Read Zotung Chin EXODUS 39 Bible Online

EXODUS 39 - Zotung Chin bible

EXODUS 39

¹Apiazon, sephaphuhpaw, asepaw law te nebaleih lan a kua hae paw boeining kha hmin thyaapaw kya ryalaw nawlan a rae hae; BAWIPAW nynh Moses kya kaw a pya thyhte minmin nynh athyaapaw boeining kha Aaron hanlan a raepya hae.

²Bezalel nynh ranpibawi angkiccua kha sui te thuasah, meizong, sephaphuhpaw, asepaw law te nebaleih lan kuakuhpaw boeining te thuasah a rae.

³Sui pahsadyapaw kha tude zah arui lang a rae koute meizong, sephaphuhpaw, asepaw law te nebaleihpaw laaw te akuakuhpaw boei kyakhe pungsan kou puithya lante a raede.

⁴Raw kya bawkunawpaw arui ccangning kha angkiccua hanlan rae hae zah arui adung hae san ning te angkiccua kyakhe a huide hae.

⁵BAWIPAW nynh Moses kya kaw a pya thyhte angkiccua vawlan khe byccia kha mah angkiccua hawte sui te thuasah, meizong, sephaphuhpaw, asepaw, nebaleihpaw laaw te akuakuhpaw boei te thuasah a rae hae.

⁶Oniks lung hae kha paccyn hae zah sui ang lungkhu khe a be hae, tazeih kya minkhia hawte Israel ccapaw hae mih min thyhte lung kyakhe a khia hae.

⁷BAWIPAW nynh Moses kya kaw a pya thyhte Israel ccapaw hae kha ning leinawpaw lung hae lang a tang ccaw hae cite tuh-e lung hae tuh raw kya bawkupaw angkiccua arui hae vawlan khe a raede hae.

⁸Aning nynh bybe kha angkiccua a rae hawkhate sui te thuasah, meizong, sephaphuhpaw, asepaw, te nebaleihpaw laaw te akuakuhpaw boei khate thuasah kou hoy lan a rae.

⁹Tuh-e bybe tuh asaepaw te akopaw alokuh; thyh ning lang abikuh lante khaw kheit sae zah khaw kheit ako lante a rae.

¹⁰Bybe kyakhe lung hae kha ring pali lante a bede hae. Masaty ring kya tuh karnelian, krisolite te emeral;

¹¹ring ningnaw kya tuh emeral, safaiar te daimon;

¹²ring thumnaw kya tuh jasin, agate te amethist;

¹³ring palinaw kya tuh beril, oniks te jasper nynh thua hae; tuh-e lung hae kha sui ang kyakhe a nung hae.

¹⁴Israel ccapaw hae mih min a khiakuhpaw lung ccanghaw lae ning a um; tuh-e hae tuh tazeih hae hawte thua zah minphuin phuin haw lae ning hanlan lung ccangkheit kyaze min minkheit cci a um.

¹⁵Arui hawte ruepaw, sui ccipaw te raepaw arui kha bybe vawlan khe a rae hae;

¹⁶sui ang ccangning te sui bawtary ccangning kha rae hae zah bawtary ccangning kha bybe apaki avawlan khe a tyngde hae;

¹⁷sui rui ccangning kha bybe apaki kya umpaw bawtary ccangning kyakhe a khii hae.

¹⁸Sui rui ccangning hae kya-e adung san ning kha sui ang ccangning kyakhe a khii hae; tuhawte tuh-e tuh angkiccua araw kya bawkupaw arui a malang khe a tyngde hae.

¹⁹Oute sui bawtary ccangning kha rae zah, bybe alia lang apaki kyakhe alungkhu langte ranpibawi angki te phang bekuh lante a tyngde.

²⁰Sui bawtary ccangning kha rae hae zah angkiccua araw vawlan bawkupaw arui ccangning alia lang kya-e a malang khe a tyngde hae; tuh-e tuh angkiccua kya-e accaankuhpaw byccia palung lang kya nynh a tyngde hae.

²¹Bybe sui bawtary hae khate angkiccua bawtary hae kha meizong arui khate a khiide hae, ou tuhcite BAWIPAW nynh Moses kya kaw a pya thyhte bybe tuh angkiccua kya umpaw byccia aluki khe um zah phoukuh vae khyh.

