Read Zotung Chin EXODUS 8 Bible Online

EXODUS 8 - Zotung Chin bible

EXODUS 8

¹Oute BAWIPAW nynh Moses kha, “Faro kalan la cceih lah, ‘BAWIPAW nynh hynhte a ho: Ka ccungccaw hae nynh kae kha oun beik ccaw hae, minmin tuh cceih hae sah.

²Minmin cciasah lanpaw kha na ei lanze na ram balyn kha buphaw te shethya ka thuasah cih.

³Vawkhu tuh buphaw te phe a beih cih; tuh-e buphaw hae nynh na siapharan inn kya thuasah, na inaw khaan kya te na ikhung kya thuasah, na ryalahtu bawi hae inn kya te na ccungccaw hae inn kya thuasah, na takua kya te na sanlou raenawpaw pake kya thuasah a kae cih hae.

⁴Buphaw nynh nang te na ccungccaw hae te na ryalahtu bawi hae tungvaw kya ae kaenua cih oh,’ cite la hopah,” a cipya.

⁵Oute BAWIPAW nynh Moses kha hopah zah, “Aaron nynh tuu a rinnawpaw a hoitang kha Izip ram e vawkhu hae, tuizy hae te kua hae luki khe hangsah lah Izip ram balyn kya buphaw kha kaesah,” a cipya.

⁶Aaron nynh Izip ram e tui hae luki khe a kuih kha dyng zah Izip ram balyn tuh buphaw te phe a beih vae.

⁷Thuasalama mitleihthya hae paw nynh mah mih thyanaw te tuhcite cyih hae zah buphaw hae kha Izip ram lang phe kaesah hae.

⁸Oute Faro nynh Moses te Aaron kha ko hae zah, “BAWIPAW nynh buphaw kha kae te ka ccungccaw hae kyate a law nawlan sawsang oh, te ccungccaw hae kha BAWIPAW kalan silaw khylan ka cciasah cih hae,” a cipya hae.

⁹Moses nynh Faro kha, “Naemaw te nae inn kyate buphaw hae kha law thua hae sah lah, Nal vawkhu kya kyalya a um ccaw cite, nang te na ryalahtu bawi hae te na ccungccaw hae hanlan hohtuhmou saw ka sang cih cipaw beih yn hopah,” a cipya.

¹⁰Te Faro nynh, “Awkhualan,” a cipya. Moses nynh, “Na ho hawte thuasah! BAWIPAW kae Pachia alopaw pachia um khyh cipaw na ny nawlan,

¹¹buphaw hae nynh nang te na inn hae, na ryalahtu bawi hae te na ccungccaw hae kha ae cciataw cih oh zah Nal vaw kya rou nynh a um cih hae,” a ci.

¹²Oute Moses te Aaron tuh Faro kyate a pou hae; te Pachia nynh Faro tungvaw a thuakhaepaw buphaw hae konglang kha Moses nynh BAWIPAW kalan saw a sang.

¹³Te Moses nynh a ngia hawkhate BAWIPAW nynh a cyipya: buphaw hae tuh inn hae kya, inn voidu lungkhu kya te loo hae kya a chih hae.

¹⁴a chihpaw buphaw hae kha suelua hae zah patae a pum hae keiccuze ram tuh a myn vae.

¹⁵Faro nynh ahoyhua vae cipaw he a muih tuh, BAWIPAW nynh a la ho vae hawte a lungkhung zah Moses te Aaron bya kha ngaelae khyh.

¹⁶Oute BAWIPAW nynh Moses kyakhe, “ ‘Izip ram balyn kya umpaw laenoi tuh maseih lang a tang ccaw, na hoitang kha kyngte na kuih kha dyng lah laephi kya-e laenoi kha buatua,’ cite Aaron kha hopah,” a cipya.

¹⁷Te minmin nynh tuhcite a cyi hae; Aaron nynh a hoitang kha kyngte a kuih kha dyng zah laenoi kha a bua, te maseih tuh ccungccaw hae te sarangpaw hae kyakhe a um vae hae; Izip ram balyn e laenoi balyn tuh maseih lang a tang vae.

