Read Zotung Chin EXODUS 6 Bible Online

EXODUS 6 - Zotung Chin bible

EXODUS 6

¹Oute BAWIPAW nynh Moses kha, “Faro tungvaw ka cyi lanpaw kha atu na muih vae cih: Alesaepaw huhan liate Israel hae kha a cciasah cih hae; alesaepaw huhan liate minmin kha a ram kyate a dee vae cih hae,” a cipya.

²Pachia nynh Moses kha bua hopah zah, “Kae tuh BAWIPAW nynh ka thua.

³Abraham, Isak te Jakob kya Athunghuapaw Pachia lante ka langkuh, thuasalama BAWIPAW cikuhpaw ka min tuh minmin kha ka nysah khyh hae.

⁴Minmin nynh ramccang hae hawte a umnaw hae Kanaan ram kha kae pya cih oh cite bya ka kinkupaw kha mah ka tynsah.

⁵Izip hae see lang a tang hae paw Israel hae kya-e hawkhaekunaw roi kha mah ka thae vae, te ka byakinnaw kha mah ka ning khyh.

⁶Tukeiccuze Israel hae kha, ‘Kae tuh BAWIPAW nynh ka thua, Izip hae kya-e phupaw ripaw kyate kae luesah cih oh zah minmin see lang na tangnaw oh kyate poh kae thuaa cih oh. Kuih dyngnaw te thuasah, alesaepaw byapianaw te thuasah, nanning kha kae khum cih oh.

⁷Nanning kha ka ccungccaw hae lante kae rae cih oh zah kae tuh nae Pachia ka thua cih. Kae tuh Izip hae kya-e phupaw ripaw kyate ae luesah oh paw BAWIPAW nae Pachia nynh ka thua cipaw kha nae nyh cih oh.

⁸Abraham, Isak te Jakob kha kae pya cih oh cite bya ka kinpyaku hae paw ram lungkhu lang kae cciakhae cih oh; khah-e ram kha naemaw ram lang kae pya cih oh. Kae tuh BAWIPAW nynh ka thua,’ a ci cite na la hopah cih hae,” a cipya.

⁹Moses nynh tuh-e tuh Israel hae kya a hopya hae; thuasalama mih lungronaw te myarya ccihpaw seetangnaw keiccuze Moses bya kha ngae khyh hae.

¹⁰Oute BAWIPAW nynh Moses kha,

¹¹“Izip siapharan Faro kalan la cceih lah Israel hae kha a ram kyate a pousah nawlan hae la hopah,” a cipya.

¹²Thuasalama Moses nynh BAWIPAW kha, “Israel hae nynh ka bya kha ngae khyh hae, byaho a puakuh leipaw kae nynh ka hopaw bya kha pawtemou Faro nynh a ngae cih?” a ci.

¹³BAWIPAW nynh Moses te Aaron kha, “Israel hae te Izip siapharan Faro kyakhe BAWIPAW nynh, ‘Israel hae kha Izip ram kyate na poukhae cih oh,’ oun cipya cite la hopah oh,” a cipya hae.

¹⁴Akawlan e ccungccaw hae tuh mih innbyn raveih kyaze lupi raveih nynh a thua hae: Israel a ccatawccaw Reuben ccapaw hae tuh Hanok, Pallu, Hezron, te Karmi nynh thua hae; e hae tuh Reuben phin nynh thua hae.

¹⁵Simeon ccapaw hae tuh: Jemuel, Jamin, Ohad, Jakhin, Zohar te Kanaan nopinung ccapaw Shaul nynh thua hae; e hae tuh Simeon phin nynh thua hae.

¹⁶Levi ccapaw hae mih min tuh mih thokeinaw thyhte: Gershon, Kohath te Merari. Levi tuh za kheit sung thum kum sari cia a hiin.

¹⁷Gershon ccapaw hae tuh mih phin thyhte Libni, Shimei nynh thua hae.

¹⁸Kohath ccapaw hae tuh: Amram, Izhar, Hebron te Uzziel nynh thua hae. Kohath tuh za kheit sung thum kum thum cia a hiin.

¹⁹Merari ccapaw hae tuh: Mahli te Mushi nynh thua hae. E hae tuh mih thokeinaw thyhte Levi phin nynh thua hae.

²⁰Amram nynh a paaw ccianung Jokhebed kha zu lang umkhae zah Aaron te Moses kha a saah hae. Amram tuh za kheit sung thum kum sari a hiin.

²¹Izhar ccapaw hae tuh: Korah, Nefeg te Zikhri nynh thua hae.

²²Uzziel ccapaw hae tuh: Mishael, Elzafan te Sithri nynh thua hae.

²³Aaron nynh Amminadab ccanung, Nahshon a ccianung Elisheba kha zu lang umkhae zah Nadab, Abihu, Eleazar te Ithamar kha a saah.

²⁴Korah ccapaw hae tuh: Assir, Elkanah te Abiasaf nynh thua hae. E hae hynh Korah phin nynh thua hae.

²⁵Aaron ccapaw Eleazar nynh Putiel ccanung lu kheit kha zu lang umkhae zah Finehas kha a saah. E hae hynh mih phin thyhte Levi phin hae kya-e lupi hae nynh thua hae.

²⁶BAWIPAW nynh, “Israel hae kha aphuphute Izip ram kyate poukhae oh,” cite a hopya hae paw tuh Moses te Aaron kha nynh a thua hae.

²⁷Izip ram kyate Israel hae poukhae lanpaw kha Izip siapharan Faro kya a hopahtu hae kha mah Moses te Aaron mamin nynh a thua hae.

²⁸BAWIPAW nynh Moses kha Izip ram kya a hopya lyaze,

²⁹“Kae tuh BAWIPAW nynh ka thua; nang kae hopyapaw balyn kha Izip siapharan Faro kalan hopah,” a cipya.

³⁰Thuasalama Moses nynh BAWIPAW malang khe, “Kae tuh byaho a puakuh leipaw ka thua zah pawtemou Faro nynh ka bya kha a ngae cih?” a ci.