Read Zotung Chin JOB 11 Bible Online

JOB 11 - Zotung Chin bible

JOB 11

¹Oute Naamath minphuinpaw Zofar nynh khung zah:

²“Bya patae hynh khungru leite tou um athua cih? A byalungpaw kha thyaaccousah athua cih tou?

³Kathuhkaleih na hopaw bya hynh nynh mingccangpaw kha zya a daesah cih tou? he na sarya vae ze, maethya leite hummou a um cih?

⁴Pawccecize nang nynh, ‘Ka hopaw tuh ahme, Pachia mitmuihnaw kya athyaapaw nynh ka thua,’ na ciku.

⁵Thuasalama Pachia nynh ae hopah vae sah, nang kha bya ae khungru vae sah,

⁶hawnaw akhupaw kha ae hopah vae sah! Pawccecize hawnaw tuh aphuin patae a hoi. Na cyiseinaw te atekuhpaw laeze azyahua lante Pachia nynh ae ngiapaw kha nyku tua.

⁷“Pachia kya-e akhupaw uccaw hae kha na muih kho tou? Athunghuapaw huhan adianaw kha na muih kho tou?

⁸Tuh-e tuh vaawlui laeze ahanghua—nang nynh pawmou na cyih kho cih? Sheol laeze akhuhua— nang nynh pawmou na cyih kho cih?

⁹Pachia lesaenaw tuh laephi pynpi laeze saehua zah, rili laeze akohua.

¹⁰Pachia nynh thong ae sah zah byapianaw lang ae cciakhae ze, hum nynh mou amaw kha a khee kho cih?

¹¹Pawccecize Pachia nynh ccungkia leipaw ccungccaw hae kha a ny hae; hoyleinaw kha he a muih vae ze, tua leite a um cih tou?

¹²Thuasalama ramkaw e lann taraw tuh ccungccaw lang he yn than te, mingaee tuh a haw cih.

¹³“Na thinlung kha hmerarih lan na nung zetuh, na kuih kha Pachia kalan na dyng cih.

¹⁴Na kuih kya hoyleinaw a um ze, asawnaw langkhe ccaring la nung, hoyleinaw kha na bu lungkhu umsah nan.

¹⁵Tetuh na maesue kha ccaenaw um lei lante na langsakuh cih; na khyn cih zah, na rih lan khyh.

¹⁶Na riathaenaw kha na ning cih zah, po alua vae paw tui hawte na tua vae cih.

¹⁷Te na hiinnaw tuh ninthuccynglyn laeze a awhua cih; a mohnaw tuh awkhua hawte athua vae cih.

¹⁸Ngaehoinaw a um keiccuze ngaengante na um cih; thungkhaw na thua cih zah, khyndadyh lan na haeung cih.

¹⁹Na ih cih zah humhung nynh mah ae sii vae lan khyh; ccungccaw patae nynh na kya maehoynaw ccou a ry cih hae.

²⁰Thuasalama ccungccaw hoylei hae mit tuh a thawzya cih; minmin hanlan luenaw laanpi azo cih zah, mih ngaehoinaw tuh nyathyakou hy a sue lan hae paw kha nynh thua,” a ci.