¹⁸Mitleihthya hae paw nynh mih thyanaw te maseih rae lan a zuaku hae, thuasalama rae kho khyh hae. Maseih hae tuh ccungccaw hae te sarangpaw hae kyakhe a um hae.

¹⁹Te mitleihthya hae paw nynh Faro kha, “E tuh Pachia nynh a cyipaw nynh thua,” a cipya hae. Thuasalama BAWIPAW nynh a la ho vae hawte Faro tuh a lungkhung zah minmin bya kha ngaelae khyh.

²⁰Oute BAWIPAW nynh Moses kha, “Awkhua takaw te tho lah vawkhu lang a cceihpaw Faro malang khe thadyn lah, ‘BAWIPAW nynh hynhte a ho: Ka ccungccaw hae nynh kae kha yn beik ccaw hae, minmin kha cciasah hae.

²¹Ka ccungccaw hae kha na cciasah khyh hae zetuh myn hae kha namaw, na ryalahtu bawi hae te na ccungccaw hae tungvaw kya te na inn hae lungkhu lang ka saw cih; te Izip hae inn te a umnaw hae laephi kha mah myn te phe abeih cih.

²²Tuh-e nin kyakhe kae tuh e ram kya BAWIPAW nynh ka thua cipaw na ny nawlan, ka ccungccaw hae nynh a umnaw hae Goshen ram kha thoh ka phia cih zah tuin kya myn um lan khyh.

²³Ou tuhte ka ccungccaw hae te na ccungccaw hae laku laesahnaw ka rae cih. E muihsahnaw hynh awkhualan yn langkuh cih,’ cite la hopah,” a cipya.

²⁴BAWIPAW nynh tuhcite cyih zah myn hae patae tuh Faro inn kya, a ryalahtu bawi hae inn kya te Izip ram balyn kya oun thua hae zah, tuh-e myn hae keiccuze Izip ram tuh a roh vae.

²⁵Oute Faro nynh Moses te Aaron kha ko hae zah, “La cceih oh lah e ram lungkhu kya nae Pachia kalan silawnaw la rae oh,” a cipya hae.

²⁶Moses nynh, “Tuhte cyi lan hoy lan khyh; pawccecize BAWIPAW kae Pachia kalan kae pyapaw silawnawpaw kha Izip hae nynh anungsikuh a ci cih hae. Izip hae nynh anungsikuh a ci hae paw silawnawpaw khate Izip hae mitmuihnaw kya si kae law lanze minmin nynh lung te oun deih lan khyh hae tou?

²⁷BAWIPAW kae Pachia nynh kaw oun pya thyhte nin thum laanccia asawnaw laesia ram langkhe kae cceih cih zah amaw kalan si kae lawkuh cih,” a ci.

²⁸Te Faro nynh, “Myarya asawnaw lang na ccia khyh oh zetuh, BAWIPAW nae Pachia kha laesia ram kya silaw lan kae cciasah cih oh. Kamaw hanlan saw yn sangpah oh,” a cipya hae.

²⁹Moses nynh, “Awkhualan khe myn hae tuh namaw kyate thuasah, na ryalahtu bawi hae kyate thuasah, na ccungccaw hae kyate thuasah, a pou nawlan hae, na kyate he kae pou takaw mawte, BAWIPAW kalan saw ka la sang cih; ccungccaw hae nynh BAWIPAW kalan silaw khylan a ccia lan hae paw kha ua leite bua na ling vae lan khyh hae,” a cipya.

³⁰Te Moses tuh Faro kyate pou zah BAWIPAW kalan saw a sang.

³¹Moses nynh a ngia thyhte BAWIPAW nynh a cyi: Myn hae kha Faro kyate thuasah, a ryalahtu bawi hae kyate thuasah, a ccungccaw hae kyate thuasah BAWIPAW nynh pousah hae zah sa kheit sanmah um vae khyh hae.

³²Thuasalama tuh-e ccyh kyacia Faro tuh a lung bua khung zah ccungccaw hae kha cciasah khyh hae.