Read Zotung Chin JOB 18 Bible Online

JOB 18 - Zotung Chin bible

JOB 18

¹Oute Shuh minphuinpaw Bildad nynh khungru zah:

²“Hohseciamou bya na ho cih? Hoyte tuatua, kaening nynh bya kae ho cih.

³Pawccemou kaening hynh sarangpaw lang nae ria? Pawccemou kaening hynh mingaee lang nae muih?

⁴Na thinria zah namaw te namaw vawsaw na pyaku keiccuze, laephi hynh vua athua cih tou? Lung hae kha mih umnaw kyate nue athua cih hae tou?

⁵“Ccungccaw hoyleipaw kya-e awnaw kha the athua cih zah, a maeesoi tuh rua lan khyh.

⁶A bu lungkhu kya awnaw tuh moh zah, a luki e maeeinn tuh achih.

⁷A laanccia tangkaraepaw kha a thy a pawkuh vae, a paccynkupaw toulou nynh amaw kha a khulia.

⁸A ccu khate kaang lungkhu lang tee zah, kaang zantapin kha a sy.

⁹Kaang nynh a ccumaria khate leih zah, kaang a kae vae.

¹⁰Kaangrui tuh laekhu kya thuruh thua zah, kaang tuh laanpi kya nungkhaw athua.

¹¹Rinaw nynh voikheit voikheit langte koihlu zah, kyng khylan a deehui.

¹²A vuelaw keiccuze a thawzung athang vae, aning kha khuliasaku khylan vawsawnawpi nynh a thadynnua.

¹³Ccinaw keiccuze a ving tuh khaleih roh zah, Chinaw a ccatawccaw nynh a kuih a ccu hae kha khaleih a ro.

¹⁴A doliakupaw a umnaw bu kyate amaw kha ccaring sue thua zah, rinaw siapharan kalan khe cciakhae athua.

¹⁵A umnaw bu kya pawpaw mah um vae khyh; a umnaw kyakhe kemaee kha vuanua athua.

¹⁶Akaw e a tharui hae tuh karae rou zah, avaw e a karan hae tuh baleih anaan hae.

¹⁷Aning syntawnawpaw tuh laephi kyate zo zah, laanpi kya min hoi vae khyh.

¹⁸Aning kha awnaw kyate mohnaw lungkhu lang nohde thua zah, laephipi kyate dee athua.

¹⁹A puizia hae laku kya ciihan thuasah, ccaawno thuasah hoi khyh, leih a la umnaw hae kya ahiinpaw lu kheit san um vae khyh.

²⁰Niccaw lang e ccungccaw hae nynh a kong he a thae hae te, siikuh hae zah, nithua lang e ccungccaw hae tuh rikawte a um hae.

²¹Thanccingte tuhcihaw tuh Pachia pawlangria lei hae paw mih umnaw thua zah, tuhcihawpaw hmin tuh Pachia nyh lei hae paw umnaw hmin nynh thua,” a ci.