Read Zotung Chin JOB 10 Bible Online

JOB 10 - Zotung Chin bible

JOB 10

¹“Ka hiinnaw hynh ka ngaemyngkhaekuh; ka lungccingkhaeku leinaw hynh synku leite ka ho cih; thinlungccite ka ho cih.

²Pachia kalan hynhte ka hopah cih, Sei yn be nan; pawccemou nae rawse cipaw beih yn nysah.

³Vawsawnaw pyate, na kuih te na raepaw kha dothatheihte, ccungccaw hoylei hae paccynkunaw kha nawccawkhaepaw hynh ahoy na ci tou?

⁴Pynsaw mit tou na hoi? Ccungccaw nynh muih hawte tou na muih?

⁵Na nin hae tuh ccungccaw nin tetou aloku? Na kum hae tuh ccungccaw kum tetou aloku?

⁶Ka cyisei leinaw kha na nyh zah, na kuih kyate a lue khopaw humhung mah um khyh cipaw mang na nyh pite, pawccemou ka hoyleinaw kha na ccung zah, ka seinaw kha nae ccungpya?

⁸Na kuih te nae ccaan zah nae raeku; atu vae tuh na paleihkuh zah nae ro.

⁹Anglae te raeku hawte nae raekupaw kha ning nan; laenoi kalan bua nae kisah vae cih tou?

¹⁰Mateitui lae hawte nae lae khyh tou? Mateitui hawsahpaw hawte karae nae hawsah khyh tou?

¹¹Ving te saw khate boei lang nae bong zah, ru te tharui khate nae huide.

¹²Hiinnaw te atynpaw sungsahnaw kha nae pya zah, na do-oihnaw nynh ka muisaw kha a khynsah.

¹³Tuhzemah hynh-e hae hynh na thinlung kya na thuruh zah, tuh-e tuh na eenaw nynh thua cipaw ka ny.

¹⁴Ka sei ze, phe nae syntaw zah, ka hoyleinaw kha nae ngaethya khyh.

¹⁵Ccungccaw hoyleipaw ka thua ze, ka hanlan ngaethya lan kou um! Adingpaw ka thua zemah, maehoynaw ka ccou lae khyh, pawccecize myaryamaw ka thethah zah riathaenaw ka teing.

¹⁶Ka laan ka sui a ua vae ze, chindeih hawte kae kha nae deehui zah, ka tungvaw kya ngaeangnaw kha leih nae raenua.

¹⁷Kae kha rawsete ccaekia palei na hoi zah, ka tungvaw na thinrianaw kha na lesah; kae kha rawsete rhawkaw thawpaw hae kha na thuakhae.

¹⁸“Pawccemou ka nung vue kyate nae la puisah? Humhung nynh san yn muih mawkhe ka la chi lanpaw,

¹⁹A um boi leipaw hawte ka la thua sah lah, ka nung vue kyate shawku lang me yn la cciakhae lan hae paw.

²⁰Ka hiinshe tuh dyn khyh tou? Kithui ci um vae leite, ngaethyanaw te akhupaw mohnaw ram lang ka ccia maw hin, ngaengannaw beihtaraw ka mue nawlan, ka makhaete beih yn umsah tua.

²²Tuin kya tuh ngaethyanaw te nua-inua-ae a umnaw ram, awnaw tuh mohnaw hawte athuanaw nynh thua,” a ci.