Read Zotung Chin JOB 20 Bible Online

JOB 20 - Zotung Chin bible

JOB 20

¹Oute Naamath minphuinpaw Zofar nynh khungru zah:

²“Hoyte ngaetua! Ka lungriathae keiccuze, nang kha khungru khylan ka thinlung nynh yn tuhou.

³Ka tungvaw saryate seibenaw bya kha ka thae zah, ka thinlung nynh nang khungru lanpaw kha a ny.

⁴Langmawlya, laephi vawlan ccungccaw la um takaw lya mawte,

⁵ccungccaw hoyleipaw a lungtuanaw ccyh tuh dyn zah, Pachia pawlangria leipaw a lungtuanaw tuh sosoh kyalya nynh thua cipaw na nyh khyh tou?

⁶Aning tuh vaawlui cia hang zah, a lu nynh maeking phe a phya ze heize,

⁷amaw ia hawte zungzae a roh cih; amaw a muih hae paw nynh, ‘Teipei a um?’ a ci cih hae.

⁸Aning tuh maan hawte azo cih zah, muih kho um vae lan khyh; khuazi e vizin hawte azo cih.

⁹Amaw kha a la muihpaw mit nynh muih vae lan khyh, a la umnaw hmin nynh amaw kha muih vae lan khyh.

¹⁰A ccaaw hae nynh ryachi hae kya-e a ru hae paw sisua kha mimaw kuih te a kii cih hae.

¹¹Thawzung te phe abeihpaw ano ungpaw a pyn tuh amaw ryte laenoi kya a ih cih hae.

¹²“Hoyleinaw tuh a khalang kya e zah, a lae kaw khe zya a thuruh zemah,

¹³tuh-e tuh zosah ry leite, a khalang kya phang a mung zemah,

¹⁴a vue lungkhu khe a looh tuh rulaekuh zah, a lungkhu kya huparepaw sy lang a tang.

¹⁵Hoirumnaw kha po laang zah, bua a lua; Pachia nynh a vue lungkhu te phe a pousah.

¹⁶Aning nynh huparepaw sy kha zu zah, huparepaw lae nynh amaw kha a theih cih.

¹⁷vawpi hae, mateitui te khoilutui a luapaw vaw hae kha muih lan khyh.

¹⁸A ryalaw mee athae kha due mang leite bua a kii cih hae; kung a kunaw mee amia khate lungtuanaw mue lan khyh.

¹⁹Pawccecize ryachi hae kha tuaasah hae zah pawlangria khyh hae, amaw nynh a sak leipaw inn kha a luade hae.

²⁰“A rylenaw vue tuh beih kho boi khyh zah, a karankunaw kya pawpaw mah zuasah khyh.

²¹A ae koute pawpaw mah umlae vae khyh; tukeiccuze a hoirumnaw tuh tyn lan khyh.

²²Rythy azaw lan a hoi lya hae khe, lungvawsawnaw a tung cih hae; lungriathaenaw aphuinphuin nynh a thuanua cih hae.

²³A vue phe so lan ae ccaleih sah! Pachia nynh a thinrianaw kha a sawnua cih, tuh-e a thinrianaw tuh looh hawte a tungvaw kya khuaa lang a rawsah cih.

²⁴Sivaw zunghe kyate a ccue zemah, sohin the nynh po a thuing cih.

²⁵Tuh-e the kha a pyn kyate phoh thua zah, phaephae akpaw the adung tuh a nynkhaw kyate yn toikuh; tetuh aning tuh a rih vae.

²⁶A sisua balyn tuh mohnaw kya azo, ccungccaw nynh tuaa leipaw maee nynh amaw kha a u cih; a bu kya a umpaw balyn kha a u cih hae.

²⁷Aning a hoyleinaw kha vaawlui nynh a phy cih zah, laephi nynh mah rawsete a thonuakuh cih.

²⁸A inn umpaw hoirumnaw miakaw kha azo cih zah, Pachia a thinria nin vae tuh phe azo cih.

²⁹E tuh ccungccaw hoyleipaw nynh Pachia kyate a ccou lanpaw a hanpaw nynh thua, Pachia nynh aning hanlan a nungpyapaw rho nynh thua,” a ci.