Read Zotung Chin JOB 1 Bible Online

JOB 1 - Zotung Chin bible

JOB 1

¹A min Job cikuhpaw ccungccapaw lu kheit tuh Uz ram kya a la um. Tuh-e paw tuh ccaenaw um leipaw te adingpaw thua zah, Pachia rawrihpaw te hoyleinaw a sibiapaw nynh thua.

²Aning nynh ccapaw lu sari te ccanung lu thum a saah.

³Tuu thong sari, kalauh thong thum, tangnuapaw toi za pangaw, lann pinung za pangaw te ryalahtu patae a hoi; tukeiccuze e paw tuh nithua lang e ccungccaw balyn kyaze alesae huaccepaw nynh thua.

⁴Job ccapaw hae nynh mih pui nin takyh vae ze lu kheit inn koute lu kheit inn kyakhe atuete poi kha leih a tuakheih hae; mimaw ryte aekheih niakheih khylan mih ccianung lu thum kha leih a kobua hae.

⁵Mih poi he athang te Job nynh ko hae zah a thyaasah hae; te awkhua takaw te tho zah mih balyn hanlan milu thyhte maee-ute silawnaw kha a raepya hae; pawccecize Job nynh, “Ka ccaaw hae nynh seinaw raesei hae zah mih thinlung kya Pachia kha thyalawsei kho hae,” a ci. Tuhcite Job nynh zungzae leih a rae.

⁶Nin kheit tuh Pachia ccapaw hae nynh BAWIPAW malang langku khylan oun thua hae zah, minmin kya Satan mah a umbua.

⁷BAWIPAW nynh Satan kha, “Teitemou nae thua?” a ci. Satan nynh BAWIPAW kha, “Laephi vawlan ka khiakuh zah ka ccia bungthungnaw kyate nynh kae thua,” cite a khung.

⁸BAWIPAW nynh Satan kha, “Ka seepaw Job kha na nyh boi tou? Laephi vawlan aning tahawpaw lu kheit san um khyh, ccaenaw um leipaw te a dingpaw, Pachia rawrihpaw te hoyleinaw a sibiapaw nynh thua,” a cipya.

⁹Tetuh Satan nynh BAWIPAW kha, “Job nynh Pachia kha accakaepaw hanlan a rih cih zawtou?

¹⁰Amaw te a inn te a hoipaw balyn kha po voilu lan hohung na koihkhawpah khyh tou? A ryalaw kha hythua na pya zah, a hoirumnaw tuh ram lungkhu a lungthung.

¹¹Thuasalama atu na kuih dyng lah, a hoipaw balyn kha na lawpya zetuh na malang mawkhe thya ae law cih,” cite a khung.

¹²BAWIPAW nynh Satan kha, “Kou hoy, aning nynh a hoipaw balyn tuh na kaw nynh akhya; amaw kha than nynh na kuih dyngnua nan!” a cipya. Tukeiccuze Satan tuh BAWIPAW umnaw kyate a pou vae.

¹³Nin kheit tuh Job a ccapaw hae te a ccanung hae nynh atawccapaw inn kya ae hae zah, misutui a nia cciamang lya hae khe,

¹⁴Job kalan thethaesahtu lu kheit yn thua zah, “Tangnuapaw hae tuh leithue hae zah, lann pinung hae tuh mih pepan khe ram a paeekuh hae,

¹⁵te Seba hae nynh oun ccianua hae zah marya a lawku hae, ryalahtu hae kha thaloi te marya a chia hae; ka makhae rou nynh nang kha thethaesah khylan me ka lue,” a cipya.

¹⁶Tuhte a hopya cciamang lyatuin ccangpaw lu kheit yn thua zah, “Vaawlang te Pachia maee yn ccah zah, tuu hae te ryalahtu hae kha a u hae keiccuze marya chih hae; ka makhae rou nynh nang kha hopya khylan me ka lue,” a cipya.

¹⁷Tuhte a hopya cciamang lyakhe, ccangpaw lu kheit yn thua zah, “Khaldi hae nynh phu thum lante kalauh hae kha oun thiing hae zah marya a cciakhae hae, ryalahtu hae kha thaloi te phe a chia hae; ka makhae rou nynh nang kha thethaesah khylan me kae lue,” a cipya.

¹⁸Tuhte a hopya cciamang lyakhe, ccangpaw lu kheit yn thua zah, “Na ccapaw hae te na ccanung hae tuh atawccapaw inn kya ae hae zah misutui a nia cciamang lya hae khe,

¹⁹ramkaw langte myarya athawsaepaw khise tuh vaekheihmawte yn zaw zah, inn apaki ki pali mawte phe a mung, te inn nynh tuh-e zawthaw hae tuh deih hae zah phe a chih hae; ka makhae rou nynh nang kha thethaesah khylan me ka lue,” a cipya.

²⁰Tetuh Job nynh thokuh zah a boeining kha a seii, a lu kha ookuh zah laephi kya a bakhung, te Pachia kha a beik.

²¹Job nynh, “Ka nung vue kyate ka sasete ka pui zah, ka sasete ka ki cih; BAWIPAW nynh yn pya zah BAWIPAW nynh phe a law vae; BAWIPAW min tuh thehoyte um sah,” a ci.

²²E kya balyn hynh Job tuh sei khyh zah, Pachia kha seisah khyh.