Read Zotung Chin JOB 12 Bible Online

JOB 12 - Zotung Chin bible

JOB 12

¹Oute Job nynh khung zah:

²“Nanning tuh ccungccaw na thua oh zah, hawnaw tuh naemaw ryte a chihbua cih cipaw lunghiin lan um khyh.

³Thuasalama nanning hawte nythyanaw ka hoibua; kae hynh nanning laeze ka nyaahua khyh. Tuhcihawpaw tuh a nyh leipaw hummou a um?

⁴Ka ban hae nynh heize yn sarya hae; Kae tuh, Pachia kha ka ko zah yn thaepyapaw, a dingpaw te ccaenaw um leipaw, a sarya hae paw nynh ka thua.

⁵Mih thawdang hae paw nynh vawsaw tung hae paw kha a theihrya hae, vyavya khuliakuhpaw kha a theihrya hae.

⁶Miruh hae bu tuh daenaw kya a um, mih kuih kya mih pachia kha ccyngkute Pachia thin a riasah hae paw tuh a khyn hae.

⁷“Sarangpaw hae te vaawlang e pavaw hae kha khiakuh oh lah, ae ccangpah cih oh zah ae hopah cih oh;

⁸laephi kya-e aku hae kha khiakuh oh lah, ae ccangpah cih oh, te rili kya-e ngasaw hae kha khiakuh oh lah, ae hopah cih oh.

⁹E hae hynh BAWIPAW kuih nynh a raepaw nynh thua cipaw kha hynh-e hae balyn nynh ny leite a um hae zawtou?

¹⁰Ahysuepaw miakaw hiinnaw te ccungccaw miakaw hy tuh Pachia kuih kya nynh a um.

¹¹Lae nynh looh kha a taangtua hawte, nakaring nynh bya kha a syntawtua khaw?

¹²A tawpaw nynh hawnaw hoi zah, A shesaepaw nynh nythyanaw a hoi khaw?

¹³“Hawnaw te thawzung tuh Pachia kya a um; aning nynh tuanaw hoypaw te nythyanaw kha a hoi.

¹⁴Pachia nynh a phou ze, humhung nynh mah sakthui kho vae khyh; Pachia nynh lukhakheit kha a khawsung ze, humhung nynh mah hungpah kho vae khyh.

¹⁵Pachia nynh tui kha a tingkhaw zetuh, karae arou; tui kha a luasah zetuh, laephi kha pong avu.

¹⁶Thawzung te hawnaw tuh Pachia kya a um; a lingtupaw te a lingpaw tuh amaw kya-e nynh thua hae.

¹⁷Tuanaw pyatu hae kya-e hawnaw kha lawpah hae zah, byapiatu hae kha a ngaeesah hae.

¹⁸Siapharan hae kha phoh hae zah, thong a saw hae.

¹⁹Ranpibawi hae kha maethyalah hae zah, mih thawsaepaw kha a dawleih hae.

²⁰Doliaku lan um hae paw kha byaho kho leite umsah hae zah, kum tang hae paw kya-e nythyanaw kha phe a lawpya hae.

²¹Uktu hae kha maethyalah hae zah a thawsae hae paw taeccia kha a khahpya hae.

²²Mohnaw lungkhu e byakhupaw kha langsakuh zah, marae zipaw mohnaw kha awnaw kalan a thuakhae.

²³Minphuin hae kha a lesaepaw lang rae hae zah, phe bua a ro hae; minphuin hae kha pungzaesah hae zah, bua a zyasah hae.

²⁴Laephi cciakhaetu hae kyate nythyanaw kha lawpah hae zah, laanpi um leinaw ramkaw khe a khiavuisaku hae.

²⁵Minmin tuh awnaw um leite mohnaw kyakhe maemae a zahkuh hae; a ruipaw hawte tangkitangkae lante a cciasah hae.