²²Angkiccua vawlan e angkile kha meizong kyalya te kua zah a rae;

²³te tuh-e angkile angaelung khe lu hoihku nawlan a ua san kheit um zah a ua tuh seikuh nan sah cite kuapaw uccawsah te angki a nging hawkhate po voilu lan a mia hae.

²⁴Tuh-e angkile alia langkhe meizong, sephaphuhpaw, asepaw, te nebaleihpaw laaw te akuakuhpaw boei te ccalee thae kha a rae hae.

²⁵Khinling hae kha athyaapaw sui ccipaw te rae hae zah, angkile alia langsang umpaw ccalee thae hae laku khe po voilu lan a raede;

²⁶khinling te ccalee thae kha ataeleihkuh lante rae zah BAWIPAW nynh Moses kya kaw a pya thyhte ranpibawi ryalaw nawlan angkile kha a rae hae.

²⁷Aaron te a ccapaw hae hanlan ahoypaw law te kuakuhpaw angkile kha thuasah,

²⁸nebaleihpaw laaw te akuakuhpaw pungde kha thuasah, nebaleihpaw laaw te akuakuhpaw lukhung kha thuasah, nebaleihpaw laaw te kuakuhpaw dya adynpaw kha thuasah,

²⁹haetapaw soikuhpaw uccawsah, meizong, sephaphuhpaw, asepaw, nebaleihpaw laaw te akuakuhpaw taeccia kha mah phynbang te kou puithya lan a ccaan hae; tuh-e balyn kha BAWIPAW nynh Moses kya kaw a pya thyhte a rae hae.

³⁰Lukhung aphepaw kha sui ccipaw te rae hae zah tazeih kya minkhia hawte, “BAWIPAW hanlan Athyaapaw” cite min a khia hae.

³¹Apiazon arui khate pungde vawlan khe a khiide hae; tuh-e tuh BAWIPAW nynh Moses kya kaw a pya thyhte a rae hae.

³²Ou tuhte tungkunaw bu kya-e beikbu ryalaw balyn tuh a thang vae; BAWIPAW nynh Moses kya kaw a pya thyhte Israel hae nynh atyn-are kha a cyi vae hae.

³³Oute minmin nynh beikbu kha Moses kalan cciakhae hae zah avawlan te dawpaw te a uccaw balyn, bawnawpaw hae, pang hae, pangccaw hae, tung hae te ccusy hae kha thuasah;

³⁴Avawlan te dawpaw, anangkuh vae paw tuutepaw phua te avawlan te dawpaw, saphua ahoypaw te zokhawpaw boei kha thuasah;

³⁵byakin thingkua, puihnawpaw ccong hae te thingkua ahu kha thuasah;

³⁶ccaboi te a uccaw hae balyn, Umkhaenaw Sanlou kha thuasah;

³⁷athyaapaw maeekhuatung te a maeekhua hae te a uccaw hae, te maee aw nawlan chitui kha thuasah;

³⁸sui silawhang, thuhkupaw chitui, amynthuapaw zimuin, bu thuakaw kya zokhawpaw boei kha thuasah;

³⁹sohin te raepaw silawhang, sohin pasaryh, puihnawpaw ccong hae te a uccaw balyn kha thuasah; pakepi te a thadynnawpaw kha thuasah;

⁴⁰voidu kya zokhawpaw boei hae, a tung hae, a ccusy hae, voidu thuakaw kya zokhawpaw boei, arui hae, a pangreih hae kha thuasah, beikbu kya ryalawnaw lanpaw uccaw balyn, tungkunaw bu kya-e uccaw balyn kha thuasah;

⁴¹hmin thyaapaw kya ryalaw nawlan kou hoy lan raepaw boeining hae, ranpibawi Aaron hanlan athyaapaw boeining hae, a ccapaw hae nynh ranpibawi rya a lawnaw hae paw boeining hae kha thuasah Moses kalan a cciakhae hae.

⁴²BAWIPAW nynh Moses kha kaw a pya thyhte Israel hae nynh ryalaw balyn kha a law hae.

⁴³BAWIPAW nynh kawpya thyhte minmin nynh ryalaw balyn pong a law hae paw kha Moses nynh he a muih tuh minmin kha hythua a pya hae.