Read Zotung Chin JOB 15 Bible Online

JOB 15 - Zotung Chin bible

JOB 15

¹Oute Teman minphuinpaw Elifaz nynh khung zah:

²“Mihawpaw nynh khivae tahawpaw bya khate khungru lan accan zawtou? Nithua lang e khisan khate tou amaw te amaw kha phe a biasakuh cih?

³Athane leipaw bya te thuasah, hoynaw a thuakhae kho leipaw bya te thuasah eiku lan accan zawtou?

⁴Nang tuh Pachia rawrinaw kha na vua zah, Pachia malang sawsang kha na kheeku.

⁵Na hoyleinaw nynh na munglae kha ccangpah zah, thyaruhnaw bya kha na poku.

⁶Kae nynh thua leite, namaw khalang ccaccei nynh namaw kha sei ae be; na munglae nynh nang rawsenawpaw ccaekia a khan.

⁷“Nang hynh ccungccaw kyaze masaty a puipaw na thua tou? Mua hae kha rae athua mawze nang tuh na la pui vae tou?

⁸Pachia ryte tungkunaw kya-e aphiruh bya kha na thae boi tou? Ccungccaw hawnaw hynh nang rou tou na hoi?

⁹Kae ny leipaw kha pawmou na ny? Ccaerarih lan kae thaethya leipaw kha pawmou na thaethya?

¹⁰Na paaw laeze tawhua hae zah mih sang a paw hae paw te mih kum a tang hae paw tuh kae kya a um hae.

¹¹Pachia nynh nang ae pyapaw lungtangnaw bya tuh eih zya kaesy tou? nevyalya lan ae hopyapaw bya tuh eih zya kaesy tou?

¹²Pawccemou na thinlung nynh nang kha ccaring ae cciakhae zah, na mit te tahrarih lan nae do?

¹³Tetuh na thinlung nynh Pachia kha rawse zah, tuhcihawpaw bya kha na khalang kyate a pousah.

¹⁴Ccungccaw tuh paw thua zahte mou a thyaa kho lanpaw tuh? Nopi nynh a saahpaw tuh paw thua zahte mou a ding kho lanpaw tuh?

¹⁵Pachia nynh tuh a mithyaa hae kha heize zyn khyh hae, vaawccungccaw hae heize amaw malang tuh thyaa khyh hae;

¹⁶anungsikuhpaw te a ozia thahpaw, hoyleinaw kha tui hawte a neihpaw ccungccaw thathy tuh holae um vae khyh!

¹⁷“Kae muihsah cih; yn ngaepya tua; ka muihpaw kha kae hopah cih,

¹⁸mihaw hae nynh ho hae zah, minpaaw hae nynh a phei lei hae paw bya kha kae hopah cih,

¹⁹ram tuh minmin kyalya kha pya hae zah, minmin laku kya minphuin ccangpaw umbua khyh.

²⁰Ccungccaw hoyleipaw tuh a hiin lungkhu balyn vawsaw a teing; thawccinaw a hoi leipaw hanlan a hiin lungkhu balyn vawsawnaw kha nungpya athua.

²¹Ri lan umpaw roi kha a nakaring kya accae; a hoirum lyakhe miruh nynh a thuanua cih.

²²Mohnaw lungkhu te lue lanpaw kha ngaehoinaw hoi khyh, aning tuh thaloi hanlan laerui-awde athua vae.

²³‘Tei vema looh a um?’ cite looh ccungku lan a khiakuh hae; mohnaw ccyh tuh anae vae cipaw a ny hae.

²⁴Rhawtuk lan a paccynkuhpaw siapharan hawte, lungvawsawnaw te thinphangnaw nynh amaw kha risah zah a tae.

²⁵Pawccecize Pachia kha rawsete a kuih dyngnua zah Athunghuapaw kha pawlangria khyh;

²⁶khawriaphua thaawkalaepaw kha ccyngkuh zah lungkhungte Pachia kha rawsete a ccuenua;

²⁷a mae kha atho nynh phang bong zah, a cce kyakhe atho tuh a sueluakuh.

²⁸Thuasalama ccungccaw adaenaw khuapi, lu kheit nynh sanmah umnaw lei lanpaw inn hae, roh zah patae apumkuh lanpaw inn hae kyakhe aning tuh a um cih.

²⁹Aning tuh hoirum lan khyh zah, a sisua tuh tyn lan khyh, a hoirumnaw mah lae vawlan azo cih;

³⁰mohnaw kyate lue lan khyh; maeephu nynh atoih thawpaw a nge kha a rousah cih zah, khisan nynh a paw kha ccaring a mung cih.

³¹Amaw te amaw lingkute accakaepaw kha doliakuh nan sah; pawccecize accakaepaw kha a mue cih.

³²A ccyh azaw maw azo cih zah, a karan tuh hinlalyh lan um lan khyh.

³³Misu ku hawte athae avoi leipaw kha a khuasakuh cih zah, oliv ku hawte apaw kha a khuasakuh cih.

³⁴Pawccecize Pachia pawlangria leipaw phu tuh tiin hae zah, pyaruh te sakpaw mih inn tuh maee nynh a u.

³⁵Thyaruhnaw kha ccaaw lang poi hae zah hoyleinaw kha ccaaw lang a saah hae, mih thinlung nynh hynbya kha a paccyn,” a ci.