia, te Jakob Pachia nynh ka kya yn langkuh zah: Nanning kalan kae thua zah Izip ram kya nae tungvaw pawmou a cyihkuh cipaw ka muih vae.

¹⁷Nanning kha Izip ram e riathaenaw kyate Kanaan hae, Hit hae, Amor hae Periz hae, Hiv hae te Jebus hae nynh a umnaw hae ram, mateitui te khoilutui a luanaw ram lang kae cciakhae cih oh, a ci,’ cite la hopah hae.

¹⁸Minmin nynh na bya kha a ngae cih hae; te nang te Israel piccan hae nynh Izip siapharan kalan na cceih cih oh zah, ‘BAWIPAW , Hebru hae Pachia nynh kaening kha oun tungku; BAWIPAW kae Pachia kalan silawku khylan nin thum laanccia asawnaw laesia ram lang oun cciasah,’ cite na la hopah cih oh.

¹⁹Thuasalama athawsaepaw kuih te Izip siapharan kha nangse khyh zetuh aning nynh nanning kha ae cciasah lan khyh oh cipaw phe ka ny.

²⁰Tukeiccuze ka kuih kha ka dyng cih zah Izip ram kya ka rae lanpaw ngaeangnaw balyn khate Izip ram kha de ka tah cih; tukoute nanning kha ae cciasah cih oh.

²¹E ccungccaw hae kha Izip hae malang maehoynaw ka pya cih hae, tetuh na ccia vae oh ze, kuih ccakaete na cceih vae lan khyh oh;

²²Nopi miakaw nynh a innpaw te a inn kya umpaw nopi miakaw kya-e ngun, sui te boeining kha a ngia cih zah nae ccapaw hae te nae ccanung hae kha na lawsakuh cih oh; ou tuhte Izip hae uccaw kha na luade cih oh,” a ci.