Read Zotung Chin JOB 19 Bible Online

JOB 19 - Zotung Chin bible

JOB 19

¹Oute Job nynh khungru zah:

²“Hohseciamou vawsaw nae pya ung cih oh zah, bya te palae tui lan nae khya ung cih oh?

³Vae haw cia ka tungvaw nae seisah vae oh; ka tungvaw seisah lan nae maethah khyh tou?

⁴Ka la mesei ze heize ka meseinaw tuh kamaw te nynh aseku.

⁵Nanning nynh kae kha rawsete nae poonuakuh oh, maethyanaw ka ingpaw hynh a seinaw keiccu nynh thua nae ci oh ze,

⁶Pachia nynh meseinaw kya yn nung zah, a kaang te yn koihlu cipaw nyh oh.

⁷‘Ccungccaw chia nynh thua!’ cite ka sia zemah, hum nynh sanmah yn khungru khyh; thawte ka sia zemah dingnaw umlae khyh.

⁸Ka ccia kho khyh nawlan, pang yn thungkhaw zah, ka ccianaw kya mohnaw kha a nung.

⁹Ka phu-enaw kha poh yn khahpah zah, ka lu kyate bawilukhung kha yn lawpya vae.

¹⁰Voikheit voikheit langte yn bua zah phe ka zo vae, ka ngaehoinaw kha thingku hawte poh a phoh vae.

¹¹A thinrianaw kha maee lang yn ruasah nua zah, a rhaw lante yn ria vae.

¹²A rhawkaw hae nynh yn ccianua hae zah, laekarung kha thaekute ka bu po voilu lan ryahmin yn tahnuaku hae.

¹³“Ka uno hae kha ka kyate sawsakuh hae zah, kae nyhkuh hae paw tuh ka kyate a phiakuh vae hae.

¹⁴Ka puizia hae te ka ruiban hoy hae nynh yn cciataw vae hae;

¹⁵ka inn a thua boi hae paw ka mikhia hae nynh yn ning vae hae; ka ryalahtu nopi hae nynh mikhia lang yn ria hae; minmin mitmuihnaw kya ramccangpaw lang nynh ka tang vae.

¹⁶Ka ryalahtupaw kha ka ko zemah yn khung vae khyh; ngiakute nynh ka soihbiaku vae.

¹⁷Ka hysue tuh ka zu hanlan nungsikuh zah, kae puikheihpaw ka uno hae hanlan anungsikuhpaw nynh ka thua vae.

¹⁸Imua taraw hae nynh heize yn theihrya hae; he ka thoku vae ze, yn sarya hae.

¹⁹Ka ruiban hoypaw balyn nynh yn hua hae, ka sungsah hae paw nynh yn rawse vae hae.

²⁰Ka ru hae tuh ka ving te ka saw kya bekuh zah, ka hanin kyalya te me ka lue.

²¹Pou ka ruiban hae, ngaethya yn umsah oh, ngaethya yn umsah oh; pawccecize Pachia kuih nynh yn hae vae!

²²Pawccemou Pachia nynh yn deehui hawte nae deehui oh? Pawccemou ka ngesaw kha aete kharouhmaw nae lungryachi khyh?

²³“Ka bya hynh zei thua vae sah! ccauh kya zei thua vae sah!

²⁴Sivaw ccaccung te kuee khate zungzae atyn lante lungphe vawlan zei thua vae sah!

²⁵Pawccecize kae yn Shawkhawtu tuh hiin zah, nyathyakou kya laephi vawlan yn thadyn cih cipaw ka ny;

²⁶ka ving tuh phe aro vae zemah e ka ngesaw maw hynhte Pachia kha ka muih cih,

²⁷ka kalan a panpaw amaw kha ka muih cih, milae nynh thua leite kamaw ka mit ccaccei nynh a muih cih. Ka lungkhu kya ka lungthawthang!

²⁸‘Pawtepei amaw kha vawsawnaw ah pya cih oh! E vawsawnaw athonaw tuh amaw kya nynh muih athua,’ cite na hoku oh ze,

²⁹thaloi rhaw kha rih oh, pawccecize Pachia thinrianaw nynh thaloi te detahnaw kha a thuakhae, tetuh byapianaw a um cipaw kha na nyh cih oh,” a ci.