Read Zotung Chin EXODUS 4 Bible Online

EXODUS 4 - Zotung Chin bible

EXODUS 4

¹Oute Moses nynh, “Israel hae nynh kae kha yn zyn khyh hae zah ka bya kha ngae leite, ‘BAWIPAW tuh na kya langkuh khyh,’ yn ci hae ze pawtemou ka khung cih hae?” a ci.

²BAWIPAW nynh Moses kha, “Na kuih kya pawmou um?” cite khia zah Moses nynh, “Hoitang nynh um,” a cipya.

³Te BAWIPAW nynh, “Hoitang kha laephi kya vuatua,” a cipya. Tukeiccuze Moses nynh hoitang kha laephi kya he a vua tuh, hupaw lang poh a tang; te Moses tuh hupaw kyate a nulang a sihkuh.

⁴Oute BAWIPAW nynh Moses kha, “Na kuih kha dyng lah a leihmae kha kyng,” a cipya. Tukeiccuze a kuih kha dyng zah a leihmae kha he a kyng tuh a kuih kyakhe hoitang lang bua a tang.

⁵BAWIPAW nynh, “Ou hynhte na cyi zetuh minmin nynh BAWIPAW , mih minpaaw hae Pachia, Abraham Pachia, Isak Pachia, te Jakob Pachia tuh na kya a langkuh cipaw a zyn cih hae,” a cipya.

⁶BAWIPAW nynh Moses kha, “Na kuih kha na angkile lungkhu lang puku tua,” bua a cipya. Aning nynh a kuih kha a angkile lungkhu lang a pu; te a kuih kha he a thuaa tuh, a kuih tuh vuipua hawte raw zah vaethya a kae vae.

⁷Oute Pachia nynh, “Na kuih kha na angkile lungkhu lang bua putua,” a cipya, tukeiccuze a kuih kha a angkile lungkhu lang bua a pu, te a kuih kha he a thuaa tuh, a kuih tuh a ngesaw thathyh lang bua a tang.

⁸BAWIPAW nynh, “Nang kha ae zyn khyh hae zah masaty e muihsahnaw kha a nythya khyh hae zemah vaeningnaw muihsahnaw kha tuh a zyn vae cih hae.

⁹E muihsahnaw ccangning mawte minmin nynh zyn khyh hae zah na bya kha a ngae khyh hae zetuh Nal vawkhu e tui beihtaraw kha na lah cih zah aroupaw laephi kya na lae cih; te Nal vawkhu e na lawpaw tui tuh aroupaw laephi vawlan khe chii lang a tang cih,” a cipya.

¹⁰Thuasalama Moses nynh BAWIPAW kha, “Pou ka Bawipaw, kae tuh langmaw mah thuasah, atu nae hopah koute mah thuasah byaho a puakuhpaw ka thua khyh; kae tuh a mung a lae sungpaw nynh ka thua,” a ci.

¹¹Oute BAWIPAW nynh Moses kha, “Ccungccaw byahonaw hynh hum nynh mou a pya? Byaho leinaw, nawpannaw, mitmuihnaw te mitmohnaw kha hum nynh mou a rae? Kamaw, BAWIPAW nynh ka raepaw thua khyh tou?

¹²Tukeiccuze atu cceih lah na mung na lae kya kae umkhae cih zah na ho lanpaw kha kae ccangpah cih,” a ci.

¹³Thuasalama Moses nynh, “Pou ka Bawipaw, ccangpaw lukhakheit kha beih saw,” a cipya.

¹⁴Oute BAWIPAW nynh Moses tungvaw a thinria zah, “Levi phin na upaw Aaron kha mang a um khaw? Aning tuh byaho a puakuhpaw nynh thua cipaw ka ny; nang kha tungku khylan atu yn cceih cciamang zah he ae muih te, a lungtua cih.

¹⁵A ho lanpaw bya kha na hopah cih; na munglae te a munglae kya kae umkhae cih oh zah na cyi lan oh paw kha kae ccangpah cih oh.

¹⁶Aaron nynh ccungccaw hae kalan namaw ccelang bya a ho cih; aning tuh namaw hanlan mung te lae a thua cih zah nang tuh aning hanlan Pachia hawte na thua cih.

¹⁷Muihsahnaw hae na raenaw lanpaw e hoitang hynh na kuih kya ccyngkuh,” a cipya.

¹⁸Moses nynh a zu paaw Jethro kalan ki zah, “Izip ram umpaw ka vaeccaw hae kalan beih ka la cceihsah lah a hiin ung hae tah cipaw ka la dotua hae sah,” a cipya. Te Jethro nynh Moses kha, “Ngedante la cceih,” a cipya.

¹⁹Midian ram umpaw Moses kha BAWIPAW nynh, “Izip ram lang ki ccavae, pawccecize nang ae theih ry hae paw balyn tuh phe chih vae hae,” a cipya.

²⁰Tukeiccuze Moses nynh a zu te a ccapaw hae kha ko hae zah lann tungvaw khang hae zah Izip ram lang a ki vae hae; te Moses nynh Pachia hoitang kha a kuih kya a ccyngku.

²¹Te BAWIPAW nynh Moses kha, “Izip ram lang he na ki te, kae pyapaw ngaeang lan umpaw balyn kha Faro malang na langsakuh cih; thuasalama a lung kha ka khungsah cih zah Israel hae kha cciasah lan khyh hae.

²²Oute nang nynh Faro kyakhe, ‘BAWIPAW nynh hynhte a ho: Israel tuh ka ccatawccaw nynh thua,

²³“Ka ccapaw nynh kae kha yn beik ccaw, ka ccapaw kha cciasah,” cite kae hopya. Thuasalama amaw kha cciasah lan phe na ei; atu na ccatawccaw kha kae chiapah cih,’ a ci cite la hopah,” a cipya.

²⁴Minmin nynh cceih hae zah khuazi a ryanaw hae khe BAWIPAW nynh Moses kha tungkuh zah chia lan a zuaku.

²⁵Zipporah nynh ahepaw lung ccangkheit kha lah zah a ccapaw vingdung kha a aw, te tuh-e lung khate Moses ccu kha nae zah, “Nang tuh chiise te asekuhpaw ka vawpaw ccaccing nynh na thua!” a cipya.

²⁶Te nopinung nynh, “Nang tuh vingdungawku keiccuze a luapaw chiise te asekuhpaw vawpaw nynh na thua,” a cipya. Te BAWIPAW nynh Moses kha a makhaete a umsah.

²⁷BAWIPAW nynh Aaron kha, “Moses te tungku khylan laesia ram lang la cciatua,” a cipya. Tukeiccuze aning nynh cceih zah Pachia mua kyakhe Moses te tungkuh hae zah Moses kha a myng.

²⁸Moses nynh amaw a sawtupaw BAWIPAW bya balyn te BAWIPAW nynh cyi lan a nawpaw muihsahnaw balyn kha Aaron kya a hopya.

²⁹Oute Moses te Aaron nynh cceih hae zah Israel piccan balyn kha a pum hae.

³⁰BAWIPAW nynh Moses a la hopyapaw bya balyn kha Aaron nynh hopah hae zah muihsahnaw hae kha ccungccaw hae malang a raepya hae.

³¹Te ccungccaw hae nynh a zyn hae; BAWIPAW nynh Israel hae kya yn thua zah mih riathaenaw kha a muih vae cipaw minmin nynh he a nyh hae tuh, bakhung hae zah a beik hae.