Read Zotung Chin EXODUS 7 Bible Online

EXODUS 7 - Zotung Chin bible

EXODUS 7

¹BAWIPAW nynh Moses kha, “Dotua, Faro hanlan nang kha Pachia lang kae rae vae, na upaw Aaron tuh na profeh a thua cih.

²Kaw kae pyapaw balyn kha na ho cih, te a ram kyate Israel hae kha a pousah nawlan hae, na upaw Aaron nynh Faro kalan a hopah cih.

³Thuasalama Faro thinlung kha ka khungsah cih zah Izip ram kya muihsahnaw te ngaeangnaw kha patae ka rae cih.

⁴Faro nynh na bya kha he a ngae khyh tuh, Izip ram kya ka kuih kha ka khang cih zah alepaw detahnaw liate Izip ram kyate ka ccungccaw Israel hae kha aphuphute ka cciakhae cih hae.

⁵Izip hae kha rawsete ka kuih ka dyng cih zah Israel hae kha Izip hae laku kyate he ka cciakhae hae tuh, Izip hae nynh kae tuh BAWIPAW nynh ka thua cipaw kha yn nyh vae cih hae,” a cipya.

⁶BAWIPAW nynh kaw a pya hae thyhte Moses te Aaron nynh a cyi hae.

⁷Faro kalan bya a hopya lya hae tuh, Moses tuh kum sung tarya cih vae zah Aaron tuh sung tarya kum thum acih vae.

⁸BAWIPAW nynh Moses te Aaron kyakhe,

⁹“Faro nynh, ‘Ngaeangnaw raetua oh,’ ae cipya oh ze, Moses nynh Aaron kha, ‘Na hoitang kha lawkuh lah Faro malang vua lah hupaw lang a tang cih,’ na cipah cih,” a cipya hae.

¹⁰Tukeiccuze Moses te Aaron nynh Faro kalan cceih hae zah BAWIPAW nynh kawpya hae thyhte a cyi hae; Aaron nynh a hoitang kha Faro te a ryalahtu bawi hae malang khe vua zah hupaw lan poh a tang.

¹¹Oute Faro nynh ahaw hae paw te apawe hae paw kha a ko hae; te Izip ram e mitleihthya hae paw nynh mah mih thyanaw khate tuhcite phe a cyibua kho hae.

¹²Lu kheit cci nynh mih hoitang kha vua hae zah mih hoitang hae tuh hupaw lang phe a tang hae; thuasalama Aaron hoitang nynh mih hoitang hae kha pong a laang.

¹³Faro thinlung kha phang khungsah ung zah BAWIPAW nynh a la ho vae hawte mih bya kha ngaelae khyh.

¹⁴Oute BAWIPAW nynh Moses kha, “Faro tuh a lungkhung zah Israel hae cciasah lanpaw kha phe a ei.

¹⁵Tukeiccuze Faro nynh vawkhu lang a ccia ccyh awkhua khe Faro kalan la cceih lah amaw te tungku khylan vawkhu kin khe phang la ngaw lah hupaw lang atangpaw hoitang kha na kuih kya ccyngkuh.

¹⁶Te Faro kha, ‘Hebru hae Pachia BAWIPAW nynh kae kha na kalan yn saw zah, “Laesia ram kya kae kha oun beik ccaw hae, ka ccungccaw hae kha cciasah hae,” cite la hopah yn cipya. Thuasalama atu cia na ngae khyh.

¹⁷Tukeiccuze BAWIPAW nynh, “Kae tuh BAWIPAW nynh ka thua cipaw kha hynh-e ka cyipaw liate na nyh cih,” a cipya. Dotua, Nal vawkhu e tui kha ka kuih kya umpaw hoitang te ka bua cih zah chiise lang poh a tang cih.

¹⁸Vawkhu e ngasaw hae tuh a chih cih hae, vawkhu tuh a myn cih zah Izip hae nynh Nal vawkhu e tui kha neih kho lan khyh hae,’ cite la hopah,” a cipya.

¹⁹BAWIPAW nynh Moses kyakhe, “Aaron kha, ‘Na hoitang kha lawkuh lah Izip ram umpaw tui hae—vaw hae, tuizy hae, kua hae te tuisung hae luki khe na kuih kha dyngtua. Tui tuh chiise lang pong a tang cih zah Izip ram balyn kya chiise a um cih, thing karung kya te lungkarung kya a ynkuhpaw tui hae heize chiise lang pong a tang cih,’ cite hopah,” a cipya.

²⁰BAWIPAW nynh kawpya hae thyhte Moses te Aaron nynh a cyi hae. Faro te a ryalahtu bawi hae malang khe Aaron nynh a hoitang kha hang zah vawkhu e tui kha he a bua tuh, vawkhu e tui tuh chii lang a tang vae,

²¹vawkhu e ngasaw hae tuh chih hae zah vawkhu e tui tuh eih amyn keiccuze Izip hae nynh neih kho vae khyh hae, te Izip ram balyn kya chiise pong a um.

²²Te mitleihthyapaw Izip hae nynh mah tuhcite a cyibua hae; tukeiccuze BAWIPAW nynh a ho hawte Faro tuh a lungkhung zah mih bya kha ngaelae khyh.

²³Faro tuh a inn lang ki zah a cyi hae paw kha pawlangria khyh.

²⁴Te Izip hae balyn nynh nia lanpaw tui kha mue khylan Nal vahue khe a karouhku hae, pawccecize minmin nynh vawkhu e tui kha neih kho vae khyh hae.

²⁵BAWIPAW nynh Nal vaw kha de a tahnaw tuh nin sari aro vae.