Read Zotung Chin JOB 13 Bible Online

JOB 13 - Zotung Chin bible

JOB 13

¹“Dotua, e balyn hynh ka mit nynh phe muih vae, ka nakaring nynh mah thae zah a ny vae.

²Na ny oh paw balyn kha ka nybua; nanning laeze ka nyaahua khyh.

³Thuasalama Athunghuapaw kalan ka hopah cih zah, ka bya hynh Pachia ryte hoku tua ka ry.

⁴Nanning nynh hynbya kha na lawping oh; nae balyn mawte ccungkia leipaw sibawi nynh na thua oh.

⁵Yccae leite zya na um oh ze, tuh-e tuh nae hawnaw athua cih!

⁶Ka hopaw bya akonglang hynh ngaetua oh, ka mung nynh a hopaw ngianaw bya hynh ngaetua oh.

⁷Pachia hanlan akyh lei lante na ho cih oh tou? amaw hanlan hynbya na ho cih oh tou?

⁸Pachia kha maedo na mang oh tou? Amaw kha pankhawte bya na hokhae cih oh tou?

⁹Pachia nynh akaw-aleih he ae do oh te, nae tungvaw hoynaw a um cih tou? Lu kheit nynh mingccangpaw kha a ling hawte amaw kha na ling kho cih oh tou?

¹⁰Aruh lante maedo na mang oh ze, Pachia nynh solei ae thuihei cih oh.

¹¹A lesaenaw nynh nanning kha ae risah lan khyh oh tou? Amaw rawrinaw kha nynh ae thuanua lan khyh oh tou?

¹²Nae phungbya hae tuh buhhaw phungbya thua zah, na thungkhawkunaw oh paw tuh anglae tahawpaw nynh thua.

¹³“Yccae leite umtua oh, ka hobua cih, pawpaw zemah ka tungvaw thua vae sah.

¹⁴Ka saw kha ka haw te ka bou cih zah, ka hiinnaw kha ka kuih te ka ccyng cih.

¹⁵Pachia nynh yn theih vae cih, ngaehoinaw mah ka hoi vae khyh; thuasalama amaw malang khe ka seishawkunaw bya kha ka ho cih.

¹⁶Tuhte ka cyipaw tuh ka khumnaw athua cih. Pachia pawlangria leipaw tuh amaw malang pou ngan lan khyh.

¹⁷Ka bya hynh hoyte yn ngaepah oh lah, ka hopaw bya hynh nae nakaring lungkhu lang tee sah.

¹⁸Ka bya ka than hanlan ka paccynkuh ccaccing vae; thyaaccousah ka thua cih cipaw ka ny.

¹⁹Kae kha rawsete hummou bya a ho cih? Tuhte a ho lanze, zya ka dae cih zah ka chih cih.

²⁰Uccaw phuin ning kyalya beih yn ua, nae ua zetuh na kyate ka rekuh lan khyh:

²¹na kuih kha ka kyate beih sawsakuh lah, ri lan na umnaw nynh ka thin yn phangsah nan sah.

²²Tetuh yn ko lah, kae oi cih; tuhkhyhze kae nynh kae hopah ty sah lah, te yn leihru vae.

²³Ka hoyleinaw te ka seinaw tuh hohzeihmou acih? Ka cyiseinaw te ka seinaw kha beih yn nysakuh.

²⁴Pawccemou na mitmae nae retawkuh zah kae hynh na rhaw lang nae ria?

²⁵Khisan nynh a mungpaw thingnaw kha na siisakuh cih tou? vaekang aroupaw kha so na deehui cih tou?

²⁶Pawccecize kae kha rawsete myarya ccihpaw seibenaw kong kha na zei zah, ka di lya-e ka hoyleinaw mee kha nae ruesah.

²⁷Ka ccu kha sivawrui te nae he zah ka ccianaw takyh khe nae buhkhaw; ka ccunoh kya syntawnaw na rae.

²⁸Aning tuh amawepaw uccaw hawte thua zah, ripaw nynh a aepaw boeining hawte nynh athua.